ءتورت مەملەكەتتىڭ جۇيەلىك وپەراتورلارىنىڭ جەتەكشىلەرىن جيناعان وتىرىس اتالمىش سالانىڭ اعىمداعى ماسەلەلەرىن كۇن تارتىبىنە شىعاردى. «KEGOC» اق (قازاقستان), «باركي توچيك» ااحك (تاجىكستان), «قىزعىزستان ۇەت» ااق (قىرعىزستان), «وزبەكەنەرگو» اق (وزبەكستان) باسشىلارى مەن «ەنەرگيا» ۇيلەستىرۋ ديسپەتچەرلىك ورتالىعىنىڭ ديرەكتورى قوسىلعان جيىندا ەنەرگەتيكا سالاسىنىڭ جاڭا باعىتتارى تالقىلاندى.
2003 جىلى قۇرىلعان ورتالىق ازيا ەلەكتر ەنەرگەتيكالىق ۇيلەستىرۋ كەڭەسى قازاقستان مەن ورتالىق ازيانىڭ بىرىكتىرىلگەن ەلەكتر ەنەرگەتيكالىق جۇيەلەرى اراسىنداعى تۇيتكىلدەردى ءتيىمدى شەشە الادى. ماسەلەن, وڭىردەگى ەنەرگەتيكالىق كومپانيالاردىڭ 2016-2017 جىلعى كۇزگى-قىسقى ماۋسىمدى ەش قيىندىقسىز, اپاتتى وشىرۋلەرسىز وتكىزۋى وسىنىڭ ايعاعى.
ال «KEGOC» اق باسقارما توراعاسى باقىتجان قاجيەۆ باق وكىلدەرىمەن وتكىزگەن بريفينگتە وتىرىس بارىسىندا جەدەل ماسەلەلەرمەن قاتار, بولاشاقتاعى ەنەرگەتيكا سالاسىنىڭ الەمدىك ترەندتەرى دە قاراستىرىلعانىن اتاپ ءوتتى. ويتكەنى جاڭارتىلعان ەنەرگيا سالاسى ۇلكەن وزگەرىستەردى باستان وتكەرۋدە. بۇل قۋات كوزدەرىن ۇنەمدەۋگە, ەنەرگەتيكا سالاسىنىڭ جاھاندانۋىنا دا قاتىستى جايتتار. جانە مۇنىڭ ىشىندە ۇزدىكسىز دامىپ جاتقان جۇيەدە ەنەرگيانى ءتيىمدى ءبولىپ تاراتۋ دا بار.
وتىرىسقا قاتىسۋشىلار ءبىرىنشى كەزەكتە 2016-2017 جىلعى كۇزگى-قىسقى ماۋسىمدارداعى ەنەرگيا جۇيەلەرى جۇمىستارىنىڭ قورىتىندىلارى مەن الداعى 2017-2018 جىلداردىڭ كۇزگى-قىسقى ماۋسىمدارىنا دايىندىق شەڭبەرىندە جۇرگىزىلەتىن جوندەۋ جانە ۆەگەتاتسيا كەزەڭدەرىن تالقىلادى.
سونىمەن قاتار, قازاقستان بەج مەن ورتالىق ازيانىڭ بەج قاتارلاس جۇمىسى شەڭبەرىندە مۇشە-مەملەكەتتەردىڭ ەلەكترمەن جابدىقتاۋ سەنىمدىلىگىن قامتاماسىز ەتۋ, جۇمىس مەرزىمدەرىن ۇيلەستىرۋ, ادىستەمەلىك بازانى جەتىلدىرۋگە قاتىستى بىرقاتار ماسەلەلەردى قاراستىردى. كەزدەسۋ ناتيجەسىندە قىزمەتتەرى كەلىسىلگەن ەنەرگيا جۇيەلەردىڭ قاتارلاس جۇمىس رەجىمىن قامتاماسىز ەتۋگە, سونىڭ ىشىندە ورتالىق ازيا ايماعىندا وتىن-ەنەرگەتيكالىق جانە سۋ رەسۋرستارىن كەشەندى پايدالانۋعا باعىتتالعان بىرقاتار شەشۋشى قۇجاتتار قابىلداندى.
جيىن اراسىندا باقىتجان قاجيەۆ جۋرناليستەرگە بەرگەن سۇحباتىندا, اتالمىش كەزدەسۋدىڭ «KEGOC» كومپانياسىنىڭ 20 جىلدىعى قارساڭىندا ءوتىپ وتىرعانىن اتاي كەلە, وسى ارالىقتا كومپانيا ەلىمىزدىڭ ەلەكتر ەنەرگەتيكالىق تاۋەلسىزدىگىن قامتاماسىز ەتۋ جولىندا نىسانداردى جاڭعىرتۋ, جاڭا ەنەرگيا نىساندارىن سالۋ سىندى اۋقىمدى جۇمىستار اتقارعانىن مالىمدەدى.
– كەزدەسۋدەن بۇرىن كورشى ەلدەن كەلگەن ارىپتەستەرىمىز الماتى قالاسىنىڭ ماڭايىندا ورنالاسقان 500كۆ «الما» قوسالقى ستانساسىنا بارىپ قايتقان بولاتىن. بۇل جوبا – KEGOC ىسكە اسىرعان جوبالاردىڭ ىشىندە ماڭىزدى ورىنعا يە. سەبەبى, ەلىمىزدىڭ تاۋەلسىزدىگى جىلدارىندا نولدەن باستاپ سالىنعان العاشقى 500كۆ-تىق قوسالقى ستانسا. اتالمىش قوسالقى ستانسانى ۇلتتىق ەلەكتر تورابىنا جالعاۋ الماتى ەنەرگيا تورابىن جانە جالپى العاندا ەلىمىزدىڭ وڭتۇستىك ءوڭىرىن ەلەكترمەن جابدىقتاۋ سەنىمدىلىگىن قامتاماسىز ەتتى. كەلەسى جىلى وسى «الما» قوسالقى ستانساسىنا «نۇرلى جول» مەملەكەتتىك باعدارلاماسىنا ەنگەن, ءبىرىنشى كەزەڭى جۇمىس كەستەسىنەن ءبىر جىلعا ەرتە اياقتالعان «سولتۇستىك-شىعىس-وڭتۇستىك ءترانزيتى» جوباسىنىڭ 500كۆ-تىق جاڭا ەلەكتر جەتكىزۋ جەلىسىن جالعاۋدى جوسپارلاپ وتىرمىز, – دەيدى «KEGOC» اق باسقارما توراعاسى باقىتجان قاجيەۆ.
– بىردە-ءبىر ەلدىڭ ەنەرگيا جۇيەسى جالعىز جۇمىس ىستەي المايدى. سوندىقتان ىسكەرلىك قارىم-قاتىناس ورناتۋ وتە ماڭىزدى. قانداي دا ءبىر قيىندىق تۋىنداسا كومەك قولىن سوزۋعا دايىنبىز. كەزدەسۋدە الداعى كۇزگى-قىسقى ماۋسىمعا دايىندىق تا پىسىقتالىپ, بىرىكتىرىلگەن ەلەكتر ەنەرگەتيكالىق جۇيەلەرىنىڭ زامان اعىمىنا بەيىمدەلگەن تۇجىرىمداماسىن جاساۋ جايى ءسوز بولدى, – دەدى «ەنەرگيا» ۇيلەستىرۋ ديسپەتچەرلىك ورتالىعىنىڭ ديرەكتورى حاميديللا شامسيەۆ.
ءتورت مەملەكەتتىڭ جارىقتاندىرۋ ماسەلەسىن كوتەرگەن كوكەيكەستى جيىندا «KEGOC» اق باسقارما توراعاسى باقىتجان قاجيەۆ بۇگىنگى الەم جاڭعىرتىلاتىن ەنەرگەتيكا, ونى ساقتاۋ مەن جۇيەلەردى جاھانداندىرۋعا كوپ كوڭىل ءبولىپ وتىرعانىن ايتا كەلە, ءاربىر ەنەرگەتيكالىق جۇيە ارتىق ەلەكتر قۋاتىن ەكسپورتتاۋى ءۇشىن تاياۋ شىعىستىڭ نارىعىن زەرتتەۋدى جانە ەۋروپالىق بولىك پەن تاياۋ شىعىستى بايلانىستىراتىن كوپىر قۇرۋ يدەياسىن ۇسىندى.
ايناش ەسالي,
«ەگەمەن قازاقستان»
الماتى
