ءلايلى ايتجانقىزى م.وسپانوۆ اتىنداعى اقتوبە مەديتسينا اكادەمياسىن 2004 جىلى اكۋشەر-گينەكولوگ ماماندىعى بويىنشا ءبىتىرىپ, ينتەرناتۋرادان سوڭ تۋعان جەرىنە ورالدى. جاستىڭ ءبارى قالاعا اعىلعان سول جىلدارى ول اۋىلدى, اۋىل بولعاندا دا وبلىس ورتالىعى اقتاۋدان 500 شاقىرىم جەردەگى بەينەۋدى تاڭدادى. اۋداندىق اۋرۋحانانىڭ قاتارداعى دارىگەر-
لىگىنەن باستاپ, بالا تۋ ءبولىمىنىڭ مەڭگەرۋشىسىنە دەيىن كوتەرىلدى. جاس مامان بويىنداعى قۋات-قابىلەتىن ەل ىسىنە نەگە جۇمساماسقا دەگەن ماقساتپەن اۋداندىق ءماسليحاتتىڭ دەپۋتاتى دا بولدى. بەينەۋدە تابانداعان ون جىل ەڭبەك ەتكەن ل.اجىباەۆا تاجىريبە جيناپ, ىسىلعان سوڭ اقتاۋ قالالىق پەرزەنتحاناسىنا قىزمەتكە ورنالاستى.
قازىرگى تاڭدا جۇكتى, تولعاعى كەلگەن جانە بوسانعاننان كەيىنگى كەزەڭدەگى ايەلدەرگە تاۋلىك بويى اكۋشەرلىك شۇعىل بىلىكتى مەديتسينالىق كومەك كورسەتىپ, اۋىر ناۋقاستار مەن جۇكتى ايەلدەرگە كونسيليۋم وتكىزەدى. ءاردايىم ءبىلىمىن جەتىلدىرىپ, ىزدەنىپ جۇرەتىن مامان قوسىمشا ۋزي اپپاراتىنا ءتۇسىرۋ ماماندىعىن دا يگەرىپ الدى. قازىر قالالىق پەرزەنتحانادا ءارى اكۋشەر-گينەكولوگ, ءارى ۋزي مامانى بولىپ تىنىمسىز ەڭبەك ەتۋدە. ءوزى جاس مامان بولسا دا, وزىنەن كەيىنگى جاستارعا بىلگەنىن ۇيرەتىپ, جيعان تاجىريبەسىن بولىسەتىن اقىلشى دا. ايتالىق, جاس دارىگەرلەرگە وتا تەحنيكاسىن ۇيرەتۋدەن جالىقپايدى. ءلايلى ايتجانقىزىنىڭ جۇمىسقا تيياناقتىلىعىنا سەنگەن باسشىلىق وعان دياگنوستيكالاۋ, ەمدەۋ حاتتامالارىن قاتاڭ باقىلاۋ جانە ساقتاۋ قىزمەتىن جۇكتەدى.
– انا مەن بالا دەنساۋلىعى, ولاردىڭ ءولىمىن بولدىرماۋ – ءبىزدىڭ ەڭ باستى ماقساتىمىز. انا دا, ءسابي دە – ادام. ال ادام, كونستيتۋتسيامىزدا ايتىلعانداي, مەملەكەتىمىزدىڭ ەڭ باستى قۇندىلىعى. 2009 جىلى وبلىس اكىمىنىڭ كاۋلىسىمەن 60 ورىندى پەرزەنتحانا اقتاۋ قالاسىنىڭ جۇكتى ايەلدەرىنە جانە تولعاعى كەلگەن, بوسانعان ايەلدەرگە مامانداندىرىلعان مەديتسينالىق كومەك كورسەتۋ ءۇشىن اشىلعان بولاتىن. سول جىلى جەرگىلىكتى قارجىلاندىرۋ كومەگىمەن اتالعان پەرزەنتحانادا كۇردەلى جوندەۋ جۇمىستارى جۇرگىزىلدى. قازىرگى تاڭدا پەرزەنتحانا ءوز الدىنا كەشەندى اكۋشەرلىك عيماراتى بار, بەس بولىمنەن تۇراتىن ۇلكەن بوساندىرۋ مەكەمەسى. بوسانۋشى ايەلدەر سانى جىلدان-جىلعا ارتۋدا. ءبىز كەلۋشىلەرگە ءتارتىپتى, تازالىقتى جانە دارىگەرلىك مىندەتتىلىكتەردى ساقتاپ, لايىقتى جاعداي جاساۋعا تىرىسامىز, – دەيدى ەكسپەرت دارىگەر جانە اكۋشەر-گينەكولوگ, اكۋشەرلىك جانە گينەكولوگيا ماماندىعى بويىنشا 1 ساناتتى مامان ل.اجىباەۆا.
كەشە عانا قازاقستان رەسپۋبليكاسى ۇلتتىق ەكونوميكا ۆيتسە-ءمينيسترى رۋسلان دالەنوۆ ماڭعىستاۋ وبلىسى رەسپۋبليكادا بالا تۋ كورسەتكىشى بويىنشا كوشباسشىلىق ورىندا كەلە جاتقانىن ايتقان بولاتىن. تابيعي ءوسىم جانە كوشىپ كەلۋشىلەر ەسەبىنەن تۇرعىندار سانى كۇرت ارتقان وڭىردە ومىرگە كەلىپ جاتقان ءاربىر ءسابيدىڭ كىندىگىن كەسىپ, «قارسى الىپ» جۇرگەن ءلايلى سىندى اكۋشەر-گينەكولوگتاردىڭ ەڭبەگى زور.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
