جيىنعا ۇلتتىق كوميسسيانىڭ تۇراقتى مۇشەلەرى, مۇددەلى مەملەكەتتىك ورگانداردىڭ باسشىلارى, ءبىلىم, عىلىم جانە مادەنيەت قايراتكەرلەرى قاتىستى.
شارانىڭ العىسوزىن مادەنيەت جانە سپورت ءمينيسترى الىپ, ەلىمىز ەگەمەندىككە قول جەتكىزگەلى بەرى ەلباسى باسشىلىعىمەن قازاقستاننىڭ الەم الدىنداعى بەدەلىن كوتەرۋ بويىنشا جۇرگىزگەن جۇمىستار تۋرالى ايتتى.
– قىسقا مەرزىمنىڭ ىشىندە قازاقستان سىرتقى ساياساتىن بەلسەندى جۇزەگە اسىرىپ وتىرعان تۇراقتى, سەرپىندى دامۋشى مەملەكەتكە اينالىپ وتىر. 25 جىل ىشىندە قازاقستان يۋنەسكو-نىڭ اتقارۋشى كەڭەس, بۇكىلالەمدىك مۇرالار كوميتەتى, يۋنەسكو حالىقارالىق گيدرولوگيالىق باعدارلاماسى بويىنشا ۇكىمەتارالىق كوميتەتى, سونداي-اق بىرقاتار سايلاۋ بولىمدەرى سەكىلدى جۇمىس ورگاندارىنا بەلسەندى قاتىستى. ۇيىمنىڭ بەدەلدى تىزىمدەرىنە ەلىمىزدىڭ ماتەريالدىق ەمەس مادەني مۇرا ەلەمەنتەرى, مادەني جانە تابيعي مۇرا وبەكتىلەرى, قازاقستاننىڭ بيوسفەرالىق قورلارى ەنگىزىلدى, – دەدى مادەنيەت جانە سپورت ءمينيسترى.
سونىمەن قاتار, ۆەدومستۆو باسشىسى ۇلتتىق كوميسسيانىڭ قۇرىلۋىنا اتسالىسقان عالىم مۇرات اۋەزوۆكە, اقىن ولجاس سۇلەيمەنوۆكە, قازاقستاننىڭ رەسەيدەگى ەلشىسى يمانعالي تاسماعامبەتوۆكە العىس ءبىلدىردى.
شارانىڭ سالتاناتتى بولىگىندە قازاقستاننىڭ ءتورت جاڭا ەلەمەنتتەرى, ياعني «ناۋرىز», «اڭشى قۇستارمەن اڭ اۋلاۋ», «جۇقا نان دايىنداۋ داستۇرلەرى: لاۆاش, قاتىرما, جۇپقا, يۋفكا», «قازاق كۇرەسى» يۋنەسكو-نىڭ ماتەريالدىق ەمەس مادەني مۇرا رەپرەزەنتاتيۆتىك تىزىمىنە ەنگىزىلگەنى جونىندە سەرتيفيكاتتار تاپسىرىلدى. سونىمەن قاتار, ۇلتتىق كوميسسيانىڭ وتكەن جىلعى جۇمىسى قورىتىندىلانىپ, 2017 جىلعى قىزمەتىنىڭ نەگىزگى باعىتتارى انىقتالدى.
ايان ءابدۋالي,
«ەگەمەن قازاقستان»
