كىتاپتىڭ تۇساۋكەسەر راسىمىنە اقىن جاركەن بودەش, «ەر جانىبەك» قوعامدىق قورىنىڭ پرەزيدەنتى جەڭىس تۇركيا, عالىم ءنابيجان مۇقامەتحان ۇلى, جازۋشى بولات باپاي, اقىن الماس احمەتبەك ۇلى, باباقۇمار حينايات, باقىتبەك ءبامىش سياقتى بىرقاتار قالامگەرلەر مەن ومارعازى ايتاننىڭ ءدام-تۇزداس, سىرلاس بولعان زامانداستارى, تۋعان-تۋىستارى قاتىسىپ, اقىننىڭ ءومىرى, شىعارماشىلىعى جايلى ەستەلىكتەرىمەن ءبولىستى.
1931 جىلى شىڭجاڭنىڭ تارباعاتاي ايماعىندا دۇنيەگە كەلىپ, 1957 جىلى شىڭجاڭ ۋنيۆەرسيتەتىنىڭ ادەبيەت فاكۋلتەتىن بىتىرگەن سوڭ سول وڭىردەگى بىرقاتار باسىلىمداردا قىزمەتتەر اتقارعان ومارعازى ايتان قىتايداعى «مادەنيەت توڭكەرىسى» ناۋقانىندا اسىرە قىزىل ساياسات سالدارىنان 1959 جىلى جەر اۋدارىلىپ, اۋىر ەڭبەككە جەگىلگەن. 20 جىل بويى ساياسي كوزقاراسى ءۇشىن تۇرمەدە وتىرعان اقىن تەك 1978 جىلى قىتاي ساياساتىنىڭ وڭالۋىنا وراي اقتالىپ, قوعامدىق قىزمەتىنە قايتا ورالادى. «قۇس جولى», «تۇيە», «ساۋكەلە» سىندى جىر جيناقتارىمەن قاتار, «اڭ شادىرىن وق تابار», «تارازى» روماندارى مەن كوپتەگەن درامالىق شىعارمالار جازعان قالام يەسىنىڭ ومىردەن وتكەنىنە بيىل تۋرا 20 جىل تولىپ وتىر.
اقىن جاركەن بودەش: «قىتايداعى قازاق ادەبيەتىن جوعارى ساتىعا كوتەرگەن از عانا اقىن-جازۋشىلاردىڭ ءبىرى ومىكەڭ ەدى. ول ومىرىندە «مەن اقىنمىن!» دەپ كەۋدە ۇرىپ كورمەگەن جان بولدى» دەي كەلە, ومارعازى ايتان ۇلى قايتىس بولعاندا جازعان ولەڭىن جينالعان جىرسۇيەر قاۋىمعا وقىپ بەردى.
ال اقىننىڭ شاكىرتى الماس احمەتبەك: «ومارعازى ايتان – شىڭجاڭ ولكەسىندەگى قازاق اقىندارىنىڭ ماياگى ءتارىزدى ەدى. ءبىر وكىنىشتىسى, اقىننىڭ پوەزياسى قازاقستاندا كەڭىنەن ناسيحاتتالماي جاتىر. شىن مانىندە, بۇگىنگى جاستاردىڭ ىزدەنىستەرىنە, سۇرانىستارىنا, بۇگىنگى ليريكانىڭ تالاپتارىنا, جۇرتتىڭ ىشكى كوڭىل-كۇيلەرىنە جاۋاپ بەرەتىن ولەڭدەر ومىكەڭدە كوپتەپ كەزدەسەدى» دەگەن پىكىر ءبىلدىردى.
قازاق ولەڭىنىڭ كەڭىستىگىن تاڭعاجايىپ تالانتىمەن كەڭەيتە بىلگەن تارلان اقىننىڭ تۋىندىلارى, قازاق پوەزياسىندا ەشكىمگە ۇقساماس دارا جولىن سالىپ كەتكەن اقىننىڭ بۇرالاڭ تاعدىرى مەن اسقان اسۋلارى, بيىك پاراساتى مەن اسىل ادامگەرشىلىگى, شىعارماشىلىعىنداعى ءبىتىم بولمىسى بولەك ورنەكتەر اتالمىش باسقوسۋداعى اڭگىمە ارقاۋىنا اينالدى.
جازۋشى قويشىبەك مۇباراك پەن اقىن مۇرات شايماران تىكەلەي اتسالىسا ءجۇرىپ جارىققا شىققان «قۇستار قايعىسى» جىر جيناعىنا ومارعازى ايتاننىڭ ءار جىلدارى جازىلعان تەرەڭ ويلى, وزگەشە سارىندى ولەڭدەرى مەن ايتارى سالماقتى داستاندارى توپتاستىرىلعان.
ميرا بايبەك,
«ەگەمەن قازاقستان»
الماتى
