بۇگىن ۇكىمەت وتىرىسىندا جامبىل وبلىسىنىڭ اكىمى كارىم كوكىرەكباەۆ تارازدا بولعان داۋىلدىڭ زاردابى تۋرالى باياندادى.
«قۇرىلىس الاڭىندا توبەدەن شاتىردى ۇشىرىپ اكەتتى, قۇرىلىسشىلار - 1994 جىلى تۋعان بەكسەيىتوۆ پەن 1963 جىلعى نۇرجانوۆ وقيعا ورنىندا قازا تاپتى. 14 جاستاعى 8-سىنىپ وقۋشىسى بەكزات ۇمبەتاليەۆ ۇزىلگەن سىمدى باسىپ كەتىپ, توق سوقتى. سول كەزدە 1986 جىلى تۋعان حاميتقىزى مەن 1956 جىلعى بەكسۇلتانوۆانى جەكە تۇرعىن ءۇيدىڭ قورشاۋى قۇلاپ كەتكەن. ەكەۋى دە اۋرۋحاناعا جاتقىزىلدى. 2006 جىلى تۋعان ورىنباسارعا اعاش قۇلادى. ول دا اۋرۋحاناعا جەتكىزىلدى. سونداي-اق اعاشتار قۇلاپ ەلەكتر سىمدارىن ءۇزدى جانە گاز قۇبىرلارىن قيراتتى», - دەدى كوكىرەكباەۆ.
پرەمەر-مينيستر باقىتجان ساعىنتاەۆ قالانىڭ قىزمەتىن تولىق قالپىنا كەلتىرۋدى, زارداپ شەككەندەرگە قاجەتتى كومەكتى كورسەتۋدى جانە جاسالىپ جاتقان جۇمىستار مەن ناتيجەلەر تۋرالى ءاردايىم اقپاراتتاندىرىپ وتىرۋدى تاپسىردى.
29 مامىر كۇنى تارازدا جويقىن داۋىلدىڭ ەكپىنى 30 م/س جىلدامدىققا دەيىن جەتكەن بولاتىن. اكىمنىڭ ءسوزى بويىنشا, وبلىستا اكىمنىڭ ءبىرىنشى ورىنباسارى توراعالىق ەتەتىن ارنايى كوميسسيا قۇرىلعان. تاڭعا جاقىن اپات سالدارلارىن جويۋ قىزمەتى ەلەكتر ەنەرگياسىمەن قامتاماسىز ەتۋ جۇمىسىن تولىعىمەن قالپىنا كەلتىردى. قۇلاعان اعاشتار مەن قوقىستاردى جيناۋ جۇمىسى جۇرگىزىلىپ جاتىر.
