ۇكىمەت وتىرىسىن باستاماس بۇرىن, پرەمەر-مينيستر باقىتجان ساعىنتاەۆ بىرىڭعاي جيناقتاۋشى زەينەتاقى قورىنىڭ ازەربايجان بانكىنىڭ باعالى قاعازدارىنا سالىنعان 250 ميلليون دوللار سوماسىنداعى قارىزىن قايتارۋ تۋرالى ماسەلەنى كوتەردى.
«اتالمىش ماسەلە قوعام اراسىندا ءجيى تالقىلانىپ جاتىر. ۇكىمەت وتىرىسىندا وسى ساۋالعا دا توقتالعاندى ءجون كوردىك. «قر زەينەتاقىمەن قامتاماسىز ەتۋ تۋرالى» زاڭى بويىنشا, بجزق-نىڭ مەنشىك يەسى مەملەكەت بولىپ تابىلادى. مەملەكەت زەينەتاقى جارنالارىنىڭ قاۋىپسىزدىگىن قامتاماسىز ەتەدى. سوندىقتان ازاماتتاردىڭ زەينەتاقى اكتيۆتەرىنىڭ ساقتالۋىنا ۇكىمەت تىكەلەي مۇددەلى. مەن ءوزىمنىڭ ازەربايجاندىق ارىپتەسىممەن, پرەمەر-مينيسترمەن سويلەستىم. ول ءوز كەزەگىندە بانك كرەديتورلارىنا قاراجاتتى قايتارۋ پروتسەسىنە قولداۋ كورسەتەتىنىن ۋادە ەتتى. 23 مامىردا لوندوندا شەتەلدىك كرەديتورلارمەن, سونىمەن قاتار قر ۇلتتىق بانكى مەن قر ۇكىمەتىنىڭ وكىلدەرىمەن بولعان كەزدەسۋدە قارىزدى قايتارۋدىڭ ەگجەي-تەگجەيلى جوسپارى تانىستىرىلدى. باقىت تۇرلىحان ۇلى, مەن سىزگە وسى ماسەلە بويىنشا ازەربايجاننىڭ قارجى مينيسترىمەن سويلەسۋدى جانە اتالعان ساۋالدى باقىلاۋدا ۇستاۋدى تاپسىرعان بولاتىنمىن. تولىعىراق بايانداما جاساۋىڭىزدى سۇرايمىن!», - دەدى ب. ساعىنتاەۆ.
ءوز كەزەگىندە ب. سۇلتانوۆ, 2014 جىلى قازان ايىندا زەينەتاقى اكتيۆتەرى مەن بىرىڭعاي جيناقتاۋشى زەينەتاقى قورىنىڭ پورتفەلىنە حالىقارالىق ازەربايجان بانكىنىڭ 250 ميلليون دوللارعا قارىزدىق باعالى قاعازدارى 10 جىلدىق مەرزىمگە جانە 8,25 پروتسەنتتىك مولشەرلەمەمەن ساتىپ الىنعانىن ەسكە سالدى. ول كەزدەگى باعام بويىنشا, بۇل سوما 45 ملرد تەڭگە شاماسىندا بولعان.
«قر ۇلتتىق بانكىنىڭ مالىمەتتەرى بويىنشا, 2014 جىلدان بۇگىنگى ۋاقىتقا دەيىن بجزق ازەربايجان بانكىنەن 15 ملرد تەڭگە شاماسىندا پايدا كورگەن. بۇل - ينۆەستيتسيالانعان سومانىڭ 3/1-ءى. ول 52 ملن اقش دوللارى. ءسىزدىڭ تاپسىرماڭىز بويىنشا, مەن ءوز ارىپتەسىممەن, ازەربايجان قارجى ءمينيسترى سامير شاريفوۆپەن تىلدەستىم. ول ازەربايجان ۇكىمەتىنىڭ اتىنان وسى ساۋال بويىنشا ۋاكىلەتتى وكىل بولىپ تابىلادى. مەن ول كىسىمەن ءاردايىم بايلانىستامىن. ونىڭ تۇسىندىرۋىنشە, ازەربايجاننىڭ ۇلتتىق ۆاليۋتاسى - مانات دەۆالۆاتسياعا ۇشىراۋىنا بايلانىستى, حالىقارالىق ازەربايجان بانكى ءوزىنىڭ شەتەلدىك كرەديتورلارى الدىنداعى مىندەتتەمەلەرىن ورىنداۋدان باس تارتقان. بۇل ماسەلە ازەربايجان ۇكىمەتىنىڭ ءجىتى باقىلاۋىندا. ارىپتەستەرىمنىڭ ايتۋىنشا, ازەربايجان ۇكىمەتى بارلىق كرەديتورلاردىڭ مۇددەلەرىن قامتاماسىز ەتۋگە دايىن. ءبىز ءوز تاراپىمىزدان قر ۇلتتىق بانك پەن قر ۇكىمەتى وكىلدەرىنىڭ تولىق اقپاراتپەن قامتاماسىز ەتىلۋىن سۇرادىق», - دەدى قارجى ءمينيسترى.
ء«بىزدىڭ باستى ماقساتىمىز جاعىمسىز سالدارلاردى مەيلىنشە ازايتۋ جانە بجزق سالىمشىلارىنىڭ مۇددەسىن قورعاۋ, سونىمەن قاتار 250 ملن دوللار سوماسىنداعى نەگىزگى قارىزدىڭ ساقتالۋىن قامتاماسىز ەتۋ. كەلىسسوزدەر بارىسىنداعى ءبىزدىڭ باستى ۇستانىمىمىز وسىنداي. 23 مامىردا لوندوندا وتكەن كەزدەسۋدە قارىزدى قايتا قۇرىلىمداۋدىڭ ءۇش نۇسقاسى ايتىلدى. ازەربايجان بانكىنىڭ 250 ملن دوللار سوماسىنداعى مىندەتتەمەلەرىن 5,125 پروتسەنتتىك مولشەرلەمەمەن 12 جىلدىق مەرزىمگە 200 ملن دوللار بولاتىن ازەربايجاننىڭ مەملەكەتتىك باعالى قاعازدارىنا الماستىرۋ. ەكىنشى نۇسقا - 250 ملن دوللارعا پارا-پار 3,5 پروتسەنتتىك مولشەرلەمەمەن 15 جىلعا ازەربايجاننىڭ مەملەكەتتىك باعالى قاعازدارىنا الماستىرۋ. ءۇشىنشى نۇسقا - وسى بانكتىڭ 250 ملن دوللار تۇراتىن جاڭا شىعارىلعان وبليگاتسيالارىن 3,5 پروتسەنتتىك مولشەرلەمەمەن 7 جىلعا الۋ. بارلىق نۇسقالاردى تالداي وتىرىپ, قر ۇلتتىق بانكى مەن ۇكىمەتى وكىلدەرىنەن قۇرالعان كوميسسيا قازاقستان سالىمشىلارى ءۇشىن ەڭ ءتيىمدى نۇسقاسى تاڭدالىپ الىنادى», - دەپ اتاپ ءوتتى ب. سۇلتانوۆ.
ءمينيستردىڭ سوزىنشە, بيىل شىلدە ايىنىڭ ورتا تۇسىندا بانك كرەديتورلارىنىڭ جينالىسى وتەدى. وندا بانك قارىزىنىڭ قايتا قۇرىلىمداۋدىڭ ازەربايجان تاراپى ۇسىنعان نۇسقالارى تالقىلانادى. ەگەر كرەديتورلاردىڭ 3/2-ءسى قايتا قۇرىلىمداۋ جونىندەگى شەشىمگە كەلىسەتىن بولسا, بانك قارىزىن قايتا قۇرىلىمداۋ بويىنشا جۇمىستار ارى قاراي جالعاسىن تابادى. ازەربايجان تاراپى ءمالىم ەتكەنىندەي, بۇل جۇمىستى بيىل كۇزدە اياقتاۋ جوسپاردا بار.
