الەمدىك اۆتو-دودانىڭ ماڭعىستاۋدا ءوتۋى, بىرىنشىدەن, سايىس ءۇشىن قىزىقتى بولسا, ەكىنشىدەن, كيەلى ءوڭىردىڭ سۇلۋ تابيعاتىن, تاريحي ورىندارى مەن مادەنيەتىن وزگە ەلدەرگە تانىتۋعا جاسالعان مۇمكىندىك.
ماڭعىستاۋدا وتكەن «راللي قازاقستان-2017» راللي-رەيد الەم كۋبوگىنىڭ بەسىنشى كەزەڭى ەكسپو-2017 كورمەسىنىڭ قۇرمەتىنە ورايلاستىرىلدى. قازاقستان رەسپۋبليكاسى مادەنيەت جانە سپورت مينيسترلىگى, ماڭعىستاۋ وبلىسىنىڭ اكىمدىگى جانە ەلىمىزدىڭ اۆتوموتوسپورت فەدەراتسياسىنىڭ ۇيىمداستىرۋىمەن وتكىزىلىپ جاتقان سايىسقا قازاقستانمەن بىرگە, ساۋد ارابياسى, ءباا, كاتار, رەسەي, ۋكراينا, پولشا, ليتۆا, گەرمانيا, چەحيا, بەلورۋسسيا, نيدەرلاند, سلوۆەنيا, فرانتسيا ەلدەرىنەن 25 ەكيپاج, 50 سپورتشى قاتىستى.
الدىمەن اقتاۋ قالاسىندا تەڭىز جاعالاۋىندا سالتاناتتى اشىلۋى وتكەن سايىس التى كەزەڭنەن تۇردى جانە ءبىر اپتاعا سوزىلدى. بارلىعى 2494 شاقىرىمدىق جارىس جولىنىڭ 1846 شاقىرىمى جەدەل ءجۇرۋ ايماقتارى بولدى.
تەمىر تۇلپارلاردى تىزگىندەگەن سپورتشىلار كاسپي تەڭىزىنىڭ باتىس جاعالاۋىن بويلاي ءجۇرىپ ءوتتى. كەڭ دالانى قويۋ شاڭعا وراپ, جاپاندا قۇيىنداتا جۇيتكىگەن جارىستا شىعىستاعى راللي جارىسىنىڭ 12 دۇركىن جەڭىمپازى, FIA الەم كۋبوگىنىڭ جەتى مارتە چەمپيونى كاتارلىق اۆتوشاباندوز ناسسەر ءال-اتتيا بەس كۇن بويى كوش باستاپ, وسى اۆتو-الاماننىڭ جەڭىمپازى اتاندى. جارىستىڭ جوعارى دەڭگەيدە ۇيىمداستىرىلعانىن, قازاقستاننىڭ, ماڭعىستاۋدىڭ ەرەكشە اسەر ەتكەنىن ايتقان ناسسەر ءال-اتتيا سايىستا ساعاتىنا 180-185 شاقىرىمعا دەيىن ءجۇرىپ, بارلىعى 2200 شاقىرىم جولدى ارتقا تاستاعان.
اۆتو-الامانداعى قازاقستاندىق توپتىڭ دا جەتىستىكتەرى جامان ەمەس. ەلىمىزدىڭ اتىنان التى كوماندا قاتىسىپ, جالپى ەسەپتە 5-ورىننان كورىندى.
قازاق دالاسىندا تەمىر تۇلپارلارمەن سايىسقا تۇسكەن كاسىبي سپورتشىلار ەندى راللي-رەيدتى يتاليا, يسپانيا, ۆەنگريا, پولشا, ماروككو, پورتۋگاليادا جالعاستىرىپ, بيىلعى جىلدىڭ قازان ايىنا دەيىن جارىسقا تۇسپەكشى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
