فەستيۆالدىڭ بيىل ەلوردا كۇنى مەرەكەسىنەن ءسال ەرتەرەك باستالىپ كەتۋ سەبەبى, بىرىنشىدەن, الەم كوز تىككەن ەكسپو كورمەسىنە مەرەكەلىك شاشۋ دەسەك, ەكىنشىدەن, ودان كەيىن ىلە-شالا كسرو حالىق ءارتىسى, قازاقستاننىڭ ەڭبەك ەرى ءاسانالى ءاشىموۆتىڭ 80 جىلدىعىنا ارنالعان ءبىرىنشى دۇنيەجۇزىلىك تەاترلار فەستيۆالىنىڭ شىمىلدىعى تۇرىلگەلى تۇر. وعان رەسەي, قىتاي, جاپونيا ەلدەرىنەن تانىمال ونەر ۇجىمدارى قاتىسادى دەپ جوسپارلانۋدا. ال ءداستۇرلى «ساحنادان سالەم!» فەستيۆالىنە ورالساق, ساحنا الاڭىندا ارتىستەردىڭ ءبىر-بىرىنەن وزىق داستۇرلەردى ۇيرەنىپ, ءوزارا تاجىريبە الماسۋىنا, كاسىبي بىرلەسكەن جوبالارعا قاتىسۋعا مۇمكىندىك تۋعىزعان فەستيۆالدىڭ بيىلعى ەرەكشەلىگى, ساحنا ساڭلاعى, تەاتر ابىزى ءازىربايجان مامبەتوۆتىڭ مەرەيتويىنا ارنالۋىندا.
ساراپشىلىققا گەرمانيادان يۋنەسكو جانىنداعى تەاتر سىنشىلارى حالىقارالىق قاۋىمداستىعىنىڭ مۇشەسى, تەاتر سىنشىسى نينا مازۋر, گرۋزيادان مەملەكەتتىك «يلي» ۋنيۆەرسيتەتى جانىنداعى قازىرگى زامانعى گرۋزين تەاترى زەرتتەۋ ورتالىعىنىڭ ديرەكتورى, ونەرتانۋ دوكتورى لاشا چحارتيشۆيلي, مولدوۆادان مۋزىكا, تەاتر جانە بەينەلەۋ ونەرى اكادەمياسىنىڭ كافەدرا مەڭگەرۋشىسى, ونەرتانۋ دوكتورى, پروفەسسور اندجەلينا روشكا ات تەرلەتىپ جەتسە, قازاقستان تاراپىنان دراماتۋرگ, ونەرتانۋ كانديداتى ەركىن جۋاسبەك, قازاقستاننىڭ حالىق ءارتىسى, رەجيسسەر تالعات تەمەنوۆ, تەاترتانۋشى ءسانيا قابديەۆا بار.
بۇل رەتتە تاعى جاستار تەاترىنىڭ «اساۋعا تۇساۋ» تۋىندىسىنان كەيىنگى ەستافەتانى «سوعىس» دراماسىمەن جالعاستىراتىن ازەربايجان مەملەكەتتىك جاس كورەرمەندەر تەاترى, 14 ماۋسىمدا «ليۋبوۆ ي گولۋبي» كومەدياسىمەن شىعاتىن ورىنبور مەملەكەتتىك م.گوركي اتىنداعى وبلىستىق دراما تەاترى, 16 ماۋسىمدا «يلەگيلەك» پسيحولوگيالىق دراماسىن ۇسىناتىن بىشكەكتىڭ (قىرعىزستان) «تۋنگۋچ» جاستار تەاترى, سونداي-اق «چەلوۆەك ۆ فۋتليارە» قويىلىمىن اكەلگەن سانكت-پەتەربۋرگتەگى مەملەكەتتىك ا.بريانتسەۆ اتىنداعى جاس كورەرمەندەر تەاترى ەلوردا فەستيۆالىنە العاش رەت قاتىسىپ وتىرعانىن ايتا كەتكەن ءجون. سونىمەن قاتار, وتاندىق ونەر ۇجىمدارىنان مەملەكەتتىك اكادەميالىق م.گوركي اتىنداعى ورىس دراما تەاترى «ماڭگۇرت. ماڭگىلىك قۇل» ميستەرياسىن, ماڭعىستاۋ وبلىستىق ن.ءجانتورين اتىنداعى مۋزىكالىق-دراما تەاترى «شىڭىراۋ» دراماسىن, 15 ماۋسىمدا فەستيۆال باعدارلاماسىنا سايكەس س.مۇقانوۆ اتىنداعى وبلىستىق قازاق مۋزىكالىق-دراما تەاترى «قاسىرەت...» پسيحولوگيالىق دراماسىن جانە جامبىل وبلىسىنىڭ ورىس دراما تەاترى «دون جۋان» كومەدياسىن كوپشىلىك نازارىنا ۇسىنباق.
قاراشاش توقسانباي,
«ەگەمەن قازاقستان»
استانا
