جۇمىس توبىنىڭ جەتەكشىسى, ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ە.قاجىبەك جەتەكشىلىك ەتكەن جيىنعا قر ۇعا پرەزيدەنتى, اكادەميك مۇرات جۇرىن ۇلى, پروفەسسور بايىنقول قاليەۆ, ساياساتتانۋشىلار دوس كوشىم, ايدوس سارىم, پروفەسسور ءالىمحان جۇنىسبەك, قر ۇعا كوررەسپوندەنت-مۇشەسى, پروفەسسور زەينەپ بازارباەۆا, پروفەسسور جۇماعالي ءابۋوۆ, پروفەسسور تانات اياپوۆا, پروفەسسور قۇرالاي كۇدەرينوۆا, باسقا دا كوميسسيا مۇشەلەرى ء(تىزىم بويىنشا) جانە ينستيتۋتتىڭ عالىمدارى مەن ماگيسترانت-دوكتورانتتارى قاتىستى. جيىندا قر ۇلتتىق عىلىم اكادەمياسىنىڭ پرەزيدەنتى, اكادەميك جۇرىنوۆ مۇرات جۇرىن ۇلىنىڭ لاتىن ءالىپبيى جايلى بايانداماسى;ابىلايحان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى قاليەۆ بايىنقول قالي ۇلىنىڭ لاتىن ءالىپبيى تۋرالى بايانداماسى تىڭدالىپ, تالقىعا ءتۇستى.
جۇمىس توبىنىڭ قۇرامىندا لاتىن ءالىپبيىنىڭ نۇسقالارىن رەتتەيتىن, ساراپتايتىن, جۇيەلەيتىن كوميسسيا قۇرىلدى. وسىعان وراي, لاتىن گرافيكاسىنا نەگىزدەلگەن جاڭا الىپبيگە قاتىستى بارلىق ۇسىنىستار ەرەكشەلىكتەرىنە سايكەس توپتاستىرىلىپ, جان-جاقتى تالدانىپ, جۇمىس توبىنىڭ الداعى وتىرىستارىندا تالقىلاناتىن بولادى. قازىرگى ۋاقىتتا جۇمىس توبىندا كومپيۋتەر, ءىت جانە ەلەكترونيكا, اعىلشىن ءتىلى ماماندارىنىڭ, تۇركىتانۋشى, سونداي-اق قازاق ءتىلى عالىمدارىنىڭ, شەتەلدىك قانداستاردىڭ, پارلامەنت دەپۋتاتتارى تاراپىنان ت.ب. قالىڭ جۇرتشىلىقتان كەلىپ-ءتۇسىپ جاتقان ۇسىنىس جوبالارى بار.
ۇسىنىلعان جوبالار بەلگىلەنگەن عىلىمي تالاپتارعا سايكەس بولعان جاعدايدا ارنايى دەرەك قورىنا ەنگىزىلەتىن بولادى.
باعاشار تۇرسىنباي ۇلى,
«ەگەمەن قازاقستان»,
الماتى
