قازاق-وزبەك بيزنەس فورۋمى اياسىندا «GM Uzbekistan» اكتسيونەرلىك قوعامى مەن «سارىارقااۆتوپروم» جاۋاپكەرشىلىگى شەكتەۋلى سەرىكتەستىگى اراسىنداعى كەلىسىمنىڭ قورىتىندى ساتىسىنا ءوتۋ تۋرالى حابارلانعان بولاتىن. General Motors Korea ماماندارى جۇرگىزگەن اۋديت قورىتىندىسى بويىنشا قوستانايداعى «سارىاركااۆتوپروم» زاۋىتىنىڭ وندىرىستىك الاڭى ساپا ستاندارتتارىنىڭ بارلىق تالابىنا جاۋاپ بەرەدى. وسىلايشا, وزبەكستان مەن قازاقستان ماشينا وندىرۋشىلەرى اراسىنداعى ارىپتەستىك قاتىناس دامۋدىڭ جاڭا دەڭگەيىنە كوتەرىلدى.
Ravon Nexia R3 ماركاسى زاۋىتتىڭ قازىرگى قۋاتىندا وندىرىلەدى. كەلىسىمنىڭ كەلەسى ساتىسىندا اۆتوموبيل ءوندىرىسىنىڭ جەلىسى كەڭەيتىلەدى. بيۋدجەتتىك اۆتوموبيلدەر اراسىندا Ravon Nexia R3 قازىر تۇتىنۋشىلار نازارىن اۋدارىپ وتىر. قازاقستاندا قۇرالعاندىقتان بۇل كولىك نەسيە جەڭىلدىگى بار باعدارلاماعا دا ىلىنەدى. 2017 جىلدىڭ 4 ايىندا قازاقستاندىقتار سۇرانىمىنا يە بولۋ جاعىنان اۆتوموبيلدەر اراسىندا كوش باستاپ تۇر. ول ساپالى ماشينانىڭ قولجەتىمدى باعاسىنا دا بايلانىستى. ماشينا قازاقستان نارىعىندا كوپتەپ ساتىلاتىن بولادى.
ءنازيرا جارىمبەتوۆا
«ەگەمەن قازاقستان»
قوستاناي
