وبلىس اۋماعى 14 ميلليون 430 مىڭ گەكتار القاپتى الىپ جاتىر, ال ونىڭ 4 ميلليون 430 مىڭ گەكتارى ورمان قورىنىڭ جەرلەرى بولىپ سانالادى. ورمان قورىنىڭ 2 ميلليون 234 مىڭ گەكتارىنا اعاش ەگىلگەن. سونىمەن بىرگە, 10 ميلليون 489 مىڭ گەكتاردان استام جەردى اۋىلشارۋاشىلىق, شابىندىق, ەگىستىك جانە جايىلىمدىق القاپتار الىپ جاتىر.
وبلىستىق توتەنشە جاعدايلار دەپارتامەنتىنىڭ وتكەن جىلعى تالداۋى بويىنشا, ورتكە قارسى ەرىكتى قۇرىلىمداردىڭ ءتيىستى تەحنيكامەن جانە قۇرال جابدىقتارمەن جابدىقتالۋى مەن تابيعي ورتتەردى سوندىرۋدەگى تاجىريبە دەڭگەيى كەيبىر اۋدانداردا ءالى دە تومەن. باعدات دانيلوۆ تالاس, جامبىل, قورداي, مويىنقۇم اۋداندارى ورتكە قارسى ەرىكتى قۇرىلىمداردى جاۋىنگەرلىك كيىممەن, بايلانىس قۇرالدارىمەن جابدىقتاۋ جۇمىسىن مۇلدەم جۇرگىزبەگەنىن جەتكىزدى.
«مويىنقۇم, جۋالى, سارىسۋ اۋداندارىندا ءورتتى سوندىرۋگە ارنالعان تەحنيكانىڭ سانى وتە از, شامامەن ءار اۋىلدا تەك قانا ءبىر تەحنيكا بار. ول بۇزىلعان جاعدايدا ونى دالا ورتىنە پايدالانۋعا مۇمكىندىك بولمايدى. تالاس, بايزاق, جامبىل, ت.رىسقۇلوۆ, شۋ, مويىنقۇم جانە جۋالى اۋداندارىنداعى ورتكە قارسى ەرىكتى قۇرىلىمدار اسپالى ءورت سوندىرگىشتەرمەن جابدىقتالماعان جانە بايزاق, مەركى, تالاس, شۋ, مويىنقۇم جانە سارىسۋ اۋداندارى ءورت موتوپومپاسىمەن قامتاماسىز ەتىلمەگەن. بۇل كەمشىلىكتەر ەرىكتى قۇرىلىمداردىڭ ءورت ورنىنا ۋاق-
تىلى كەلمەۋىنە, ءورتتىڭ ۇلكەن اۋماققا تارالۋىنا اسەر ەتەدى», − دەدى دەپارتامەنت باسشىسى.
ءورت – اسا قاتەرلى جاۋ. سوندىقتان دا, بۇعان بەي-جاي قاراۋعا بولمايدى. ال وبلىستى باسىپ وتەتىن «باتىس ەۋروپا – باتىس قىتاي» كولىك ءدالىزىنىڭ بويى تال-داراق پەن ەگىسكە تولى. تاسجولدىڭ قوس قاپتالىن كومكەرگەن ەگىستى قاتاڭ قاداعاعا الۋ قاجەت-اق.
ارا-تۇرا جاۋىن-شاشىن بولىپ تۇرعانىمەن, سوڭعى كەزدەرى وڭىردە كۇننىڭ كۇرت ىسۋى ورىن الىپ وتىر. سونداي-اق, سۋعا شومىلۋ ماۋسىمى دا باستالىپ كەتتى. اسىرەسە, كوپشىلىك تاراز قالاسىنداعى «زەربۇلاق» جانە قاراتاۋ قالاسىنداعى «جارتاس» كولىنە, سونداي-اق, جاڭاتاس قالاسىنداعى قالالىق جاعاجايعا ءجيى بارادى. ودان بولەك, وڭىردە وزەن-كول بارشىلىق. جۋىردا عانا سۋعا ءتۇسۋ دەرەگى بويىنشا وبلىستا ادام ءولىمى تىركەلگەن بولاتىن. ناقتى ايتساق, 14 مامىر كۇنى ت.رىسقۇلوۆ اۋدانى, كوگەرشىن اۋىلىنىڭ 7-سىنىپ وقۋشىلارى مەن سىنىپ جەتەكشىلەرى تاۋ بوكتەرىنە ساياحاتقا شىققان. ساياحاتتىڭ سوڭى قايعىلى جاعدايمەن اياقتالىپ, «كوگەرشىن» وزەنىنىڭ جينالعان سۋىنا ابايسىزدا قۇلاپ كەتكەن 2004 جىلى تۋعان اعىباي قارىنتاي مەن ەربول نۇربەك سۋعا باتقان. وبلىستىق ءبىلىم باسقارماسىنىڭ باسشىسى سۇلۋشاش قۇرمانبەكوۆا بۇل ماسەلەگە اۋەلى اتا-انالاردىڭ جاۋاپسىزدىعى سەبەپ بولعانىن ايتتى. «بالالاردىڭ سىنىپ جەتەكشىلەرىمەن تاۋعا ساياحاتتاپ كەتكەنىن مەكتەپ ديرەكتورى دا, ونىڭ ورىنباسارى دا بىلمەگەن. ءتىپتى, بالالاردى سىنىپ جەتەكشىلەرى تاۋعا جۇك كولىگىمەن اپارعان. بۇل ەشقانداي تالاپقا ساي كەلمەيدى», دەيدى باسقارما باسشىسى. بۇل وقيعادان كەيىن سىنىپ جەتەكشىسى جۇمىسىنان بوساتىلىپتى.
قاي كەزدە دە ءتىلسىز جاۋعا توسقاۋىل قاجەت. ءورتتىڭ دە, سۋدىڭ دا ارتىندا ادامنىڭ تاعدىرى تۇر. قاس-قاعىم ساتتە قالىڭ ورماننىڭ ءوزىن كۇلگە اينالدىرىپ جىبەرەتىن ورتپەن, جازىم بولسا تۇڭعيىعىنا تارتىپ كەتەتىن سۋدىڭ دا ادام ءۇشىن قاۋپى باسىم.
حاميت ەسامان,
«ەگەمەن قازاقستان»
جامبىل وبلىسى
