ادەبي كەش شىمىلدىعىن وزبەكستان جازۋشىلار وداعى باسقارماسىنىڭ توراعاسى, اسا كورنەكتى پروزاشى مۇحامەد الي كىرىسپە سوزبەن اشىپ, توي يەسىنىڭ وزبەك ادەبيەتىن دامىتۋعا قوسقان ەلەۋلى ۇلەسىن قازاق ادەبيەتىن ناسيحاتتاۋ ورايىنداعى تىنىمسىز ەڭبەگىن جوعارى باعالادى. ول قازاقتىڭ كوپتەگەن اقىن-جازۋشىلارىن وزبەك تىلىندە سويلەتۋىمەن دە قىمباتتى.
وزبەكستاننىڭ حالىق جازۋشىسى, مەملەكەتتىك سىيلىقتىڭ ەكى مارتە لاۋرەاتى, قازاقستان پرەزيدەنتىنىڭ رۋحانيات سىيلىعىنىڭ يەگەرى, 88 جاستاعى ابىز قالامگەر ناسىر فازىلوۆ, فيلولوگيا عىلىمدارىنىڭ دوكتورى, پروفەسسور قازاقباي يۋلدوشەۆ, وسى كەشكە قازاقستاننان ات ارىتىپ ارنايى كەلگەن جازۋشى ءسابيت دوسانوۆ, وزبەك اقىنى ميرپۋلات ميرزا جانە باسقالار مەحمون يسلامقۇلوۆتىڭ پروزالىق, درامالىق شىعارمالارى, كول-كوسىر كوركەم اۋدارمالارى ادەبي قازىنانى مولىقتىرعان اسا باعالى ەڭبەك ەكەندىگىن قاداپ ايتتى. ءبىر ايتارلىعى, ول سوڭعى ون شاقتى جىلدا ءوز وداقتارىندا قازاق ادەبيەتى جونىندەگى كەڭەستىڭ جاۋاپتى حاتشىسى قىزمەتىن اتقارۋدا.
قازاق اقىنى قاسىمحان بەگمانوۆ پەن وزبەك اقىنى لولا جۋنيس مەحمون اكاعا ارناعان ولەڭدەرىن وقىدى. ادەبي كەشتىڭ ەكىنشى بولىمىندە جازۋشىنىڭ جارى ديلفۋزا اعىنان جارىلا, اقتارىلا ايتقان تەبىرەنگەن سەزىم مەن تەرەڭ فيلوسوفيالى اقجارما اق تىلەك پەن وزبەكستاننىڭ ونەر جۇلدىزدارى شىرقاعان اسەم اندەر القالى جيىنعا ءار قيىردان جينالعان حالىقتىڭ كوڭىلىن كوككە ورلەتتى. وزبەكستان مەن قازاقستاننىڭ مادەنيەتى مەن ادەبيەتىنىڭ اراسىندا التىن كوپىر بولىپ ايانباي ادال قىزمەت ەتىپ جۇرگەن كورنەكتى جازۋشىنىڭ مەرەيتويى دوستىقتىڭ تۋىن بيىك كوتەرگەن كەرەمەت كوركەم كەش بولدى.
نازار قاسىم
