"بۇل شارانىڭ ماڭىزى جوعارى. وتكەنگە ءبىر ءسات كوز جۇگىرتەيىكشى. 19-عاسىردا كوكشەتاۋ جەرىندە اسىل زاتتاردىڭ ءبارى جەر بەتىندە جاتقان ەكەن. وسىنىڭ قۇنىن بىلگەن اعىلشىندار كەلىپ تەرىپ اكەتكەن. ءبىزدىڭ سال-سەرىلەرىمىزدىڭ ءۇستى التىنعا مالىنۋى جەرىمىزدىڭ باي ەكەنىنىڭ ءبىر بەلگىسى دەپ بىلۋگە بولادى", دەدى عالىم سەرىك نەگيموۆ.
شاراعا جينالعان قوناقتار ءۇش قاباتقا ورنالاسقان كورمەلەرمەن تانىستى. ءبىرىنشى قاباتتاعى " ۇلى دالا جاۋھارلارى" اتتى بولىمىندە ۇلى دالا كوشپەلىلەر وركەنيەتىنىڭ رۋxاني جانە ەستەتيكالىق مۇراسى, ياعني كۇمىستەن جاسالعان قازاقتىڭ زەرگەرلىك اشەكەيلەرى, تۇرمىس زاتتارى, ات ابزەلدەرى سەكىلدى جادىگەرلەر كورەرمەن نازارىنا ۇسىنىلدى.
ەكىنشى قاباتتاعى بولىم "كۇمىستىڭ سۇلۋ سىڭعىرى" دەپ اتالدى.
ءۇشىنشى قاباتتاعى "الەم xالىقتارىنىڭ مۋزىكالىق اسپاپتارى" اتتى بولىمىندە جينالعان قاۋىمعا ءتۇرلى ەلدەر مەن ءداۋىردىڭ مۋزىكالىق اسپاپتار توپتاماسى تانىستىرىلدى. مۇندا ورتا ازيا xالىقتارىنىڭ شەكتى ىسقىش اسپابى "گيدجاك", ەكى شەكتى شەرتپەلى مۋزىكالىق اسپابى "دۋتار", قىرعىز xالقىنىڭ ءۇش شەكتى "كومۋز", ۇيعىر xالقىنىڭ "ساتار" سەكىلدى اسپاپتارى كورەرمەن نازارىنا ۇسىنىلدى.
ايتا كەتەيىك, بىرەر اي بۇرىن ءدال وسى عيماراتتىڭ ءتورتىنشى قاباتىندا, ياعني كۇمبەزدى زالدا قر ۇلتتىق وليمپيادا كوميتەتىنىڭ باسشىلارى مەن مۇراعاتى قازاقستاننىڭ سپورتتاعى جەتىستىكتەرىن كورسەتەتىن "وليمپيادالىق قوزعالىس" كورمەسى اشىلعان بولاتىن.
"بولاشاقتىڭ ەنەرگياسىن قارسى الامىز!" قور كورمەلەرىنىڭ توپتاماسى 2017 جىلدىڭ 31 تامىزىنا دەيىن جالعاسادى.
ايان ءابدۋالي,
"ەگەمەن قازاقستان"
