وسىعان وراي شىمكەنتتىك تالانتتى ءانشى ماقسات ايتجانوۆ «ەكسپو» ءانىن جازعان ەكەن. قازاقتىڭ جەزتاڭداي انشىلەرىنىڭ ءبىرى روزا رىمباەۆا ايرىقشا قادىرلەيتىن, ونەرىن باعالاپ, تۋعان ىنىسىندەي جاقىن تارتاتىن ماقسات ايتجانوۆ «بۇل ءان جۇرەك قالاۋىمەن جازىلدى», دەيدى. «ەلىمىزدىڭ كەشەگى تاريحىن جاقسى بىلەمىز. ءحىح عاسىردىڭ سوڭىندا 8 ميلليونعا جەتكەن قازاق ءارتۇرلى زۇلماتتىڭ, قولدان ۇيىمداستىرىلعان اشتىق, رەپرەسسيا سالدارىنان جۋساپ قالدى. حالىقتىڭ جارتىسى قىرعىن تاۋىپ, 1 ميلليونعا جۋىعى باس ساۋعالاپ شەت ەلگە ءوتتى. وسىلاي رۋحى جانشىلعان ەلدىڭ ەڭسەسىن كوتەرۋ ءۇشىن ەڭسەلى ىستەر كەرەك. مەملەكەتىمىزدىڭ بەدەلىمەن الىنعان ەكسپو-2017 حالىقارالىق كورمەسى – ەلىمىزدىڭ, ەلىم دەگەن ەلباسىمىزدىڭ جەڭىسى. وسىنىڭ ءبارى جىگەرلەندىرىپ, وسىناۋ ءاندى تۋدىردى». بۇل ءان وبلىستا وتكەن مادەنيەت قىزمەتكەرلەرىنىڭ كۇنىندە 2017 ادامدىق حوردىڭ ايتۋىمەن ورىندالدى.
ەندى وسى ءان ەكسپو-2017 كورمەسىندە وڭتۇستىك قازاقستان وبلىسىنىڭ كۇندەرى وتكەندە ورىندالماق. وعان وبلىستان 610 ادامنان قۇرالعان 17 شىعارماشىلىق توپ قاتىسادى.
«مادەني شارا بارىسىندا «قازىنالى وڭتۇستىك» قولونەر شەبەرلەرى مەن سۋرەتشىلەردىڭ كورمەسى, كونتسەرتتىك باعدارلامالار, وڭتۇستىكتە تۇسىرىلگەن انيماتسيالىق فيلمدەر مەن كوركەم فيلمدەر كورسەتىلەدى. سونداي-اق, ج.شانين اتىنداعى وبلىستىق اكادەميالىق قازاق دراما جانە ورىس دراما, قۋىرشاق, ءازىل-سىقاق جانە ساتيرا تەاترلارى مەن وڭتۇستىك-تسيركتىڭ قويىلىمدارى ءتورت تاراپتان كەلگەن جۇرتشىلىقتىڭ نازارىنا ۇسىنىلادى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
