پارلامەنت دەپۋتاتتارى كوشپەلى وتىرىس وتكىزبەس بۇرىن بىرقاتار ءوندىرىس نىساندارىن ارالاپ, وبلىستاعى قۇرىلىس, تۇرعىنداردىڭ اۋىزسۋمەن قامتىلۋ جاعدايىمەن تانىستى. تەرەكتى اۋدانى, نوۆوپاۆلوۆ اۋىلىنداعى سۋ قۇبىرىن كۇردەلى جوندەۋ بارىسىن كورىپ, اقسۋات اۋىلدىق وكرۋگىندە ورنالاسقان «تەرەكتى ماي كومبيناتى» جشس جۇمىسىمەن تانىستى جانە دولين اۋىلدىق وكرۋگىندەگى «ماحورين» شارۋا قوجالىعىن ارالاعان دەپۋتاتتار ودان ءارى ءبورلى اۋدانىنىڭ بەرەزوۆ, بەستاۋ ەلدى مەكەندەرىنىڭ تۇرعىندارىمەن جۇزدەسىپ, اقساي قالاسىندا سالىنعان 100 پاتەرلىك تۇرعىن ءۇي قۇرىلىسىندا بولدى.
– باتىس قازاقستان وبلىسىنىڭ ەكى اۋدانىن ارالاپ, ونداعى اتقارىلىپ جاتقان جۇمىستاردىڭ بارىسىمەن تانىستىق. ءوڭىر وركەندەپ كەلەدى, جاقسى ناتيجەلەر بار. جالپى, باتىس قازاقستان وبلىسىنىڭ اۋىل-ايماقتارىنا ورتالىقتاندىرىلعان سۋ تارتۋ ءۇشىن 2015-2017 جىلدارى رەسپۋبليكالىق بيۋدجەتتەن 8 ملرد 93 ملن تەڭگە بولىنگەن ەكەن. بيىلدىڭ وزىندە عانا 5 ملرد 637 ملن تەڭگە قاراجات وسى ماقساتقا ءبولىندى. الداعى جىلى 1 ملرد 650 ملن تەڭگە قاراستىرۋ ۇسىنىسى ءتۇسىپ وتىر, ونى ءبىز, دەپۋتاتتار, قولدايمىز. دەگەنمەن, باتىس قازاقستان وبلىسى ءۇشىن وتە وزەكتى ەكى ماسەلە بار: ونىڭ ءبىرى – وڭىردەگى اۆتوجولداردىڭ جاي-كۇيى, ەكىنشىسى – تۇرعىنداردىڭ تازا اۋىزسۋمەن قامتۋ كورسەتكىشىنىڭ تومەندىگى, – دەدى ەكونوميكالىق رەفورما جانە وڭىرلىك دامۋ كوميتەتىنىڭ توراعاسى نۇرتاي سابيليانوۆ.
بيىل باتىس قازاقستان وبلىسىندا «وڭىرلەردى دامىتۋ-2020» جəنە «نۇرلى جول» باعدارلامالارى اۋقىمىندا 5 637 ملن تەڭگەگە 33 جوبا جۇزەگە اسىرىلادى. قازىرگى احۋال مىناداي: بقو-داعى 443 ەلدى مەكەننىڭ 164-ءى نەمەسە 37 پايىزى عانا تازا اۋىزسۋمەن قامتىلعان. 275 ەلدى مەكەن ورتالىقتاندىرىلعان سۋ جۇيەسىنە قوسىلماعان. ءتورت اۋىل اۋىزسۋدى سىرتتان تاسىمالدايدى.
– قازاقستان رەسپۋبليكاسى بويىنشا حالىقتىڭ تازا سۋمەن قامتىلۋ ورتاشا كورسەتكىشى – 52% ەكەندىگىن ەسكەرسەك, باتىسقازاقستاندىقتاردىڭ جاعدايى الاڭداتارلىق كۇيدە. بيىل جوسپارلانعان جۇمىستاردى اتقارعاننىڭ وزىندە بۇل كورسەتكىش 40%-عا عانا كوتەرىلەدى. سوندىقتان, بۇل باعىتتا اتقارىلاتىن ءىس ءالى كوپ, – دەدى نۇرتاي ساليح ۇلى.
كوشپەلى وتىرىستا تالقىلانعان تاعى ءبىر ماسەلە – قۇرىلىس سالاسىنداعى ماسەلەلەر بولدى. پارلامەنت دەپۋتاتى باقتيار مəكەن «100 ناقتى قادام» ۇلت جوسپارىنىڭ 46-49-قادامدارى بويىنشا جاسالىپ جاتقان جۇمىستاردىڭ بارىسىن ايتىپ بەردى. ينۆەستيتسيالار جانە دامۋ ۆيتسە-ءمينيسترى ر.سكليار ساۋلەت-قۇرىلىس قىزمەتى جانە سۋمەن جابدىقتاۋ سالاسىنداعى باقىلاۋ جانە قاداعالاۋ جۇيەسىن جەتىلدىرۋدىڭ وزەكتى ماسەلەلەرى جونىندە بايانداما جاسادى.
«اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ە.رامازانوۆ «قۇرىلىس سالاسىندا ۋاكىلەتتى ورگانداردىڭ بيزنەسكە قاتىستى باقىلاۋ-قاداعالاۋ فۋنكتسيالارىن جۇزەگە اسىرۋ پراكتيكاسىنىڭ جەكەلەگەن ماسەلەلەرى» اتتى ارنايى بايانداما جاسادى. ە.رامازانوۆ ءبىر اي بۇرىن ءماجىلىس دەپۋتاتتارىمەن كەزدەسۋ ءوتىپ, بىرىككەن ارەكەت جوسپارى تالقىلانعانىن ايتتى.
– بۇگىنگى كەزدەسۋدى جۇيەلى ۇيىمداستىرىپ, كونسترۋكتيۆتى كەڭەس جاساعانى ءۇشىن باتىس قازاقستان وبلىسىنىڭ باسشىلىعىنا راحمەت ايتامىن. سىزدەردىڭ نازارلارىڭىزعا قۇرىلىسشىلار الدىنداعى كەيبىر ءتۇيىندى ماسەلەنى سالعىم كەلەدى. بۇل – مەملەكەتتىك ساۋلەت-قۇرىلىس باقىلاۋ جانە تەحنيكالىق قاداعالاۋ ورگاندارىنىڭ ارەكەتىنە قاتىستى. وزگە قاداعالاۋشى مەكەمەلەردىڭ تەكسەرۋ جيىلىگى, ءتارتىبى زاڭمەن رەتتەلىپ, پروكۋراتۋرا ورگاندارىنا تىركەلەتىن بولسا, جوعارىداعى ەكى مەكەمە قۇرىلىس نىساندارىن كۇن سايىن شەكسىز تەكسەرە الادى. بۇل ءوز كەزەگىندە كاسىپكەرلىككە كەدەرگى جاساۋى مۇمكىن, سىبايلاس جەمقورلىققا سەبەپ بولۋى مۇمكىن. مسقب (گاسك) ءتىپتى تەك قۇرىلىس ساپاسىن ەمەس, قوسىمشا وكىلەتتىكتەردى دە موينىنا جۇكتەپ العان, نىسانداعى تازالىق, قۇرىلىس قورشاۋى, ونداعى جارناماعا بايلانىستى دا شاعىم جاساعان وقيعالار كەزدەستى. سوندىقتان, بۇل ورگانداردىڭ ناقتى مىندەتىن بەلگىلەپ, ءاربىر تەكسەرۋ فاكتىسى تىركەلۋى ءتيىس, – دەدى ول ءوزىنىڭ سوزىندە.
«وەككا» جشس باس ديرەكتورى, قازاقستان رەسپۋبليكاسى ينجينيرينگتىك كومپانيالار وداعىنىڭ وكىلى قۇندىز نۇروۆ تا جوبالاۋ جانە قۇرىلىس سالاسىنداعى نورماتيۆتىك بازانى جەتىلدىرۋدىڭ كەيبىر ماسەلەلەرىنە توقتالىپ ءوتتى. ول وسىدان 30 جىل بۇرىن باتىس قازاقستان وڭىرىندە قىزمەت اتقارعانىن, سوندىقتان, وسى ەكى كۇندىك ساپار جۇرەگىنە جىلى تيگەنىن ايتىپ, وڭىردە قۇرىلىس سالاسىندا كوپ جۇمىس اتقارىلعانىنا ريزاشىلىق ءبىلدىردى.
وتىرىستا ورال قالاسىنىڭ əكىمى ناريمان تورەعاليەۆ 2017 جىلى مەملەكەتتىك باعدارلاما اياسىندا 11,1 ملرد تەڭگەگە شاھاردا 8 ءۇي تۇرعىزىلىپ, 1 152 پəتەر پايدالانۋعا بەرىلەتىنىن ايتتى. وتكەن جىلى وبلىس ورتالىعىندا كوپقاباتتى 11 ءۇي تۇرعىزىلىپ, 1 247 پاتەر يەلەرىنە بەرىلگەن. وسىلايشا, 4 مىڭنان اسا ورالدىق قونىس تويىن تويلاپتى.
ءبورلى اۋدانىنىڭ اكىمى الديار حالەلوۆ ءوندىرىستى اۋداندا اتقارىلىپ جاتقان جۇمىستاردىڭ ەسەبىن بەرىپ ءوتتى. وڭىردەگى بەلگىلى قۇرىلىس كومپانياسى «بولاشاق-ت» جشس-ءنىڭ اتقارۋشى ديرەكتورى نۇرجان ساحاروۆ بيىل 900 پاتەرلىك 5 ءۇيدىڭ قۇرىلىسى اياقتالاتىنىن ايتتى. «وتدەلستروي» جشس ديرەكتورى ۆالەنتينا ميحنو دا ءوز ۇجىمىندا 11 ۇلتتىڭ وكىلى تاتۋ-ءتاتتى قىزمەت ەتىپ, تالاي جەتىستىككە جەتكەنىن ماقتانىشپەن جەتكىزدى.
كوشپەلى وتىرىستا قۇرىلىس سالاسىنا قاتىستى زاڭنامالىق اكتىلەردى جەتىلدىرۋ, سوعان بايلانىستى əكىمشىلىك كەدەرگىلەردىڭ تۋىنداۋى, قۇرىلىس ساپاسى تومەندەپ, مەرزىمىندە تاپسىرىلماۋى جəنە مەملەكەتتىك پورتال ارقىلى قۇجات رəسىمدەۋگە قاتىستى كەزدەسەتىن مəسەلەلەردى ءمəجىلىس دەپۋتاتتارى كەڭىنەن تالقىلادى.
قازبەك قۇتتىمۇرات ۇلى,
«ەگەمەن قازاقستان»
ورال
