سونىمەن, ۇلتتىق بايقاۋدىڭ ايماقتىق سىنىندا شيەلى اۋدانىنىڭ تۇرعىندارى − يسلامحانوۆتار اۋلەتى جەڭىمپاز اتاندى. وتاعاسى ءارىبجان يسلامحانوۆ تىل ارداگەرى جانە ەڭبەك ەرى, جارى – نازىم قالمەنوۆا «باتىر انا», «التىن القا» يەگەرى. شاڭىراق قۇرعاندارىنا 59 جىل بولعان وتباسى بۇگىندە 10 بالادان 40 نەمەرە, 16 شوبەرە ءسۇيىپ وتىر.
ال ءبىرىنشى ورىندى جالاعاش اۋدانىنان عانيەۆتەر وتباسى يەلەنسە, ەكىنشى ورىن ارالدىق ايمىرزاەۆتار وتباسىنا بۇيىردى. جۇلدەلى ءۇشىنشى ورىندى سىرداريالىق سۇلتانوۆتار مەن جالاعاشتىق نۇرماعانبەتوۆتەر اۋلەتى قانجىعالارىنا بايلادى. سونىمەن قاتار, جاڭاقورعان اۋدانىنان ارىنوۆتار وتباسى «ۇلاعاتتى وتباسى» نوميناتسياسىمەن, قارماقشىلىق شىمباەۆتار وتباسى «ونەرلى وتباسى» نوميناتسياسىمەن, قىزىلوردا قالاسىنان بالماحانوۆتار وتباسى «قامقورلىق» نوميناتسياسىمەن, سىرداريالىق مياستسوۆتار اۋلەتى «وتباسىلىق ۇيلەسىم» نوميناتسياسىمەن ماراپاتتالدى.
وبلىس اكىمى قىرىمبەك كوشەرباەۆ بايقاۋعا بارلىق قاتىسۋشىلاردى وسىنداي ۇلكەن جەتىستىكتەرىمەن قۇتتىقتادى.
– ەلباسى نۇرسۇلتان نازارباەۆتىڭ باستاماسىمەن قولعا الىنىپ, بۇگىندە ۇلتتىق مارتەبەگە يە بولعان «مەرەيلى وتباسى» بايقاۋى وتباسى قۇندىلىقتارى مەن قازاق ءۇشىن قاشاندا كيەلى سانالاتىن ءبىر شاڭىراق استىندا بەرەكەلى ءومىر ءسۇرۋدىڭ ماڭىزدىلىعىن ناسيحاتتاۋدا ورنى ەرەكشە, تاعىلىمدى شارانىڭ بىرىنە اينالىپ وتىر. ايماعىمىزدا ءتورتىنشى رەت وتكىزىلىپ وتىرعان بۇل مەرەيلى شاراعا قاتىسۋعا نيەت بىلدىرۋشىلەر جىلدان-جىلعا ارتىپ كەلە جاتقانى قۋانتادى. بيىل بايقاۋعا وبلىسىمىزدىڭ بارلىق وڭىرىنەن 337 وتباسى قاتىستى. بۇل وتباسىلاردىڭ بارلىعى دا كەرەمەت, ناعىز جەڭىمپاز وتباسىلار, – دەدى ايماق باسشىسى.
بايقاۋ جەڭىمپازدارى ديپلومدارمەن جانە باعالى سىيلىقتارمەن ماراپاتتالدى.
ەرجان بايتىلەس,
«ەگەمەن قازاقستان»
قىزىلوردا
