مالىمەتىنشە, كەندىلەر شاھارىندا حالىقتىڭ ورتاشا ءومىر ءسۇرۋ ۇزاقتىعى 67 جاستان 70 جاسقا جوعارىلاعان. سايكەسىنشە, نارەستەلەر ءولىم-ءجىتىم كورسەتكىشى 1000 بالاعا شاققاندا 17,1%-دان 4,6%-عا تومەندەسە, جالپى ءولىم-ءجىتىم كورسەتكىشى 1000 ادامعا شاققاندا 7,1%-دان 1,6 %-عا ازايعان. سونداي-اق, تۋبەركۋلەز دەرتىمەن سىرقاتتانۋشىلىق 1000 ادامعا شاققاندا 85%-دان 27%-گە تومەندەپ, قان اينالىم جۇيەسىنەن بولعان ءولىم-ءجىتىم كورسەتكىشى 1000 ادامعا شاققاندا 137,2%-دان 10,7%-گە, ونكولوگيالىق اۋرۋدان بولعان ءولىم-ءجىتىم كورسەتكىشى 1000 ادامعا شاققاندا 35,8%-دان 15%-عا كەمىپتى.
قالا اكىمى, سونىمەن بىرگە, شاھاردىڭ الەۋمەتتىك-ەكونوميكالىق دامۋىنا اسەر ەتەر ينۆەستيتسيا, تاۋ-كەن ءوندىرىسى, ونەركاسىپ, اۋىل شارۋاشىلىعى, كوممۋنالدى شارۋاشىلىق سىندى بىرقاتار سالالارداعى جەتىستىكتەردى بايان ەتتى.
«كەنتاۋداعى يندۋستريالدى ايماقتا ينفراقۇرىلىم جۇيەلەرى تولىعىمەن جۇرگىزىلىپ, جالپى قۇنى 1998,5 ملن.تەڭگەگە 5 جوبا ورنالاستىرىلدى. ونىڭ بۇگىنگە دەيىن ەكەۋى ىسكە قوسىلسا, قالعان 3 جوبا - «اسفالت-بەتون قوسپاسىن وڭدەۋ زاۋىت قۇرىلىسى», «كيسلورود شىعارۋدى ۇيىمداستىرۋ» جوباسى جانە «مەديتسينالىق بۇيىمدار شىعارۋ» جوباسى جىل سوڭىنا دەيىن ىسكە قوسىلاتىن بولادى», - دەدى شاھار باسشىسى.
ءا.ماقۇلباەۆ سونداي-اق, كەنتاۋ حالقىنىڭ اۋىز سۋمەن قامتىلىپ, تابيعي گازعا قول جەتكىزۋ جولىندا اتقارىلىپ جاتقان بىرقاتار جۇمىستاردى ايتىپ بەردى. كورىكتەندىرۋ, كوگالداندىرۋ جانە اباتتاندىرۋ جۇمىستارى دا بارشىلىق. جالپى, قالا بويىنشا 25,9 گا جەرگە 19150 كوشەتتەر وتىرعىزىلسا, اعىمداعى جىلى س.قوجانوۆ ساياباعىنا كۇردەلى جوندەۋ, قوناەۆ, اباي داڭعىلدارى, كالەنوۆ كوشەسى جانە «جاستار ورتالىعى» اللەيالارىنىڭ اباتتاندىرۋ جۇمىستارى باستالدى.
