ەڭبەك نارىعىن تۇرلەندىرۋ تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلميرا قالمۇراتوۆا باياندادى. جوبا 8 باعىتتان تۇرادى. ولار ايماق ەكونوميكاسىنىڭ ءارتاراپتانۋى جانە ادامي رەسۋرستاردىڭ باسەكەگە قابىلەتتىلىگىن ارتتىرۋ, «اقتاۋ تەڭىز پورتى» اەا, يندۋستريالدى ايماقتىڭ ءتيىمدى دامۋى, ينفوراقۇرىلىمنىڭ باسەكەگە قابىلەتتىلىگى, مۇناي-گاز سالاسىنداعى جۇمىس كۇشىنىڭ وڭدەۋشى جانە قۇرىلىس سالاسىنا ءوتۋى, اۋىل شارۋاشىلىعى دامۋى ءۇشىن الەۋەتتى پايدالانۋ, قوعامدىق سانانى تۇرلەندىرۋ, ەڭبەك نارىعىنداعى ناقتى سۇرانىسقا ساي كادرلار دايىنداۋ جۇيەسىن جاڭعىرتۋ, قۇرىلىس يندۋسترياسىن دامىتۋ, ەڭبەك رەسۋرستارىنىڭ ايماق ىشىلىك جانە ايماقارالىق تۇتاستىعىن ارتتىرۋ.
- بۇگىنگى كۇننىڭ وزىندە ايماق ىشىندە اقتاۋ قالاسى, تۇپقاراعان جانە قاراقيا اۋداندارى ءوسۋ نۇكتەلەرىنە كوشۋ ەسەبىنەن بىرقالىپتى ورنالاستىرۋدى قامتاماسىز ەتۋ بويىنشا الدىن-الۋ شارالارىن قابىلداۋ كەرەك. 8 بلوك ءبىزدىڭ بارلىق الەۋمەتتىك-ەكونوميكالىق مۇمكىندىگىمىزدى قامتاماسىز ەتەدى. سونداي-اق بىرقاتار ۇسىنىستار دا بار. مىسالعا, «اقتاۋ تەڭىز پورتى» اەا دەڭگەيىن لوگيستيكالىق دەپ وزگەرتۋ كەرەك. بۇل ايماق اۋماعىنداعى لوگيستيكانىڭ دامۋ قوزعالىسىن بەرەدى. سونىمەن بىرگە, يندۋستريالاندىرۋ ايماعى بازاسىندا كادرلار دايىنداۋعا, جاستارمەن كاسىبي باعدارلاۋ جۇمىسىن جۇرگىزۋگە مۇمكىندىك بەرەتىن داعدىلار مەن بىلىكتىلىكتى دامىتۋ ورتالىعىن قۇرۋدى ۇسىنامىز. سونىمەن قاتار, ماڭعىستاۋ ەكونوميكالىق كەڭەسىنىڭ جۇمىسىن جاڭارتۋ, ءبىلىم بەرۋدىڭ جاڭا ۇلگىسىن قامتاماسىز ەتەتىن ءبىلىم بەرۋ ورتاسىن كاسىپتەندىرۋدى وتكىزۋ كەرەك, - دەپ ءاتاپ وتتى گۇلميرا قالمۇراتوۆا.
وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى حاليلا نۇرعاليەۆا ەڭبەك نارىعىن تۇرلەندىرۋگە باعىتتالعان ماڭعىستاۋ وبلىسىنىڭ دامۋ تۇجىرىمداماسىن ۇسىندى.
- تاياۋ 2-3 جىلدىقتا قارجىلاندىرۋدىڭ بارلىق كوزدەرى ەسەبىنەن جالپى قۇنى 21,5 ترلن.تەڭگەدەن استام جانە 22,7 مىڭ جۇمىس ورنى قۇرىلاتىن 524-تەن استام جوبانى جۇزەگە اسىرۋ جوسپارلانۋدا. ونىڭ ىشىندە وڭدەۋشى ونەركاسىپتە 131 جوبانى, كولىك جانە لوگيستيكا سالاسىندا – 68 جوبانى, تۋريستىك سالادا - 46 جوبانى, اۋىل شارۋاشىلىعىندا – 16 اسام جوبانى ىسكە اسىرۋ جوسپارلانۋدا. ءاربىر قالا جانە اۋدان بويىنشا كەلەشەكتەگى باعىتتار ايقىلدالدى. تاياۋ جىلدارداعى باستى دامۋ نۇكتەسى بولىپ اقتاۋ قالاسى, قۇرىق سەلوسى, فورت-شەۆچەنكو قالاسى بەلگىلەندى, دەدى ول.
- ماعان ماسەلەنى شەشۋ جولدارى, باسشىلارى وزدەرىڭىز بولىپ تابىلاتىن ناقتى جوبالار كەرەك. ءاربىر بلوك بويىنشا ءىس-قيمىلدىڭ بارلىق مەحانيزمى, جوبالارى, الەۋەتى, جۇمىس ورنى جازىلىپ كورسەتىلۋى ءتيىس. مىسالعا, اگروونەركاسىپ كەشەنىن الىپ, ونىڭ بارلىق الەۋەتىن كورسەتەمىز. اوك ۇلەسىنىڭ ىشكى ۇدەمەلى ءونىمىنىڭ كولەمى نولدىك مانىندە 0,5% بولادى. اۋىل شارۋاشىلىعىن جانداندىرۋ ماسەلەسىن شەشۋ ءۇشىن بىزگە نە قاجەت؟ ۇڭعىماعا قاراجات كەرەك پە؟ مال باسىن كوبەيتۋگە قارجىلاندىرۋ قاجەت پە؟ وسى ماسەلەلەردى جانە ونى شەشۋ جولدارىن كورسەتۋلەرىڭىز كەرەك. بارلىق قالا جانە اۋدان اكىمدەرىنە بەكىنىستىك اۋىلشارۋاشىلىق كووپەراتيۆتەرىن اشۋدى تاپسىرامىن, - دەپ اتاپ ءوتتى ماڭعىستاۋ وبلىسىنىڭ اكىمى ە. توعجانوۆ.
سونىمەن قاتار, وبلىستاعى ءتۋريزمنىڭ دامۋ, اقپاراتتىق-تۋريستىك ورتالىق قۇرۋ ماسەلەسى تالقىلاندى. ايماق باسشىسى تۋريزم باسقارماسىنا قۇرامى كيەلى جەرلەر, تەڭىز, ساۋىقتىرۋ جانە بالالار تۋريزمىنەن تۇراتىن تۋريستىك الەۋەتتىڭ دامۋى كەشەندى تۇجىرىمداماسىن جاساقتاۋ جونىندە تاپسىرما بەردى.
سونداي-اق, قر پرەزيدەنتى جانىنداعى مەملەكەتتىك باسقارۋ اكادەمياسىنىڭ ۆيتسە-رەكتورى التاير احمەتوۆ مەملەكەتتىك قىزمەتكەرلەر ۇشىن اكادەميادا ءبىلىم الۋ مۇمكىندىگىنىڭ تانىستىرىلىمىن وتكىزدى.
جيىنعا قاتىسۋشىلارمەن ۇكىمەت تاپسىرماسىنىڭ ۋاقىتىلى ورىندالۋ ماسەلەسى, وبلىس اكىمدىگى بىرقاتار قاۋلىلارىنىڭ جوبالارى قاراستىرىلدى.
گۇلايىم شىنتەمىرقىزى,
«ەگەمەن قازاقستان».
اقتاۋ
