فورۋمنىڭ ماقساتى - ارال ءوڭىرىنىڭ ەكولوگيالىق جانە الەۋمەتتىك-ەكونوميكالىق جاعدايى تۋرالى كەڭىرەك اقپاراتتاندىرۋ, وزەكتى ماسەلەلەرگە الەمدىك قاۋىمداستىقتىڭ نازارىن اۋدارۋ.
فورۋم جۇمىسىنا قازاقستان رەسپۋبليكاسىنىڭ مەملەكەتتىك حاتشىسى گ.ابدىحالىقوۆا, پارلامەنت دەپۋتاتتارى, قازاقستان رەسپۋبليكاسىنىڭ جانە ورتالىق ازيا ەلدەرىنىڭ ورتالىق جانە جەرگىلىكتى مەملەكەتتىك ورگاندارىنىڭ باسشىلارى, قازاقستان رەسپۋبليكاسىنداعى ديپلوماتيالىق وكىلدىكتەردىڭ باسشىلارى, حالىقارالىق ۇيىم وكىلدىكتەرىنىڭ جەتەكشىلەرى, عالىمدار, ساراپشىلار جانە ت.ب. قاتىستى.
فورۋمنىڭ اشىلۋىندا قىزىلوردا وبلىسىنىڭ اكىمى قىرىمبەك كوشەرباەۆ قازاقستان رەسپۋبليكاسىنىڭ تۇڭعىش پرەزيدەنتى, ەلباسى ن.ءا. نازارباەۆتىڭ بىرىككەن ۇلتتار ۇيىمىنىڭ مىنبەرىندە ارال تەڭىزىنىڭ ماسەلەسى ءبىزدىڭ وڭىرگە عانا ەمەس, بۇكىل الەمگە قاتەر توندىرەتىندىگى تۋرالى ايتقان مالىمدەمەسىن كەلتىرە وتىرىپ, تەڭىزدىڭ تارتىلۋى سالدارىنان كوتەرىلگەن شاڭ مەن ۋلى تۇز قازىردىڭ وزىندە ەۋروپا مەن انتاركتيدادان تابىلىپ وتىرعاندىعىن اتاپ ءوتتى.
قازاقستان رەسپۋبليكاسىنىڭ مەملەكەتتىك حاتشىسى گ.ابدىحالىقوۆا العىسوز سويلەپ, قازاقستان رەسپۋبليكاسىنىڭ پارلامەنتى اتىنان, سونداي-اق قىرعىزستان, تاجىكستان, تۇركىمەنستان, وزبەكستان مەملەكەتتەرىنىڭ دەلەگاتسيالارى, بىرىككەن ۇلتار ۇيىمىنىڭ, دۇنيەجۇزىلىك بانك جانە ەۋروپالىق ەكونوميكالىق كومميسيانىڭ وكىلدەرى وز قۇتتىقتاۋلارىن جولدادى.
ارالدىڭ ەكولوگيالىق جانە الەۋمەتتىك-ەكونوميكالىق ماسەلەرىن تالقىلاۋمەن قاتار, فورۋم بارىسىندا يندۋستريالدى ەكولوگيا, عالامدىق كليماتتىق وزگەرىستەر, كەشەندى سۋ تاقىرىبى مەن اتالعان وزەكتى ماسەلەلەردى شەشۋدىڭ الەمدىك تاجىريبەسى تالقىلاندى.
فورۋم اياسىندا دەرەكتى جانە عىلىمي تانىمدىق فيلمدەر كورسەتىلىپ, ارال ءوڭىرى مەن ارال تۋرالى اۆتورلىق كوركەم تۋىندىلار مەن عىلىمي مونوگرافيالار تانىستىرىلادى.
سونداي-اق, ارال باسسەينىنىڭ پروبلەماسى مەن ارال وڭىرىنىڭ ماسەلەلەرىنە ەلەۋلى ۇلەس قوسقان ۇيىمدار مەن تۇلعالاردىڭ ەڭبەكتەرى اتاپ ءوتىلىپ, ماراپاتتالادى جانە ىنتىماقتاستىق تۋرالى بىرقاتار حاتتامالارعا قول قويىلدى:
1) «ارال تەڭىزىنىڭ شىعىس جاعالاۋىنان «جاسىل بەلدەۋ» قۇرۋ جوباسى;
2) «جابايى جانۋارلاردى كليماتتىڭ وزگەرۋىنە جەرسىندىرۋدىڭ ءارال وڭىرى ورتالىعىن قۇرۋ» جوباسى;
3) «قامىستىباس» كولىنىڭ جاعالاۋىندا «ارال» عىلىمي – تۋريستىك ورتالىق» قۇرۋ;
4) «قىزىلوردا وبلىسىنىڭ اتلاسىن دايىنداۋ جانە گيس تەحنولوگياسىنىڭ نەگىزىندە ارال ءوڭىرىنىڭ ينتەراكتيۆتى ەلەكتروندى كارتاسىن» ازىرلەۋ جانە وزگە دە جوبالار بويىنشا.
شارانىڭ قورىتىندىسى بويىنشا قاتىسۋشىلار فورۋمنىڭ قارارىن قابىلداپ, حالىقارالىق ارالدى قۇتقارۋ قورىنىڭ قۇرىلعان كۇنى 26 ناۋرىز - «ارال تەڭىزىنىڭ كۇنى» رەتىندە جاريالاۋ جونىندەگى حاقق-نىڭ قازاقستانداعى اتقارۋشى ديرەكتسياسىنىڭ باستاماسىن قولدادى.
الداعى ۋاقىتتا, فورۋم قىزىلوردا قالاسىندا ارال وڭىرى مەملەكەتتەرى باسشىلارىنىڭ ءسامميتىن دايىنداۋعا نيەتتى.
ەكىنشى كۇنى فورۋمعا قاتىسۋشىلار ارال تەڭىزىنىڭ قازاقستاندىق بولىگىن تىكۇشاقپەن ارالايدى.
