كورەيا رەسپۋبليكاسىنىڭ ەلىمىزدەگى توتەنشە جانە وكىلەتتى ەلشىسى كيم دە-سيك قوس تاراپ اراسىندا ديپلوماتيالىق ىنتىماقتاستىق ورناعان 25 جىلدىڭ ىشىندە ءوزارا بايلانىس تەتىگى نىعايىپ كەلە جاتقانىن جەتكىزدى. «2009 جىلدان باستاپ ءبىزدىڭ قارىم-قاتىناسىمىز ستراتەگيالىق ارىپتەستىكتىڭ جاڭا دەڭگەيىنە كوتەرىلدى. بۇگىنگى كۇنگە دەيىن قوس تاراپ اراسىنداعى ساپارلار مەن دوستىققا نەگىزدەلگەن كەلىسسوزدەر قازاقستان-كورەيا ىنتىماقتاستىعىنىڭ تەرەڭدەۋىنە جاڭاشا سەرپىن بەردى. مەن ءوز تاراپىمنان ەلەكتروندى ۇكىمەت, مەملەكەتتىك باسقارۋ, ادامي رەسۋرستاردى باسقارۋ سەكىلدى ماسەلەلەردى, جالپى ەكىجاقتى بايلانىستى كەز كەلگەن سالادا ودان ءارى دامىتۋدى نازاردا ۇستايتىن بولامىن. بۇدان بولەك, قازاقستانداعى كورەي دياسپوراسى دا ەكى ەل اراسىنداعى ارىپتەستىكتىڭ جاندانۋىنا سەرپىن بەردى, ءالى دە ىقپال ەتىپ كەلەدى. قازىر كورەيا ۇكىمەتى ەكسپو-2017 كورمەسىنە بەلسەنە قاتىسۋعا دايىندىق شارالارىن جۇرگىزىپ جاتىر. كورمە اياسىندا كورەيا پاۆيلونى جاڭا تەحنولوگيالارعا نەگىزدەلگەن وزىق ونىمدەرىن جۇرتشىلىق نازارىنا ۇسىناتىن بولادى», – دەدى.
ال سەربيا رەسپۋبليكاسىنىڭ توتەنشە جانە وكىلەتتى ەلشىسى ۆلادان ماتيچ سوڭعى بىرنەشە جىلدار بويى قوس مەملەكەت قارىم-قاتىناسىنىڭ قارقىن الا تۇسكەنىنە, سەربيا ءۇشىن قازاقستان ورتالىق ازياداعى ماڭىزدى سەرىكتەستەردىڭ بىرى ەكەنىنە توقتالدى. ول: ء«بىز قازاقستاننىڭ سىرتقى جانە ىشكى ساياساتىن قولدايمىز. مەن ءوز تاراپىمنان بۇگىنگى كۇنگە دەيىن جۇرگىزىلگەن جۇمىستاردى ودان ءارى جالعاستىرۋعا كۇش سالاتىن بولامىن», – دەدى ءوز سوزىندە.
يندونەزيا رەسپۋبليكاسىنىڭ توتەنشە جانە وكىلەتتى ەلشىسى راحمات پرامونو مەن رۋمىنيانىڭ توتەنشە جانە وكىلەتتى ەلشىسى چەزار-مانولە ارميانۋ دا ارىپتەستەرىنىڭ ءسوزىن قۋاتتادى. ماسەلەن, راحمات پرامونو يندونەزيانىڭ قازاقستاندا بۇگىنگى كۇنگە دەيىن تاعايىندالعان ەكىنشى توتەنشە جانە وكىلەتتى ەلشىسى ەكەن. جالپى, بۇل ەلمەن ديپلوماتيالىق بايلانىس 1993 جىلدىڭ 2 ماۋسىمىندا ورناسا, يندونەزيانىڭ استاناداعى ەلشىلىگى 2010 جىلدىڭ جەلتوقسان ايىندا اشىلدى. ءوز سوزىندە راحمات پرامونو: «بۇگىندە قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋى ارقىلى الەمدە بەيبىتشىلىك پەن تىنىشتىقتىڭ ورناۋىنا كۇش سالىپ كەلەدى. وعان سيريادا قالىپتاسقان جاعداي بويىنشا استانادا بەيبىت كەلىسسوزدەردىڭ جۇرگىزىلۋى – دالەل. سول سەبەپتى, يندونەزيا قازاقستاننىڭ وڭىردەگى تۇراقتىلىقپەن قاتار, دۇنيەجۇىزىندەگى قاۋىپسىزدىكتىڭ نىعايۋىنا قوسىپ وتىرعان ۇلەسىن جوعارى باعالايدى. جالپى, ەكى مەملەكەت ارىپتەستىگىنىڭ دامۋ الەۋەتى جوعارى. قوس ەل قارىم-قاتىناسىنا بيزنەسمەندەردىڭ جۇرگىزگەن وزارا كەلىسسوزدەرى دە تىڭ سەرپىن بەرەدى دەپ ويلايمىن. الداعى ۋاقىتتا يندونەزيانىڭ 2 كومپانياسى فارماتسەۆتيكا جانە تاۋ-كەن سالالارىنا ينۆەستيتسيا قۇيۋدى كوزدەپ وتىر», – دەسە, رۋمىنيانىڭ توتەنشە جانە وكىلەتتى ەلشىسى چەزار-مانولە ارميانۋ قازاقستان مەن رۋمىنيا بيىل 15 شىلدەدە ديپلوماتيالىق بايلانىستىڭ ورناۋىنىڭ 25 جىلدىعىن اتاپ وتەتىنىن اتاپ ءوتتى.
«قازىرگى تاڭدا قوس مەملەكەت اراسىندا ديپلوماتيالىق دەڭگەيدە كوڭىل تولارلىقتاي قارىم-قاتىناس, ال پرەزيدەنتتىك, پارلامەنتتىك, ۇكىمەتتىك دەڭگەيدە جوعارى ساياسي ۇنقاتىسۋ ورناعان. بۇدان بولەك, ەكونوميكالىق ىقپالداستىق ماسەلەسىندە ءوزارا سەنىم بار, مادەني, ءبىلىم-عىلىم سالالارىندا جاقسى دەڭگەيدەگى ارىپتەستىك جولعا قويىلعان. مەن الداعى ۋاقىتتا ەكىجاقتى كەلىسسوزدەر كوكجيەگىنىڭ كەڭەيۋىنە, ونىڭ ىشىندە ەكونوميكا, ساۋدا, يننوفاتسيالىق تەحنولوگيالار, ادامي رەسۋرستاردى باسقارۋ, ءبىلىم-عىلىم, مادەنيەت پەن سپورت سالالارىنداعى بايلانىستى جانداندىرۋ جولىندا ەڭبەك ەتەتىن بولامىن», – دەدى چەزار-مانولە ارميانۋ.
ءلايلا ەدىلقىزى,
«ەگەمەن قازاقستان»
