اق باس الاتاۋدىڭ اسقار بيىگىنەن اقيلانا اقتارىلعان اساۋ اقسۋدىڭ ەتەكتە ەنتىگىن باسىپ, جايىلىپ اعار جاعاسىنداعى بۇيرات قۇمدار اراسىندا بۇققان اۋىلىمىزدىڭ تىرلىگى بۇرق-سارق قايناپ جاتاتىن. كوشەنىڭ شاڭىن كوتەرىپ دوپ قۋالاعان قارا دومالاقتار ويىننىڭ جاعىن ايىرىپ بولعان سوڭ اياق سۋىتۋ ءۇشىن الاڭقايعا القاقوتان وتىرا قالاتىنبىز. وي, سونان سوڭ «توتىنىڭ» توقسان تولعاۋىنداي فۋتبول تۋرالى ۇزاق-سونار اڭگىمەگە كىرىسەتىنبىز. بىرىمىزدەن-ءبىرىمىز وتكەن بىلگىشپىز. ايتقاندارىمىزدىڭ راس-وتىرىگىن ايىرا المايسىڭ. كوبىنەسە ەلدەن ەستىگەندەرىمىزدى كوپىرتەمىز.
– اتاقتى كوممەنتاتور ۆاديم سينياۆسكيدىڭ ماقامىمەن مايىن تامىزىپ, قۇددى راديوداعىداي قۇلاق قۇرىشىڭدى قاندىرا رەپورتاج جۇرگىزە الاتىن احانباي اعا (بەلگىلى جۋرناليست ايگۇل احانبايقىزىنىڭ اكەسى – اۆتور) ايتتى, ىلگەرىدە كسرو مەن برازيليا كەزدەسۋىندە پەلەنىڭ وڭعا-سولعا ويقاستاعان شالت قيمىلىنان شاتقاياقتاعان ۆورونين تەپە-تەڭدىكتى ساقتاۋعا شاماسى جەتپەي جالپ ەتە قالىپتى...
– الماتىدا «قايرات» پەن «تورپەدو» ويناعاندا ءبىزدىڭ ۆاديم ستەپانوۆ ايگىلى ەدۋارد سترەلتسوۆتىڭ اياعىن تۇساعانداي ادىمىن اشتىرماعانىن جاقسىگەلدى كوكەم ءوز كوزىمەن كورىپتى...
– شىركىن, گرۋزيندەردىڭ ماڭدايعا باسار ماقتانىشى مەسحي مەن مەترەۆەليگە جەتەر جامپوز بار ما؟!.
– الا تاقيالى اعايىنداردىڭ اقبەرەنى بەرادور ابدۋرايىموۆ تا ەشكىمگە ەسەسىن جىبەرمەيدى. كەزىندە تبيليسيلىك تارلانبوز گيۆي گاۆاشەلي ەكەۋى ەلىمىزدىڭ ەڭ مەرگەن شابۋىلشىسىنا بەرىلەتىن «ترۋد» گازەتىنىڭ ارنايى جۇلدەسىن العانىن ۇمىتتىڭدار ما؟
– ءاي, سەندەر دە سويلەيسىڭدەر-اۋ, وزەۋرەپ وزگەلەردى دارىپتەگەنشە, ءوزىمىزدىڭ سەگىزباەۆتى نەگە ايتپايسىڭدار وسى. ونىڭ وڭ اياعىنىڭ سۇراپىل سوققىسىن ۇستاۋ مۇمكىن بولماعىندىقتان قارسىلاستار جاعى قاقپاعا مايمىلدى قويعان ەكەن.سودان...
تىڭداۋشىلارىن سىلتىدەي تىندىراتىن بۇل اڭىزدىڭ قالاي اياقتالاتىنى بارىمىزگە ايان. ەجەلدەن ەرتەگىگە قۇمار, قيالى جۇيرىك حالقىمىزدىڭ ۇلىقتاۋعا تاتيتىن ۇلدارىن باتىرلار جىرىنىڭ باستى كەيىپكەرلەرىندەي اسىرا بەينەلەۋىن ايىپقا بۇيىرۋ, ارينە, ابەستىك بولار. ايتەۋىر, ادال نيەتتەن تۋعان اسىرەلەۋ ەكەنى انىق قوي.
ال, اقيقاتىندا تيمۋر سەگىزباەۆ سول ۋاقىتتا كسرو بىرىنشىلىگىنىڭ جوعارعى توبىندا رەسپۋبليكا نامىسىن قورعاعان «قۋ» جالعىز الماتىنىڭ «قايراتىنىڭ» كاپيتانى ەدى. ونىڭ وزىندىك ويىن-ورنەگى, تەڭبىل دوپتىڭ ءبۇيىرىن تەسىپ جىبەرەردەي تەگەۋرىندى تەپكىسى, جانىنداعى ارىپتەستەرىن جەڭىسكە جەتەلەيتىن جەكە باسىنىڭ ۇلگىسى قانداي قۇرمەتكە دە لايىق-تۇعىن. نەگىزىنەن وزگە ۇلت وكىلدەرىنەن قۇرالعان كوماندالاستارىن قازاقتىڭ قاراتورى جىگىتى جايتاڭداپ جاسىل الاڭعا باستاپ شىققاندا كەۋدەلەرىن ماقتانىش كەرنەگەنىن بايىرعى جانكۇيەرلەر ەمىرەنە ەسكە الادى. اسىرەسە, ماسكەۋدىڭ تورىندە ايگىلى «سپارتاكتىڭ» قاقپاسىنا قايقايتىپ تۇرىپ ەكى گول سوققانىندا وداقتىق باسپاسوزدە ورنى بولەك «كومسومولسكايا پراۆدا» «تيمۋر ي ەگو كوماندا» دەگەن تاقىرىپپەن ماقالا جاريالاعانىن بۇگىنگى جاستار بىلە بەرمەۋى مۇمكىن. الماتىداعى ورتالىق ستاديوننىڭ الدىندا ورناتىلعان فۋتبولشى ەسكەرتكىشىنىڭ ءپروتوتيپى تيمۋر سەگىزباەۆ دەسەك تە قاتەلەسە قويماسپىز.
اتى اڭىزعا اينالعان ازامات كەيىن باپكەرلىككە اۋىسقان كەزىندە دە اجەپتاۋىر تابىستارعا جەتتى. ول اعا جاتتىقتىرۋشى بولعان تۇستا «قايرات» كسرو چەمپيوناتىنداعى ەڭ ۇزدىك كورسەتكىشى − 7-ءشى ورىندى يەلەندى.
بىلىكتى مامان ۇلكەن سپورتتا ءۇمىتىن ۇكىلەگەن تالاي تالانتتىڭ باعىن اشتى.
ماسەلەن, تومەنگى توپتاعى اشحابادتىڭ «كولحوزشىسىنان» قۇربان بەردىەۆتى شاقىرىپ, قايراتتىق سەرگەي ۆولگين, ەۆستافي پەحلەۆانيدي, ۆاحيد ماسۋدوۆ سياقتى ساڭلاقتاردىڭ ساپىنا قوستى. كوپ كەشىكپەي-اق تۇركىمەنستاندىق تاستۇلەكتىڭ ءتۇتىنى ءتۇزۋ ۇشىپ, سۇيىكتى كوماندامىزدىڭ سەنىم ارتار سەركەسىنە اينالعانى بەلگىلى. تاڭعاجايىپ تەحنيكاسى ەرىكسىز تاڭداي قاقتىراتىن. الاڭدى كورە بىلەتىن, ويىندى وقي الاتىن ايرىقشا قابىلەتىنىڭ ارقاسىندا داۆيد كيپياني, حورەن وگانەسيان, يۋري گاۆريلوۆ, لەونيد بۋرياك سىندى كەڭەستىك فۋتبول جۇلدىزدارىمەن تەڭ دارەجەدە ونەر كورسەتتى. بىراق, بابى كەلىسكەنمەن باسقا سەبەپتەرگە بايلانىستى باس قۇراماعا الىنبادى. ەسەسىنە ەسىمى ەۋروپاعا ءمالىم ايتۋلى باپكەر اتاندى. ول جەتەكشىلىك جاساعان قازاننىڭ ء«رۋبينى» رەسەيدىڭ دوپ دوداسىندا توپ جارىپ قانا قويماي, حالىقارالىق ارەنادا ازۋىن ايعا بىلەگەن «بارسەلونادان» باسىم تۇسكەنىن بىلەمىز.
...نەگە ەكەنى بەلگىسىز, قازىرگى تاڭنىڭ تيمۋرلارى جايىندا اقيقاتقا بەرگىسىز اڭىزدار ايتىلمايدى. ودا ارناۋعا لايىق ونداي وعلاندار بار-اۋ. الايدا, باياعى بىزدەي اۋزىن اشىپ, كوزىن جۇمىپ اڭىزدارعا سەنەتىن اڭقاۋ بالالار تابىلا قويار ما ەكەن...
تالعات باتىرحان,
«ەگەمەن قازاقستان»
