كونفەرەنتسيا جۇمىسىن ۋنيۆەرسيتەت رەكتورى, پەداگوگيكا عىلىمدارىنىڭ دوكتورى ماحمەتعالي سارىبەكوۆ جۇرگىزىپ وتىردى. سونداي-اق, ءىس-شاراعا قازاقستان رەسپۋبليكاسىنىڭ مەملەكەتتىك ەلتاڭباسىنىڭ اۆتورى, قۇرمەتتى ساۋلەتشى جانداربەك مالىبەكوۆ, قازاقستان رەسپۋبليكاسى پارلامەنتى سەناتىنىڭ دەپۋتاتى, مەملەكەتتىك رامىزدەر جونىندەگى رەسپۋبليكالىق كوميسسيانىڭ مۇشەسى تولەۋبەك مۇقاشەۆ, وبلىس اكىمىنىڭ ورىنباسارى ەرقانات مانجۋوۆ جانە مەملەكەتتىك ورگانداردىڭ, سونداي-اق جوعارى وقۋ ورىنداردىڭ باسشىلارى, قوعام قايراتكەرلەرى مەن قوعامدىق پىكىر كوشباسشىلارى, ستۋدەنتتەر, ۇكىمەتتىك ەمەس ۇيىمدار جەتەكشىلەرى مەن بۇقارالىق اقپارات قۇرالدارىنىڭ وكىلدەرى قاتىستى.
اۋەلى مەملەكەتتىك رامىزدەر تۋرالى ارنايى دايىندالعان دەرەكتى فيلم جۇرتشىلىق نازارىنا ۇسىنىلدى. بۇدان كەيىن وبلىس اكىمىنىڭ ورىنباسارى ەرقانات مانجۋوۆ جينالعان قاۋىمدى ەل رامىزدەرىنىڭ شيرەك عاسىرلىق مەرەيتويىمەن قۇتتىقتادى.
«مەملەكەتتىك رامىزدەر – بۇل كەز كەلگەن مەملەكەتتىڭ بىرتۇتاستىعىن بەينەلەيدى. ونىڭ اجىراماس اتريبۋتتارىنىڭ ءبىرى. مەملەكەتتىك تۋ, ەلتاڭبا, ءانۇران ەل تاۋەلسىزدىگىن عاسىرلار بويى اڭساعان حالقىمىزدىڭ ورىندالعان ارمانىنىڭ بەلگىسى. تۇعىرى بيىك تاۋەلسىزدىكتىڭ تىرەگى. ازات ەلدىڭ ايشىقتى سيمۆولى.
دانا بابالارىمىز ارتىندا «تۋى بيىك ەلدىڭ – تۇعىرى دا بيىك» دەگەن اتالى ءسوز قالدىرعان. حالقىمىز ارقاشاندا تۋىن قاستەرلەپ, بيىككە كوتەرگەن. تۋدى ۇستاۋدىڭ جاۋاپتى جۇگى جىگىتتىڭ – جىگىتىنە, باتىردىڭ – باتىرىنا تاپسىرىلعان. قيىن كەزەڭدە قول باستاعان باتىرلارىمىز قاسيەتتى تۋىن قۇلاتپاي, جاۋىنا بەرمەي, جانىنان دا جوعارى قويعان. بۇل – بۇگىنگى ۇرپاققا ۇلگى-ونەگە», دەدى.
ءوز كەزەگىندە كونفەرەنتسيانىڭ قۇرمەتتى قوناقتارى جانداربەك مالىبەك ۇلى مەن تولەۋبەك تولەۋ ۇلى ءسوز الىپ, مەملەكەتتىك رامىزدەردىڭ قالىپتاسۋى توڭىرەگىندە اڭگىمە قوزعادى. مەملەكەتتىك رامىزدەر قاشاندا ەلدىكتىڭ بەلگىسى ەكەنىن ايتىپ ءوتتى.
سونداي-اق, كونفەرەنتسيا بارىسىندا ايتۋلى كۇنگە وراي ۇيىمداستىرىلعان «مەملەكەتتىك رامىزدەر – ۇلتتىق ماقتانىش» اتتى وبلىستىق جازبا اقىندار بايقاۋىنىڭ جەڭىمپازدارى مەن جۇلدەگەرلەرى ماراپاتتالدى. اقىندار سايىسىنىڭ باس جۇلدەسىن م.ح.دۋلاتي اتىنداعى تارمۋ-ءدىڭ ستۋدەنتى جاننا باحاتاي جەڭىپ السا, ءبىرىنشى ورىندى ا.بايتۇرسىن ۇلى اتىنداعى گيمنازيانىڭ مۇعالىمى اسەل شارىپبەكقىزى يەلەندى. ەكىنشى ورىندى م.ح.دۋلاتي اتىنداعى تارمۋ-ءدىڭ ستۋدەنتى بەكايدار امانباەۆ ەنشىلەسە, ءۇشىنشى ورىن تاراز تەمىر جول كولىك كوللەدجىنىڭ ستۋدەنتى ەلدوس بوگدىكوۆكە بۇيىردى. جاس اقىندار جۇلدە العان ولەڭدەرىن كوپشىلىك الدىندا وقىپ, قوشەمەتكە بولەندى.
كونفەرەنتسيا سوڭى وبلىستىڭ بەلسەندى جاستارىنىڭ مەملەكەتتىك رامىزدەردىڭ 25 جىلدىعىنا ارنايى دايىنداعان فلەشموبىمەن جالعاستى.
حاميت ەسامان,
«ەگەمەن قازاقستان»
جامبىل وبلىسى
