ستاتيستيكالىق مالىمەتتەرگە سۇيەنسەك, قازاقستانداعى كاسىپوداق ۇيىمدارىنا 2 ميلليونعا جۋىق ادام مۇشە بولسا, سونىڭ ىشىندە 700 مىڭى جاستار كورىنەدى. رەسپۋبليكا بويىنشا جالدامالى جۇمىسكەرلەر سانىنىڭ 6 ملن شاماسىندا ەكەنىن ەسكەرسەك, كاسىپوداقتارعا مۇشە ازاماتتار سانى 33 پايىزدى قۇرايدى.
«رەسپۋبليكاداعى كاسىپوداقتاردىڭ مىندەتى جۇمىسشىلاردىڭ قۇقىقتارىن ءتۇسىندىرۋ جانە قورعاۋ. ءبىزدىڭ فەدەراتسيا ەلدىڭ تۇكپىر-تۇكپىرىندە بىلتىر قابىلدانعان جاڭا «ەڭبەك كودەكسى» مەن 2014 جىلى قابىلدانعان ءوزىمىزدىڭ «كاسىپوداقتار تۋرالى» زاڭدى ءتۇسىندىرۋ جۇمىستارىن جۇرگىزۋدە», - دەيدى قر كاسىپوداقتار فەدەراتسياسىنىڭ توراعاسى ابىلعازى قۇسايىنوۆ.
«مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ نەگىزگى مىندەتتەمەلەرىن جۇزەگە اسىرۋ الەۋمەتتىك جاڭارتۋدىڭ كەپىلى», - دەيدى كاسىپوداق قوزعالىسى وكىلدەرى.
سونىمەن قاتار, فەدەراتسيا توراعاسى مەكەمەلەردىڭ قاراماعىنداعى قىزمەتكەرلەر قۇقىعىن بۇزۋ ماسەلەسى تۋرالى دا پىكىرىمەن ءبولىستى. «قازىرگى ۋاقىتتا جۇمىس بەرۋشىلەردىڭ تاراپىنان جۇمىسكەرلەردىڭ قۇقىقتارىنىڭ بۇزىلۋ دەرەكتەرى ازايىپ كەلەدى. ويتكەنى داۋلاسقان تاراپتار ماسەلەنى زاڭعا جۇگىنە وتىرىپ شەشەتىن بولعان. دەگەنمەن ءبىز دە بوساڭسىماي جۇمىسكەرلەر قۇقىقتارىن قورعاۋ مەن ونىڭ بۇزىلۋىنىڭ الدىن الۋ شارالارىن تۇراقتى وتكىزىپ تۇرامىز. ماسەلەن, 2017 جىلدىڭ العاشقى توقسانىنىڭ وزىندە ءبىز رەسپۋبليكا بويىنشا 2 مىڭداي ازاماتتى قابىلدادىق. ولاردىڭ بىزگە ارىزدانىپ كەلگەندە ايتاتىن ماسەلەلەرى نەگىزىنەن جۇمىسقا تۇرۋ, نەگىزسىز جۇمىستان قۋىلۋ جانە جالاقىنىڭ ۋاقىتىلى تولەنبەۋى. كاسىپوداقتار بۇل ماسەلەلەردىڭ ءبارىن شەشۋگە ءتيىستى مەملەكەتتىك ورگانداردى تارتىپ, ەشبىر ازاماتتىڭ ارىزىن بوس قايتارماۋعا تىرىسادى», - دەيدى ابىلعازى قۇسايىنوۆ.
ايتا كەتەيىك, قازاقستاندا جۇمىسشىلاردىڭ قۇقىقتارىنىڭ بۇزىلۋ دەرەكتەرىنىڭ باسىم كوپشىلىگى ۋاقىتىلى جالاقىنىڭ تولەنبەۋى ەكەنى انىق. بۇل اسىرەسە جەكە مەنشىك سەكتورعا قاتىستى. وسى ورايدا كاسىپوداقتار فەدەراتسياسى توراعاسى مۇنداي ماسەلەلەردى ەڭبەك جانە حالىقتى الەۋمەتتىك قورعاۋ مينيسترلىگىمەن جانە باس پروكۋراتۋرامەن بىرلەسىپ شەشەتىنىن ايتتى.
باۋىرجان مۇقانوۆ
"ەگەمەن قازاقستان"
