ناعىز الىپتار ايقاسقا تۇسكەن باسەكەدە الماتى قالاسىنىڭ 8 اۋدانىنان ىرىكتەلىپ شىققان 24 بالۋان ونەر كورسەتتى. تارتىسقا تولى جارىستىڭ اقتىق سىنىندا ناۋرىزباي اۋدانىنىڭ نامىسىن ارقالاپ شىققان رۋسلان ابدرازاقوۆ پەن بوستاندىق اۋدانىنىڭ الىبى داۋرەن نۇرالينوۆ بەلدەستى.
ناتيجەسىندە, رۋسلان ابدرازاقوۆ ايقىن باسىمدىلىقپەن جەڭىسكە جەتىپ, باس جۇلدەگە تىگىلگەن «لادا گرانتا» جەڭىل كولىگىن تاقىمىنا باستى. ەكىنشى ورىنعا يە بولعان داۋرەن نۇرالينوۆ 200 مىڭ تەڭگە اقشالاي سىيلىق ەنشىلەدى. ال, بىلتىرعى جىلى الماتى بارىسى اتانعان تەگەۋرىندى بالۋان, ۆيكتور دەميانەنكو ۇزدىك ۇشتىكتى تۇيىندەپ 100 مىڭ تەڭگەگە يە بولدى.
وسىلايشا, رۋسلان ابدرازاقوۆ پەن داۋرەن نۇرالينوۆ شىلدە ايىنىڭ 3-ءشى جۇلدىزىندا وتەتىن ءداستۇرلى «قازاقستان بارىسى» تۋرنيرىندە الماتىنىڭ نامىسىن قورعايتىن بولادى.
– جارىس جوعارى دەڭگەيدە ءوتتى. قارسىلاستارىم دا وسال بولعان جوق. اسىرەسە, ۆيكتور دەميانەنكومەن بولعان بەلدەسۋ مەن ءۇشىن اۋىرعا سوقتى. دەگەنمەن, قۇداي وڭداپ جەڭىس تۇعىرىنان كورىندىم. الداعى «قازاقستان بارىسى» باسەكەسىنە تىڭعىلىقتى دايىندالىپ, الماتىلىق جانكۇيەرلەردىڭ سەنىمىنەن شىعۋ ءۇشىن بارىمدى سالاتىن بولامىن. ۇيىمداستىرۋشىلار مەن جانكۇيەرلەرگە العىس بىلدىرەمىن, – دەيدى جارىس جەڭىمپازى رۋسلان ابدرازاقوۆ.
ارمان وكتيابر,
«ەگەمەن قازاقستان»
