كوللەدجدىڭ الاش يدەياسى مەن الاش قايراتكەرلەرىنىڭ مۇراسىن ناسيحاتتاۋداعى ءىس-تاجىريبەسىن وبلىستاعى وزگە ءبىلىم وردالارىمەن ءبولىسۋ ماقساتىندا قولعا الىنعان سەمينار-پراكتيكۋمنىڭ اياسىندا بىرقاتار تاعىلىمدى ءىس-شارالار ۇيىمداستىرىلدى. قوناقتار «الاش» ەلەكتروندى كىتاپحاناسىنىڭ جۇمىسىمەن تانىسىپ, «الاش ارىستارى: سوڭعى ءسوز, سوڭعى سۋرەت» اتتى فوتوگالەرەيانى تاماشالادى. ءاليحان بوكەيحانوۆ, احمەت بايتۇرسىنوۆ باستاعان بىرنەشە الاش قايراتكەرىنىڭ اتىلار الدىنداعى سوڭعى سۋرەتتەرى ىلىنگەن فوتوگالەرەيانى كورگەن بەلگىلى ادەبيەتتانۋشى عالىم اراپ ەسپەنبەتوۆ تولقىپ, تەبىرەنە سويلەدى.
«سەمەيدەگى الاش قايراتكەرلەرىنە قاتىسى بار تاريحي عيماراتتار مەن ەسكەرتكىشتەردىڭ كوپشىلىگىن ساقتاي المادىق. ابايدىڭ العاشقى مۋزەيى تۇرعان عيمارات جوق. مۇحتار اۋەزوۆ تۇسكەن عيمارات جوق. قالاداعى الاشتىڭ الىپتارىنىڭ ءىزى قالعان, قولدارىنىڭ تابى قالعان, ءا.مارعۇلان, ق.ساتباەۆ, ج.ايماۋىتوۆ, ت.جومارتباەۆ, ب.سارسەنوۆ, ق.نۇرمۇحامەتوۆ سىندى تۇلعالار ءبىلىم العان, قىزمەت ەتكەن, بۇزىلماي ساقتالعان ساناۋلى عيماراتتىڭ ءبىرى – وسى ءبىلىم ورداسى. پەداگوگيكالىق كوللەدجدىڭ جاساپ جاتقان جۇمىستارى جاستاردىڭ تاربيەسىنە زور كومەگىن تيگىزەدى. الاش ارىستارى سوڭعى ءسوزىن ايتىپ, سوڭعى سۋرەتتەرى تۇسىرىلگەنىنشە قانشاما ازاپتى باستان كەشىردى. سوندىقتان الاشتى تانۋ, الاش ارىستارىن ارداقتاۋ باعىتىنداعى جۇمىستار ۇنەمى, جۇيەلى تۇردە جۇرگىزىلۋى ءتيىس», دەيدى عالىم.
بۇل كۇنى شاھارداعى اسان وماروۆ, قۇسمىليا نۇرقاسىم, تۇردىقۇل شاڭباي, مۇراتبەك كەنەمولدين سىندى زيالى قاۋىم وكىلدەرى استاناداعى ەۋرازيا ۇلتتىق ۋنيۆەرسيتەتىنىڭ قىزمەتكەرى, الاشتانۋشى ەرلان سايلاۋبايمەن ونلاين-رەجىمدە پىكىر الماسىپ, الاش تاقىرىبىنداعى ويلارىن ورتاعا سالدى.
شارا سوڭىندا الاش قايراتكەرلەرىنە ارناپ قۇران قاتىم ءتۇسىرىلىپ, اس بەرىلدى.
ازامات قاسىم,
«ەگەمەن قازاقستان»
شىعىس قازاقستان وبلىسى
