بۇل سپورتتىڭ نەگىزىن 1993 جىلى اقش-تا دجيۋ-دجيتسۋ شەبەرى روريون گرەيسي مەن ارت دەيۆي ەسىمدى بيزنەسمەن قالاعان. UFC 2006 جىلدان بەرى جانكۇيەرلەردىڭ قىزىعۋى بويىنشا تەلەۆيزيالىق ساتىلىمدا كاسىپقوي بوكسقا باقتالاس بولىپ كەلەدى. بۇل سپورتقا كەزىندە اقش-تىڭ ايگىلى سەناتورى دجون ماككەين قارسى شىعىپ, كەيىننەن ءوزىنىڭ وڭ باعاسىن بەرگەن.
UFC-ءدىڭ قازىرگى باسشىسى – دەينا ۋايت. باس كەڭسەسى – اقش-تىڭ لوس-اندجەلەس قالاسىندا ورنالاسقان.
UFC – ەرەجەسىز جەكپە-جەك ۇيىمى. ال «فايتەر» – شارشى الاڭدا جۇدىرىقتاسۋشى. ەرەجەسىز دەپ اتالعانىمەن وزگە سپورت سياقتى وزىندىك ەرەجەلەرى, قولدانۋعا بولمايتىن ءىس-ارەكەتتەرى دە بار. مىسالى, شارشى الاڭدا سپورتشىلار ءبىر-ءبىرىن تىستەۋگە, كوزدەن شۇقۋعا, باسپەن سوعۋعا, تىرناۋعا, شاشتان تارتۋعا, جەلكەدەن, ومىرتقادان جانە كىندىكتەن تومەن سوققى جاساۋعا تىيىم سالىنعان. سايىس قارسىلاستاردىڭ بەرىلۋىمەن جانە جاتتىقتىرۋشىلاردىڭ تاراپىنان الاڭعا سۇلگى لاقتىرۋىمەن توقتاتىلادى.
سپورتشىلار چەمپيوندىق بەلبەۋگە تالاسۋ كەزىندە بەس مينۋتتان تۇراتىن بەس راۋند, تيتۋلدى كەزدەسۋلەردە ءۇش راۋند جۇدىرىقتاسادى.
«فايتەرلەردىڭ» بۇعان قىزىعىپ, ۇمتىلۋ سەبەبى الەم بويىنشا ەرەجەسىز جەكپە-جەكتەگى ءنومىر ءبىرىنشى تۇجىرىم. سوعان جەتۋ جولىندا سپورتشىلار بارىن سالادى. بۇنى تانىمال بولۋ, اقشا تابۋدىڭ كوزى رەتىندە نەمەسە ەلدىڭ اتاعىن شىعارۋ رەتىندە قاراستىرادى.
UFC تۇجىرىمىندا قالاي جۇدىرىقتاسۋعا بولاتىنىن ءبىلۋ ءۇشىن «Astana Fighters» كلۋبىنىڭ جەكپە-جەك شەبەرى, پانكراتيوننان الەم چەمپيونى, جۋىردا استانا قالاسىندا وتكەن Fight Nights Global 65 ءتۋرنيرىنىڭ جەڭىمپازى جاسۇلان اكىمجاننان سۇراعان ەدىك.
«UFC-گە شىعۋ ءۇشىن سپورتشى تانىمال, رەيتينگى جوعارى جانە جانكۇيەرلەرى كوپ بولۋى كەرەك. سونىمەن قاتار, WSOF, Bellator, ACB سياقتى رەيتينگى جوعارى تۇجىرىمدارمەن كەلىسىمشارتقا وتىرىپ, سەگىزبۇرىش الاڭىندا ءوزىن جاقسى قىرىنان كورسەتسە نەمەسە چەمپيون اتانسا وتۋگە بولادى. قازىر تانىمال پروموۋتەرلىكتە قازاقستاندىق جىگىتتەر دە جوق ەمەس. اتاپ ايتار بولسام, ACB تۇجىرىمىندا ارمان وسپانوۆ جانە One Championship-تە قايرات احمەتوۆ بار».
ارمان وسپانوۆ, قايرات احمەتوۆتەن وزگە الەمدىك دودالاردا باق سىناپ جۇرگەن ەرمەك تلاۋوۆ, قۋات حاميتوۆ, ەرجان ەستانوۆ, اسۋلان توقتارباەۆ, ءادىل بورانباەۆ, ەرلان تىلەۋىمبەتوۆ سىندى قازاقستاندىق تانىمال سپورتشىلار دا سىنعا ءتۇسىپ ءجۇر.
سپورتشىدان بولەك, پروموۋتەرمەن ءتىل تابىسىپ, دۇرىس كەلىسىم جاسايتىن – مەنەدجەر. ول – قارسىلاس تابۋ, ۇيىمدارمەن كەلىسسوز جۇرگىزۋ سياقتى قىزمەتتى اتقارادى. بارلىق ماسەلە سول مەنەدجەر ارقىلى شەشىلەدى. دۇنيە جۇزىندە ءالي ابدۋل ءازيز, ميحايل ليۋبيموۆ, ريزۆان ماگومەدوۆ سىندى تانىمال ءارى بەدەلدى مەنەدجەرلەر بار.
بەلگىلى قازاقستاندىق مما «فايتەرى» ەرجان ەستانوۆ Prosports.kz تىلشىسىنە بەرگەن سۇحباتىندا «بارىنەن دە UFC-گە ارمان جاقىن بولعان. ەگەر وسپانوۆ اقش-تا ءتورت-بەس كەزدەسۋ وتكىزىپ, WSOF چەمپيونى اتانسا, ونى UFC-گە الار ەدى. قازىرگى تاڭدا, الەمنىڭ ەڭ مىقتى ۇيىمىمەن كەلىسىمشارتقا وتىرۋعا جاقىن قازاق سپورتشىسىن كەسىپ اتاي المايمىن» دەگەن ەدى.
ەستەرىڭىزگە سالا كەتسەك, ارمان وسپانوۆ دوپينگ داۋىنا بايلانىستى ەرەجەسىز جەكپە-جەكتەن رەيتينگتە ءۇشىنشى ورىندا تۇرعان امەريكالىق WSOF ۇيىمىمەن دەبيۋتتىك كەزدەسۋىن وتكىزبەي جاتىپ كەلىسىمشارتىن بۇزۋعا ءماجبۇر بولعان ەدى. ودان كەيىن ءتورتىنشى ورىندا جايعاسقان ACB ۇيىمىمەن كەلىسىمشارتقا قول قويدى.
قازاقستان مما فەدەراتسياسىنىڭ پرەزيدەنتى اناتولي كيم ءبىر سوزىندە «بىزدە تالانتتى سپورتشىلار وتە كوپ, بىراق ءبىز UFC-گە شىعۋعا اسىقپايمىز. وعان شىعۋ وڭاي, بىراق دارەجەڭدى ۇستاپ تۇرۋ قيىن. تۇسىنەسىزدەر مە, ءبىز وعان شىعۋدىڭ جولىن تاپساق تا, سپورتشىنىڭ دەڭگەيى سايكەس كەلمەي جاتسا, وندا ءبىر-ەكى جەكپە-جەكتەن كەيىن شەگىنۋگە تۋرا كەلەدى. ءبىز مۇنى قالامايمىز», دەگەن ەدى.
ايتا كەتەتىن جايت, بۇعان دەيىن UFC-دە قىتايلىق قانداسىمىز جۇمابەك تۇرسىن ءبىر مارتە جۇدىرىقتاسقان. وكىنىشكە قاراي, سول شايقاستا امەريكا «فايتەرى» ماركۋس بريمەدجدەن جەڭىلىپ قالعان بولاتىن.
ازامات ماۋلەن ۇلى
