شاراعا قاراعاندى وبلىستىق ىشكى ىستەر دەپارتامەنتى باستىعىنىڭ ورىنباسارى, پوليتسيا پولكوۆنيگى ارداق ىنتىقباەۆ, بۇقار جىراۋ اۋدانىنىڭ اكىمى نۇركەن كوبجانوۆ, سونداي-اق, قىزمەت بابىندا قازا بولعان قىزمەتكەرلەردىڭ تۋعان-تۋىستارى, ىشكى ىستەر ورگانىنىڭ ارداگەرلەرى جانە اۋداندىق ىشكى ىستەر باسقارماسىنىڭ جەكە قۇرامى مەن اۋدان تۇرعىندارى قاتىستى.
«بۇگىن قوعامدىق قاۋىپسىزدىكتى قاداعالاپ, ءبىز بەيبىت زاماندا قارۋلانعان قىلمىسكەرلەردىڭ قولىنان قازا بولعان ارىپتەستەرىمىزدى ەسكە الىپ, ولاردىڭ ەرلىگىن كەلەشەك ۇرپاققا ناسيحاتتاۋ ماقساتىندا اۋداندىق ىشكى ىستەر باسقارماسىنىڭ اۋلاسىندا ارىپتەستەرىمىزگە دەگەن قۇرمەت رەتىندە مەموريالدىق تاقتا تاسىن اشۋعا جينالىپ وتىرمىز. وكىنىشكە قاراي, جىل وتكەن سايىن ارتىنا وشپەس ءىز قالدىرىپ, ەل تىنىشتىعىن ساقتاۋ جولىندا قازا بولعان قىزمەتكەرلەردىڭ ەسىمى كوبەيىپ كەلەدى. سوندىقتان دا انتىنا ادال بەرىلىپ, اقتىق دەمى قالعانشا قىزمەت اتقارعان ءتارتىپ ساقشىلارىن ءبىز ەشقاشان ۇمىتپايمىز, كەرىسىنشە وسىنداي يگىلىكتى ءىس-شارالار جاساپ, ولاردىڭ ەسىمىن قاشاندا ۇلىقتاپ وتىرامىز», دەدى مەموريالدىق تاقتا تاسىن اشۋ سالتاناتىندا وبلىستىق ىشكى ىستەر دەپارتامەنتى باستىعىنىڭ ورىنباسارى ارداق ىنتىقباەۆ.
پوليتسيا پولكوۆنيگى ارداق قابىكەن ۇلىنىڭ سوزىنەن كەيىن ءبىر مينۋت ۇنسىزدىك جاريالانىپ, اسپانعا ءۇش مارتە وق اتىلدى.
وسىدان كەيىن 2001 جىلدىڭ 8 مامىرىندا بۇزاقى توپتىڭ زاڭعا قايشى ارەكەتىن توقتاتۋ بارىسىندا قازا بولعان بۇقار جىراۋ اۋداندىق ىشكى ىستەر باسقارماسى تەلمان پوليتسيا ءبولىمى, قۋشوقى اۋىلىنىڭ ۋچاسكەلىك پوليتسيا ينسپەكتورى بولعان قايرات حامۋتوۆتىڭ جارى گۇلنار حامۋتوۆا ءسوز سويلەپ, اسىل ەرىن ۇمىتپاي مەموريالدىق تاقتا تاسىن اشىپ, كۇللى اۋدان تۇرعىندارىن ۇلىقتاپ جاتقان دەپارتامەنت, اۋدان اكىمدىگى مەن اۋداندىق ىشكى ىستەر باسقارماسىنىڭ باسشىلىعىنا العىسىن ءبىلدىردى.
مەموريالدىق تاقتا تاسىنىڭ اشىلۋ سالتاناتىنان كەيىن اۋداندىق اكىمدىكتىڭ ءماجىلىس زالىندا اۋدان اكىمدىگى, ىشكى ىستەر ورگانى قىزمەتكەرلەرىنىڭ قاتىسۋىمەن «جاستاردى پاتريوتتىق تۇرعىدا تاربيەلەۋ» تاقىرىبىندا دوڭگەلەك ۇستەل ءوتتى.
بۇقار جىراۋ اۋدانىنداعى يگىلىكتى ءىس-شارانىڭ سوڭى اۋدان ورتالىعىنداعى مادەنيەت ۇيىندە وبلىستىق ىشكى ىستەر دەپارتامەنتىنىڭ كوركەم ونەرپازدار ۇيىمى دايىنداعان كونتسەرتتىك باعدارلامامەن اياقتالدى.
ميراس اسان,
«ەگەمەن قازاقستان»
قاراعاندى وبلىسى
