قازاقستان قوي ەتىنىڭ ەكسپورتىن 2021 جىلعا قاراي 50 ەسەگە ارتتىرۋدى جوسپارلاپ وتىر, دەپ حابارلايدى قازاقپارات.
«ينديكاتيۆتى مالىمەتتەر بويىنشا, 2021 جىلعا قاراي قازاقستاندا قوي ەتىنىڭ ەكسپورتى 10 مىڭ تونناعا جەتەدى. 2016 جىلى قازاقستان جالپى 191 توننا قوي ەتىن شەتەلگە جونەلتكەن. قازىر ءبىز جىل سايىن 150 مىڭ توننا قوي ەتىن وندىرەمىز. ىشكى تۇتىنۋ كولەمى - شامامەن 111 مىڭ توننا. ءبىز ءوزىمىزدىڭ قاجەتتىلىگىمىزدى 130-140 پروتسەنتكە وتەپ كەلەمىز. ياعني, ىشكى نارىققا قاجەتتى نورمادان 30-40 مىڭ تونناعا كوپ شىعارامىز. بىزگە ىشكى نارىققا نۇقسان كەلتىرمەي-اق 30-40 مىڭ توننا قوي ەتىن سىرتقا ەكسپورتتاۋعا بولادى», - دەدى ۆيتسە-مينيستر ءباسپاسوز ءماسليحاتىندا.
ونىڭ ايتۋىنشا, قازىر قازاقستان قوي ەتىن يرانعا تاسىمالداۋعا مۇمكىندىك الدى. سەبەبى يرانمەن بىرلەسكەن ۆەتەرينارلىق سەرتيفيكاتتار جاسالدى. اراب امىرلىكتەرىنە دە جول اشىق, قازىر يزرايل تاراپىمەن دە كەلىسسوزدەر جۇرگىزىلدە.
ت. راحىمبەكوۆتىڭ سوزىنە قاراعاندا, قىتاي تاراپى قازاقستاننان قوي ەتىن الۋعا مۇددەلى. سەبەبى جىل ساناپ قىتايلىقتاردىڭ ازىق-ت ۇلىككە دەگەن سۇرانىسى ارتقان, ىشكى ونىمدەردىڭ كولەمى جەتكىلىكسىز. وسى ماقساتتا ءساۋىر ايىنىڭ سوڭىندا قىتايدان كەلگەن ارنايى ينسپەكتسيالىق توپ قىتاي نارىعى ءۇشىن جابىق قازاقستاننىڭ بەس وبلىسىنا تەكسەرىس جۇرگىزگەن. ەندى ماۋسىم ايىندا تۇبەگەيلى شەشىم شىعارىلسا, اتالمىش وبلىستاردان ەت تاسىمالداۋعا جول اشىلادى.
«قازاقستان قىتايدىڭ ازىق-ت ۇلىككە دەگەن سۇرانىسىن قامتاماسىز ەتە الادى دەپ ايتۋ قيىن. قىتايدا ءومىر ساپاسى ارتقان سايىن تاماقتانۋ مادەنيەتى دە وزگەرىپ جاتىر. بۇرىن وزدەرىڭىز بىلەسىزدەر, قىتاي حالقى ناندى وتە از تۇتىندى. ەگەر قازىر ءاربىر قىتايلىق كۇنىنە ءبىر ءتىلىم نان جەيتىن بولسا, قىتايعا جىلىنا 25 ملن توننا بيداي قاجەت بولادى. ال قازاقستان جالپى 20 ملن توننا عانا استىق جينايدى», - دەپ اتاپ ءوتتى ول.
