بىرنەشە كۇننەن بەرى. حالىقارالىق «ەكسپو» كورمەسىنىڭ قارساڭىندا, 25 مامىردا جالاۋى جەلبىرەگەن ءدۇبىرلى دودانىڭ اشىلۋ سالتاناتىنا وسى سايىستى باقىلاۋ كوميتەتىنىڭ توراعاسى, ازيا ۆولەيبول كونفەدەراتسياسىنىڭ وكىلى تسزيچجون ۆەي ارنايى قاتىسىپ, سپورتتىق شارانى جوعارى دەڭگەيدە ۇيىمداستىرعانى ءۇشىن ايماق باسشىسى دانيال احمەتوۆكە العىس ايتىپ, ەستەلىك سىيلىق تابىستادى. سالتاناتتى شارانى قۇتتىقتاۋ سوزىمەن اشقان وبلىس اكىمى مۇنداي مارتەبەلى جارىستىڭ شىعىس قازاقستان توپىراعىندا ءوتۋى ءوڭىر جۇرتشىلىعىنىڭ ورتاق جەڭىسى ەكەندىگىن ايتتى.
«بارشاڭىزدى وسىناۋ سپورت مەرەكەسىنىڭ باستالۋىمەن شىن جۇرەكتەن قۇتتىقتايمىن. جاپونيا, قىتاي, تايلاند, تايپەي, يران, ۆەتنام, فيليپپين ەلدەرىنىڭ سپورتشىلارىنا قوناقجاي شىعىس قازاقستان جەرىنە قوش كەلدىڭىزدەر دەيمىز. بىزگە وسىنداي اۋقىمدى شارانى وتكىزۋ مىندەتىن سەنىپ تاپسىرعان ازيا ۆولەيبول كونفەدەراتسياسى باسشىلىعىنا العىس ايتامىز. قۇرلىقتىڭ كىل مىقتىلارى قاتىساتىن جارىس تارتىستى دا تارتىمدى ويىندارعا تولى بولادى دەپ سەنەمىز», − دەدى د.احمەتوۆ.
سالتاناتتى شارانىڭ شىمىلدىعى تۇرىلگەننەن كەيىن الاڭعا ەل نامىسىن قورعايتىن وسكەمەندىك «التاي» مەن تايپەيدىڭ «تايۆان پاۋەر» كوماندالارى شىعىپ, ءبىزدىڭ بۇرىمدىلار بەس كەزەڭگە سوزىلعان ويىندا 3:2 ەسەبىمەن جەڭىسكە جەتتى. ەرتەڭىندە «التاي» ارۋلارى تايلاندتىڭ «سۋپرەمە» كومانداسىمەن شەبەرلىك بايقاسىپ, ەسە جىبەرىپ الدى. جيىرما جەتىنشى مامىر كۇنى وسكەمەندىك الا دوپ شەبەرلەرى يراننىڭ «سارمايە بانك» كومانداسىمەن كەزدەسىپ, ولاردى 3:0 ەسەبىمەن ويسىراتا جەڭىپ, شيرەك فينال جولداماسىن يەلەندى.
ازامات قاسىم,
«ەگەمەن قازاقستان»
وسكەمەن
