ەلباسى ەكشەپ كورسەتكەن «100 ناقتى قادام» ۇلت جوسپارىنىڭ باستاپقى باعىت-باعدارى كاسىبي مەملەكەتتىك اپپارات قۇرۋعا نەگىزدەلگەن. بۇگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ەنشىسىنە اتالعان قۇجاتتىڭ تۇتاستاي 15 قادامى ناقتىلانىپ, مىندەتى ايقىندالعان. سونداي-اق, وسى ماقساتتا قولعا الىنعان جەمقورلىققا قارسى جاڭا زاڭنامالىق رەفورمالار مەن ونىمەن قاتارلاسا قابىلدانعان «مەملەكەتتىك قىزمەت تۋرالى» جاڭا زاڭ مەملەكەتتىك قىزمەتتىڭ جاڭارتىلعان مودەلىنىڭ نەگىزگى شەڭبەرىن شەگەندەپ, مەملەكەتتى باسقارۋدىڭ بارلىق جۇيەسىنىڭ تيىمدىلىگىن كۇشەيتۋ بويىنشا ودان ارعى ءىس-قيمىلداردىڭ رەت, ءتارتىبىن ناقتىلايدى.
مامان تاڭداۋ – ماڭىزدى قادام
ەندىگى ءسوزىمىزدى «100 ناقتى قادام» ۇلت جوسپارىندا كورسەتىلگەن قادامدارعا قاتىستى اتقارىلعان جۇمىستاردى كەزەڭ-كەزەڭىمەن ساباقتاساق. بۇگىندە كاسىبي مەملەكەتتىك اپپارات قۇرۋدى كوزدەگەن قۇجاتتىڭ ءبىرىنشى قادامى بويىنشا, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باستاماشىلىق ەتۋىمەن مەملەكەتتىك قىزمەتتىڭ مانساپتىق ۇلگىسى ەنگىزىلگەن. بۇل ۇلگى مەملەكەتتىك قىزمەتكە قابىلدانۋ ءۇردىسىن جەتىلدىرەدى. ياعني, مەلەكەتتىك قىزمەتتە ەشقانداي ەڭبەك ءوتىلى جوق ۇمىتكەر جالپى كونكۋرستىق نەگىزدە قىزمەتكە قابىلدانۋ ارقىلى ءوزىنىڭ كاسىبي مانسابىن تومەنگى ساتىدان باستايدى دەگەن ءسوز. اعىمداعى جىلدىڭ العاشقى ءتورت ايىندا اتالعان سانات بويىنشا 1 982 ازامات ءوتىنىم بەرگەن بولسا, ونىڭ 1 158-ءى – جەرگىلىكتى اتقارۋشى ورگاننان, ال 845-ءى ورتالىق مەملەكەتتىك ورگانداردان ءتۇسىپتى. ەكىنشى قادامدا اتاپ كورسەتىلگەن تالاپتار بويىنشا, تومەنگى لاۋازىمدارعا كانديداتتاردى رەتتەۋ جانە ودان ءارى لاۋازىمدىق ءوسۋ ىسكەرلىك قاسيەتتەر نەگىزىندە جۇزەگە اسىرىلۋى ءتيىس. ول ءۇشىن ازاماتتىڭ ىسكەرلىك قاسيەتىن باعالاۋدىڭ اۆتوماتتاندىرىلعان جۇيەسى ىسكە قوسىلعان. 2017 جىلدىڭ ءساۋىر ايىن قوسا العاندا بۇل جۇيەدەن 4 821 ادام ءوتىپ, ونىڭ 75,03 پايىزى ىكەرلىك بەلسەندىلىك كورسەتكىشىنىڭ لايىقتى دەڭگەيىنەن جوعارى ناتيجەگە قول جەتكىزىپتى.
سونىمەن قاتار, ءۇشىنشى قادام اياسىندا «مەملەكەتتىك قىزمەت تۋرالى» زاڭ ارقىلى مامان ىرىكتەۋدىڭ ءۇش دەگەيى ەنگىزىلگەنىن دە ايتا كەتەيىك. ونىڭ ەڭ العاشقىسىندا – ۇمىتكەردىڭ زاڭنامالىق بىلىكتىلىگى تەست ارقىلى انىقتالسا, ەكىنشىسىندە – ىسكەرلىك قاسيەتى باعالانادى جانە سوڭعىسى – كاسىبي بىلىكتىلىگىنە قاتىستى اڭگىمەلەسۋدەن ءوتۋ. بۇل جەردە ايتا كەتەرلىگى العاشقى ەكى كەزەڭ اگەنتتىكتىڭ ورتالىقتاندىرىلعان جۇيەسىندە ۇيىمداستىرىلۋى مەملەكەتتىك اپپاراتتى قالىپتاستىرۋدىڭ ءرولىن كۇشەيتۋدە زور مۇمكىندىكتەر بەرگەن. ماسەلەن, جىل باسىنان بەرى زاڭنامالىق تەستىلەۋدىڭ العاشقى كەزەڭىنە 10 800 ۇمىتكەر قاتىسىپ, 4 969 ازامات وڭ قورىتىندىعا يە بولعان. ال اڭگىمەلەسۋدەن ءوتۋ قورىتىندىسى بويىنشا 5 016 ادامنىڭ 4 238-ءى ءتيىستى لاۋازىمعا تاعايىندالعان.
سىناق مەرزىمى ساتىلاپ ءوسۋدىڭ تەتىگى
وسى رەتتە جاڭا قىزمەتكە تاعايىندالعان ماماننىڭ سىناق مەرزىمىنەن ءوتۋ كەزەڭىنە دە بىرقاتار جاڭاشىل تالاپتار ەنگىزىلگەندىگىن ەرەكشە اتاپ وتكەنىمىز ءجون. سەبەبى, مۇنداي باستامانى مەملەكەت باسشىسىنىڭ ءوزى ۇلت جوسپارىنىڭ 4-قادامىندا ناقتى قاداپ ايتقان.
«كاسىبي مەملەكەتتىك اپپارات قالىپتاستىرۋ جولىندا ماماننىڭ ەڭبەك ءوتىلىنىڭ قالىپتاسۋىنا مەملەكەتتىڭ ءوزى مۇددەلىلىك تانىتىپ, زاڭدىق جانە ادامگەرشىلىك تۇرعىسىنان ءادىل ارەكەتتەر ۇيىمداستىرىلۋىن قامتاماسىز ەتۋى ءتيىس» دەگەن پرەزيدەنت ن.نازارباەۆتىڭ بۇل ويى بۇگىندە تولىعىمەن جۇزەگە اسىرىلۋدا. ياعني, ماماننىڭ مەملەكەتتىك قىزمەتتە سىناق مەرزىمىنەن ءوتۋ كەزەڭىن زاماناۋي تالاپقا ساي «3+3» فورمۋلاسىمەن ۇيلەستىرۋ تەتىگى تيىمدىلىگىن كورسەتۋدە. مۇنداعى جاڭاشىلدىقتىڭ ءمانى قانداي دەگەنگە كەلسەك, ول بىلاي ەكەن: قىزمەتكە قابىلدانعان ماماننىڭ سىناق مەرزىمى العاشقى ءۇش ايمەن عانا شەكتەلمەي, وعان قوسىمشا تاعى ءۇش ايلىق سىناق مەرزىمى ۇسىنىلادى. بۇگىنگى تاڭدا وسى فورمۋلا بويىنشا مامانعا بەكىتىلگەن جەتەكشى مەن ونىڭ جۇمىس جوسپارىن جۇيەلەۋگە بەيىمدەلۋ پروتسەسىنەن 2 066 مەملەكەتتىك قىزمەتكەر وتۋدە. ولاردىڭ اراسىندا 17 مەملەكەتتىك قىزمەتكەرگە سىناق مەرزىمى ءۇش ايدان, التى ايعا دەيىن ۇزارتىلعان.
ال ەندى ۇلت جوسپارىنىڭ وسى ءبىر قادامىنىڭ سوڭىن الا جالعاسقان 5-6 قادامىندا مەملەكەتتىك قىزمەتكەردىڭ اتقارعان شارۋاسىنىڭ ناتيجەسىنە قاراپ, باعالاۋ جۇيەسىنىڭ جاڭاشا ۇلگىسىن ەنگىزۋ بولىپ تابىلادى. وسىعان بايلانىستى قىزمەتكەردى باعالاۋدىڭ ادىستەمەسى مەن جەكە جوسپار جاسالعان جانە پرەزيدەنت جارلىعىمەن ساياسي مەملەكەتتىك قىزمەتكەردى باعالاۋدىڭ ۋاكىلدەرى بەكىتىلگەنى دە بەلگىلى. سوندىقتان دا اتتەستاتتاۋ شاراسى اياقتالعاننان كەيىن, كەلەر جىلدان باستاپ باعالاۋ قورىتىندىسى بونۋستىق نەگىزدە شىعارىلاتىن بولادى دەپ جوسپارلانۋدا. وعان قوسا, فاكتورلى-بالدىق ولشەم جۇيەسىمەن جالاقى تولەۋ جوباسى دا بەلسەندى تۇردە قولدانىسقا ەنگىزىلمەك. بۇل باعىت بويىنشا ۇلتتىق ەكونوميكا مينيسترلىگىمەن بىرلەسىپ, وزىق ۇلگىدەگى حالىقارالىق تاجىريبەگە سۇيەنگەن قۇقىق پەن قارجىلىق تولەم جاساۋدىڭ ايماقتىق كوەففيتسيەنتى شارتتارىنىڭ جوباسى جاسالۋدا.
زاماناۋي ءبىلىم قىزمەتتى كاسىبيلەندىرەدى
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى بۇگىنگى تاڭدا ۇلت جوسپارىنىڭ 8-قادامىندا كورسەتىلگەن باعىت بويىنشا اۋقىمدى جۇمىستاردى قولعا العان. زاڭنامادا كورسەتىلگەن ءتيىستى تالاپتارعا سايكەس, بيىل «ب» كورپۋسى ساناتىنداعى مەملەكەتتىڭ قىزمەتكەرلەرگە ارنالعان جەكەشەلەندىرۋگە جاتپايتىن قىزمەتتىك پاتەرمەن قامتاماسىز ەتۋ كوزدەلىپ وتىر. ونىڭ ىشىندە 45-ءى جەرگىلىكتى اتقارۋشى ورگان وكىلدەرىنە تيەسىلى بولسا, 104-ءى ورتالىق مەملەكەتتىك ورگاندارىنىڭ ەنشىسىندە. سونىمەن قاتار, توعىزىنشى قادامعا وراي, ءۇش جىلدا ءبىر رەت مامانداردىڭ كاسىبي ءبىلىمىن جەتىلدىرىپ, تاجىريبەسىن شىڭداۋ تەتىگى دە دۇرىس جولعا قويىلا باستادى. بۇل رەتتە پرەزيدەنت جانىنداعى مەملەكەتتىك باسقارۋ اكادەمياسىنىڭ وقىتۋ باعدارلامالارى زاماناۋي تالاپقا ساي جاڭارتىلعانىن دا ايتا كەتۋ كەرەك. ال مۇنداي اۋقىمدى ىسكە سينگاپۋر مەن اقش, يتاليا, وڭتۇستىك كورەيا سىندى وزىق ۇلگىدەگى ەلدەردىڭ حالىقارالىق دەڭگەيدەگى جەتەكشى ساراپشىلارى قاتىستىرىلىپ, نازارباەۆ ۋنيۆەرسيتەتىنىڭ تاجىريبەسى بەلسەندى قولدانىلعانى ءسوزىمىزدىڭ سالماعىن ارتتىرا تۇسەدى. سونىڭ ناتيجەسىندە سيتۋاتسيالىق جاعدايعا بايلانىستى تۋىنداعان ءتۇيىندى تارقاتۋدىڭ تاجىريبەلىك ءبىلىم بەرۋ جوباسى وندىرىسكە ەنگىزىلۋدە. وقۋ كۋرسىنداعى مۇنداي جاڭاشىلدىق مەملەكەتتىك قىزمەتتەگى كاسىپتىك سالانىڭ ىشكى ءيىرىمىنىڭ قاجەتتىلىگىنە وراي, تىڭداۋشىلاردىڭ جۇمىس پروتسەسىندە كاسىبي بىلىكتىلىگى مەن ادەپتى ارەكەتتەرىن ۇشتاستىرۋىنا زور مۇمكىندىكتەر بەرەدى. سول سەبەپتەن دە جىل باسىنان بەرى 5 203 ءتۇرلى ساناتتاعى مەملەكەتتىك قىزمەتكەر بىلىكتىلىگىن جوعارىلاتۋ كۋرسىنان وتكەن. دەمەك, ۋاقىت وتكەن سايىن مەملەكەتتىك قىزمەت كورسەتۋ تەتىكتەرىنىڭ تىزگىنىن ۇستاعان ماماندار زامان تالابىنا ساي بەيىمدەلە وتىرىپ, ءبىلىم-بىلىكتەرىن شىڭداپ وتىر دەگەن ءسوز.
مەريتوكراتيا نەگىزدەرىنە سۇيەنگەن مانساپتىق ءوسۋ
مەملەكەت باسشىسى ن.نازارباەۆ ەل بولاشاعى ايقىندالعان القالى جيىنداردا مەملەكەتتىك قىزمەتتە كوماندالىق اۋىس-ءتۇيىس جاساۋدىڭ تيىمسىزدىگىن تالاي رەت سىنعا العانى بەلگىلى. وعان قارسى امال جاساۋدىڭ تەتىكتەرى ۇلت جوسپارىنىڭ 10-قادامىندا ناقتى ايتىلعان. بۇل تاپسىرمانى جۇزەگە اسىرۋ اياسىندا قىزمەتكەردىڭ مانساپتىق ءوسۋ جولى تومەنگى ساتىدان جوعارىلاي وتىرىپ, ىشكى كونكۋرستىق ءتارتىپ نەگىزدەرىن ساقتاۋمەن تىكەلەي بايلانىستى جۇرگىزىلەتىندىگىنە ءجىتى كوڭىل بولىنەدى. ياعني, بۇل جەردە قانداي دا ءبىر بوس ورىن پايدا بولعان جاعدايدا, وعان ۇمىتكەردى سىرتتان ەمەس, سول كەڭسەنىڭ تومەنگى ساتىداعى قىزمەتكەرىن ۇمىتكەرلىككە ءبىرىنشى ۇسىنۋ باسىمدىققا الىنادى. مىنە, بۇل مەريتوكراتيا نەگىزدەرىنە سۇيەنگەن مانساپتىق وسۋگە جەتەلەيدى. وسىنداي قادام جاسالعاندا كەڭسەدەگى قىزمەتتىك اۋرا جاقسارىپ, تومەنگى ساتىداعى مامانداردىڭ وزىنە سەنىمى پايدا بولادى ءارى قىزمەتكەرلەردىڭ وندىرىستىك الەۋەتى ارتا تۇسەدى. بۇل الەمدىك تاجىريبەدە قولدانىستا بار وزىق ۇلگىنىڭ ءبىرى. مەملەكەتتىك قىزمەتتى زامانعا ساي جاڭعىرتۋدىڭ جاڭاشىل ادىستەرى ءبىزدىڭ ەلدە دە كەڭىنەن قولدانىلىپ كەلەدى. قىزمەتكەردىڭ الەۋەتىن مەيلىنشە ءتيىمدى پايدالانۋ مەن مانساپتىق وسۋىنە قولايلى جاعداي جاساۋ ماقساتىندا مەملەكەتتىك ورگانداردا ىشكى كونكۋرستار ۇيىمداستىرۋ تەتىگى ىسكە قوسىلدى. ماسەلەن, وسىنداي اۋقىمدى شارا نەگىزىندە جاريالانعان ىشكى كونكۋرستا 2 912 بوس لاۋازىمدىق ورىنعا تومەنگى ساتىداعى 1 143 قىزمەتكەر تاعايىندالعان. مۇنىڭ پايىزدىق كورسەتكىشى – 57,3. ياعني, 655 قىزمەتكەر مەريتوكراتيا نەگىزدەرىنە سۇيەنە وتىرىپ, مانساپتىق وسۋگە قول جەتكىزدى دەگەن ءسوز.
باسەكەگە قابىلەتتىلىك – بىلىكتىلىكتى تالاپ ەتەدى
مەملەكەتتىك قىزمەتتى مەيلىنشە جەتىلدىرە ءتۇسۋ ماقساتىندا شەت ەلدەردەگى «مەنمىن» دەگەن ماقتاۋلى مەنەدجەرلەردى شاقىرۋ مەن جالداۋ ماسەلەسىنىڭ جاي-كۇيى ۇلت جوسپارىنىڭ ون ءبىرىنشى قادامىندا ناقتىلانعان. ال وندا سوڭعى شەشىم كادرلىق ساياسات جونىندەگى ۇلتتىق كوميسسيانىڭ ماقۇلداۋىمەن جۇزەگە اسىرىلادى. سوندىقتان دا جەكە سەكتورلاردا ءساتتى قىزمەت ەتىپ جۇرگەن جانە حالىقارالىق ۇيىمداردىڭ بەلسەندى مامانى رەتىندە تانىلعان قازاقستان ازاماتتارىن جالپى كونكۋرس ارقىلى مەملەكەتتىك قىزمەتكە تارتۋدىڭ قۇقىقتىق نەگىزدەرى قۇرىلدى. اتالعان باعىتتا جىل باسىنان بەرى 251 ادام جەكە سەكتوردان مەملەكەتتىك قىزمەتكە قابىلدانعان. بۇل مەملەكەتتىك قىزمەتتەگى كارەرالىق مودەلدىڭ باسەكەگە قابىلەتتىگىن, اشىقتىعى مەن تەڭگەرىمدىلىكتىڭ ساقتالۋىن قامتاماسىز ەتتى. سونداي-اق, ۇلت جوسپارىنداعى 12-قادامعا سايكەس, ەلباسى جارلىعىمەن مەملەكەتتىڭ قىزمەتكەرلەردىڭ ءجۇرىس-تۇرىسى مەن مىنەز-قۇلقىندا جاعىمسىز ارەكەتتەردەن اۋلاق بولۋعا باۋليتىن ادەپ كودەكسى قابىلدانعانى بەلگىلى. وسى قۇجات اياسىندا بارلىق ورتالىق مەملەكەتتىك اپپاراتتار مەن وبلىس اكىمدىكتەرىندە ادەپ جونىندەگى ارنايى ۋاكىلدەر تاعايىندالدى. ادەپ كودەكسىنىڭ باستى قۇندىلىقتارى سول – قارىم-قاتىناستا جوعارى مادەنيەتتىلىك كورسەتۋگە ۇندەۋ, ادەپكە قايشى مىنەز-ق ۇلىقتى ەسكەرتۋ, سونىمەن قاتار, سىبايلاستىققا توزىمسىزدىكپەن قاراۋ بولىپ تابىلادى. وعان قايشى ارەكەت ەتكەندەرگە اگەنتتىك پەن مەملەكەتتىك باسقارۋ اكادەمياسى جانە ادەپ جونىندەگى ۋاكىل تاراپىنان ءتيىستى دەڭگەيدە شارا قولدانىلادى.
جىل باسىنان بەرى ادەپ جونىندەگى ۋاكىلدەرگە 247 مەملەكەتتىك قىزمەتكەر مەن ازامات شاعىپ ايتىپ, كەڭەس العان. ونىڭ 37-ءى ورتالىق مەملەكەتتىك ورگانداردان تۇسكەن بولسا, 210-ى جەرگىلىكتى اتقارۋشى ورگانداردان تىركەلگەن. سول سەبەپتەن دە اتالعان باعىتتا جۇمىستاردى بەلسەندى قولعا الىنۋدا. بۇگىنگە دەيىن 367 سەمينار مەن دوڭگەلەك ۇستەل ۇيىمداستىرىلىپ, ادەپ كودەكسى مەن سىبايلاس جەمقورلىققا قارسى ءىس-قيمىلعا قاتىستى زاڭنامالار تۇسىندىرىلگەن. ورتالىق مەملەكەتتىك ورگانداردا 218, جەرگىلىكتى اتقارۋشى ورگانداردا 149 ءتۇرلى شارالار وتكىزىلىپ, 357 تەلە سيۋجەتتەر مەن ماتەريالدار باق بەتتەرىندە جاريالانعان.
تەست – تالاپقا, ال زاڭ – زامانعا ساي
«100 ناقتى قادام» ۇلت جوسپارىنىڭ 13-قادامىنا وراي, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اتسالىسۋىمەن «سىباي̆لاس جەمقورلىققا قارسى ءىس-قيمىل تۋرالى» زاڭ جوباسى قابىلدانىپ, كۆازيمەملەكەتتىك سەكتورلار اراسىندا كەڭىنەن تاراتىلعانى ءمالىم. سونىمەن قاتار, اگەنتتىك جانىنان سىبايلاس جەمقورلىققا قارسى ساياسات دەپارتامەنتى قۇرىلىپ, بۇل ۇيىم: سىبايلاس جەمقورلىققا قارسى ساراپتاۋ; سىبايلاستىق شىعىندارىن تالداۋ, سىبايلاس جەمقورلىققا قارسى كۇرەس مادەنيەتىن قالىپتاستىرۋ سىندى باعىتتاردا جۇمىستار جۇرگىزۋدە.
سونداي-اق, 14-قادامدا كورسەتىلگەن باعىت بويىنشا «قازاقستان رەسپۋبليكاسىنىڭ مەملەكەتتىك قىزمەت تۋرالى» زاڭى قۇقىق قورعاۋ ورگاندارى قىزمەتكەرلەرىنىڭ اراسىندا كەڭىنەن تاراتىلىپ, ونىڭ ىشكى يىرىمدەرى تالداپ, تارازىلاندى. سەبەبى, زاڭعا ساي بۇدان بىلاي قۇقىق قورعاۋ ورگاندارىندا قىزمەت ەتۋگە ۇمىتكەرلەر مەملەكەتتىك قىزمەتكەرلەر سەكىلدى اگەنتتىك ۇيىمداستىرعان زاڭنامالىق ءبىلىمى مەن ىسكەرلىك قاسيەتىن ايقىندايتىن تەستىلەۋدەن وتۋگە مىندەتتى. بۇل جەردە اتالعان باعىت بويىنشا جىل باسىنان بەرى 6 873 ازامات تىركەلىپ, ونىڭ 2 840 ۇمىتكەرى تەستىلەۋدىڭ وڭ قورىتىندىسىنا يە بولعانىن ايتا كەتكەن ءجون.
بيىل «ب» كورپۋسى ساناتىنداعى مەملەكەتتىك قىزمەتكەرلەر مەملەكەت باسشىسىنىڭ جارلىعى نەگىزىندە اتتەستاتتاۋدان ءوتتى. ۇلت جوسپارىنداعى 15-قادامعا وراي, 1 اقپاننان بەرى مۇنداي تەستىلەۋدى 66 580 ادام تاپسىرىپ, ىسكەرلىك قاسيەتىنىڭ پايىزدىق كورسەتكىشىن ايقىنداعان. ال 15 ناۋرىزدا ءوز مارەسىنە جەتكەن كوميسسيا جۇمىسىنىڭ جالپى قورىتىندىسىندا ولاردىڭ 28 پايىزى «وتە جاقسى», 68,2 پايىزى ء«تيىمدى», 3,1 پايىزى «قاناعاتتانارلىق» جانە 0,1 پايىزى ەڭ تومەنگى كورسەتكىشتەرگە يە بولعان.
ءسوز سوڭىندا نازارعا ءىلىنۋى ءتيىس سوڭعى دەرەگىمىز, جوعارىدا اتالعان ساناتتىڭ جەتەكشىلىك دەڭگەيىندەگى جوعارى اتتەستاتتاۋ كوميسسيانىڭ اڭگىمەلەسۋىنەن 1 139 مەملەكەتتىك قىزمەتكەر وتكەن بولسا, ونىڭ 973-ءى تاعايىندالعان لاۋازىمعا لايىقتى دەپ تانىلعان. 130 قىزمەتكەردىڭ لاۋازىمىن جوعارىلاتۋ جونىندە, ال 36 ماماننىڭ قىزمەتىن تومەندەتۋ تۋرالى شەشىم قابىلدانعان. سونداي-اق, ەلىمىز بويىنشا «ب» كورپۋسىنىڭ وكىلدەرى ەكىنشى جانە ءۇشىنشى دەڭگەيلى ساناتتاعى مەملەكەتتىك قىزمەتكەرلەردىڭ بارلىعى دا جوعارى اتتەستاتتاۋ كوميسسيانىڭ الدىنان ءوتتى جانە مۇنداي شارا ءالى دە جالعاسىن تابۋدا.
نۇرلىبەك دوسىباي,
«ەگەمەن قازاقستان»
