بۇگىن ءوڭىر باسشىسى دانيال احمەتوۆ وسكەمەن قالاسىنىڭ اكتيۆىنە جاڭا اكىمدى تانىستىردى. بۇل لاۋازىمعا بۇعان دەيىن شقو اكىمىنىڭ ورىنباسارى قىزمەتىن اتقارعان قۋات تۇماباەۆ تاعايىندالدى, دەپ حابارلايدى «قازاقپارات».
2001 جىلى شاكارىم اتىنداعى سەمەي مەملەكەتتىك ۋنيۆەرسيتەتىن «حالىقارالىق ەكونوميكالىق بايلانىس» ماماندىعى بويىنشا, ال 2003 جىلى قازاق گۋمانيتارلىق زاڭ ۋنيۆەرسيتەتىن «قۇقىقتانۋ» ماماندىعى بويىنشا ءتامامدادى.
ەڭبەك جولىن 2001 جىلى بانك قىزمەتكەرى رەتىندە باستاعان.
2003 جىلدان باستاپ باس مامان, 2005 جىلدىڭ ءساۋىر ايىنان قر ەكونوميكا جانە بيۋدجەتتىك جوسپارلاۋ مينيسترلىگىنىڭ مەملەكەتتىك الىس-بەرىس جانە نەسيەلەندىرۋدى جوسپارلاۋ دەپارتامەنتىندە ءبولىم باستىعى بولىپ قىزمەت اتقاردى.
2005 جىلدىڭ قىركۇيەك ايىنان باستاپ قازاقستان رەسپۋبليكاسى ەكونوميكا جانە بيۋدجەتتىك جوسپارلاۋ مينيسترلىگىنىڭ ينۆەستيتسيالىق ساياسات جانە جوسپارلاۋ دەپارتامەنتىندەگى بيۋدجەتتىك ينۆەستيتسيالاردى جوسپارلاۋ باسقارماسى باستىعىنىڭ ورىنباسارى بولىپ جۇمىس ىستەگەن.
2011 جىلدان باستاپ قر ەكونوميكالىق دامۋ جانە ساۋدا مينيسترلىگىنىڭ ايماقتىق دامۋ كوميتەتى توراعاسىنىڭ ورىنباسارى بولىپ تاعايىندالدى.
2012 جىلدىڭ ءساۋىر ايىنان باستاپ قازاقستان رەسپۋبليكاسى ەكونوميكالىق دامۋ جانە ساۋدا مينيسترلىگىنىڭ ينۆەستيتسيالىق ساياسات دەپارتامەنتىنىڭ ديرەكتورى بولىپ جۇمىس اتقارعان.
2015 جىلدىڭ ناۋرىز ايىنان باستاپ شىعىس قازاقستان وبلىسىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى بولىپ قىزمەت اتقاردى.
جاڭا قالا باسشىسىن تانىستىرعان دانيال احمەتوۆ ونىڭ الداعى قىزمەتىنە تابىس تىلەدى.
«سەنىم ارتقاندارىڭىزعا راحمەت, قالانىڭ وركەندەۋى جولىندا ايانباي ەڭبەك ەتۋگە ۋادە بەرەمىن», - دەدى ق.تۇماباەۆ.
ءوز كەزەگىندە قۋات مۇحيت ۇلى قالا تۇرعىندارىنىڭ ارىز-شاعىمدارىن ەسكەرىپ, بارلىق كۇرمەۋلى ماسەلەلەر ءوز ۋاقىتىندا شەشىلەتىندىگىنە سەنىم ءبىلدىردى.
