باسقوسۋ قۋعىن-سۇرگىن جانە اشارشىلىق قۇرباندارىن ءبىر مينۋت ۇنسىزدىكپەن ەسكە الۋمەن باستالدى. القالى جيىن بارىسىندا عالىمدار ەلباسىنىڭ رۋحاني جاڭعىرۋعا ارنالعان ماقالاسىن جۇزەگە اسىرۋدىڭ عىلىمي تەكتىكتەرىن تالقىلادى. ولاردىڭ ويىنشا, اشىق قوعام قۇرىپ, ۇلتتىق سانانى دۇرىس قالىپتاستىرۋ ءۇشىن گۋمانيتارلىق سالادا ناقتى ىستەردى جۇيەلى تۇردە جوسپارلاۋ كەرەك. سونىمەن قاتار, ءوندىرىستى عىلىمعا نەگىزدەۋ ماقساتىندا زەرتتەۋ ينستيتۋتتارىنا بىلىكتى كادرلار تارتۋ ماسەلەسىنىڭ دە نازاردان تىس قالماۋى باسا ايتىلدى. سەسسيا قورىتىندىسىنا سايكەس بيىل ۇلتتىق عىلىم اكادەمياسىنىڭ قۇرامى 30 اكادەميكپەن تولىعىپ, 29 عالىم كوررەسپوندەنت-مۇشەلىككە قابىلداندى. قۇرامعا جاڭا ەنگەن عالىمدار فيزيكا, ماتەماتيكا, حيميا جانە تەحنولوگيالار, بيولوگيا جانە مەديتسينا, قوعامدىق جانە گۋمانيتارلىق عىلىمدار, سونداي-اق, اگرارلىق عىلىمدار بولىمشەلەرى بويىنشا وتاندىق عىلىمنىڭ دامۋى جولىندا قىزمەت ەتەتىن بولادى.
– ءبىزدىڭ عالىمدارىمىز قوعامدىق عىلىمداردى دامىتادى. گۋمانيتارلىق عىلىمداردىڭ قانات جايۋىنا قىزمەت ەتەدى. ءوزىمىزدىڭ ءتول تاريحىمىزدى زەرتتەيدى. كوپتەگەن بەلگىسىز بولىپ جاتقان جاعدايلاردى اشىپ دالەلدەپ جاتىر. عىلىمسىز قوعام دا, مەملەكەت تە دامىمايدى. ول – اكسيوما. كاسىپكەرلەرىمىز كوپ جاعدايدا يننوۆاتسيانى ايتادى دا, عىلىمدى كوپ ايتپايدى. عىلىم بولماسا ەشقانداي يننوۆاتسيا دامي المايدى. وسىنى ءاردايىم قاپەرىمىزدەن شىعارماعانىمىز ابزال. وتكەن جىلعى جالپى جينالىستان كەيىنگى ءبىر جىل كولەمىندە ۇعا تورالقاسىنىڭ اپپاراتى كوپتەگەن جۇمىستار اتقاردى. ۇلتتىق عىلىم اكادەمياسى – ەلىمىزدەگى جالعىز كلاسسيكالىق امبەباپ اكادەميا, بارلىق اتاقتى, ماڭدايالدى, دۇنيە جۇزىنە بەلگىلى عالىمداردىڭ جيىنتىق اكادەمياسى. سوندىقتان ءبىزدىڭ اكادەميانىڭ كۇردەلى ماسەلەلەرى ەلباسىنىڭ تىكەلەي نازارىندا بولىپ كەلەدى. وتكەن جىلداردىڭ ناتيجەلەرى ۇعا-نىڭ ەڭ تاڭداۋلى عىلىمي ۇجىم ەكەنىن كورسەتتى. مايتالمان اكادەميك-عالىمدارىمىزدىڭ قاتارى تالانتتى جاس عالىمدارمەن – ۇعا كوررەسپوندەنت-مۇشەلەرىمەن تولىقتى. ال قازىر ءبىزدىڭ اكادەميا الەمدەگى مۇشەلەرى ەڭ جاس (ورتا جاسى – 65) كلاسسيكالىق اكادەميا بولىپ تۇر. ء«بىز ء«بىلىم – عىلىم – يننوۆاتسيالار» ۇشتىگى بيلەگەن پوستيندۋستريالىق الەمگە قاراي جىلجىپ كەلەمىز» دەپ ەلباسىمىز ايتقانداي, ەلدىگىمىزدىڭ جارقىن بولاشاعى ءبىلىم مەن عىلىم, سول ارقىلى اۋقىمدى يننوۆاتسيالارعا جول اشىلىپ, ءبىزدىڭ ساۋلەتتى بولاشاعىمىزدىڭ ايقىن كورىنىسىنە اينالماق, – دەيدى قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ.
شارا بارىسىندا وتاندىق عىلىمدى دامىتۋدىڭ تەتىكتەرى, الداعى ۋاقىتتا اتقارىلاتىن شارۋالاردىڭ تىزبەگى جايلى جوسپار قۇرىلىپ, ۇسىنىستار ورتاعا تاستالدى. بۇگىنگى تاڭدا ۇلتتىق عىلىم اكادەمياسىندا 6 باعىتتىق بولىمشەلەر مەن 10 وبلىستىق فيليالدار جۇمىس ىستەۋدە.
ارمان وكتيابر,
«ەگەمەن قازاقستان»
Aلماتى
