مونۋمەنتتىڭ جوندەۋدەن كەيىن قالاي وزگەرەتىنىن جانە مەيمانداردى نەسىمەن تاڭعالدىراتىنى تۋرالى استانا اكىمدىگىنىڭ مەديا ورتالىعىنىڭ تىلشىسىنە بەرگەن سۇحباتىندا مادەنيەت وشاعىنىڭ جوندەۋ جۇمىسىمەن اينالىساتىن كومپانيا وكىلى باۋىرجان ساعديەۆ بايانداپ بەردى.
- بۇل نىسان تۇتاس قالانىڭ سيمۆولى بولعاندىقتان قىزىقتى. ءارى ديزاينەرلىك شەشىمى دە ەرەكشە. سوندىقتان ديزاينەرلەردىڭ يدەياسىن تولىق جۇزەگە اسىرۋعا تىرىستىق. جوبا ديزاينىنا سايكەس نىسان 95 پايىزعا دايىن. جالپى, مونۋمەنتتىڭ كۇردەلى جوندەۋ جۇمىسى 10 ماۋسىمعا دەيىن اياقتالادى, - دەدى ب.ساعديەۆ.
ەلىمىزدىڭ باستى سيمۆولىنىڭ كۇردەلى جوڭدەۋ جۇمىسى بيىلعى جىلدىڭ باسىندا باستالدى. جيىرما جىلعا جۋىق ۋاقىت ىشىندە جوندەۋ كورمەگەن نىساننىڭ ەستەتيكالىق كەلبەتى كومىسكىلەنىپ كەتتى. بۇدان بىلاي كەلۋشىلەر نىساننىڭ كۇمبەزىنەن جاڭا كورىنىستى تاماشالاي الادى.
- بىز جەلدەتكىش, اۋا وتكىزگىش, سانتەحنيكانىڭ بارلىعىن جاڭاسىنا اۋىستىردىق. اۋا باپتاعىشتارى بار. ديزاينەر ءستيلى مەن مازمۇنىن وزگەرتتى. وزگەرىستى نىساننىڭ ىشىنەن عانا ەمەس, قاسبەتىنەن-اق بايقاۋعا بولادى, - دەدى ول.
كۇردەلى جوندەۋگە بايلانىستى مونۋمەنت جۇمىسى تولىعىمەن توقتاتىلدى. نىساننىڭ تۇستىك ۇيلەسىمى – اق جانە التىن رەڭكتى بولىپ قالدى. جوڭدەۋگە 100-گە جۋىق ادام جۇمىلدىرىلعان. نىسانداعى توزىعى جەتكەن ءارى شىتىناعان شىنىپاكەتتەرى جاڭاسىنا اۋىستىرىلدى. يتاليالىق تەحنولوگيامەن ازىرلەنگەن شىنى ۆيتراجدارى قاقاعان اياز بەن اپتاپ ىستىققا شىداپ ۇزاق قىزمەت ەتۋى ءتيىس.
«بارلىعىن الماستىردىق. كۇردەلى جۇمىس ىستەلدى. شىنى پاكەتتەرى يتاليادا جاسالعان. وتە ساپالى. ول التىندانعان, سيرەك كەزدەسەتىن شىنى», - دەدى مەردىگەر كومپانيانىڭ وكىلى.
جوباعا سايكەس, 18 شىنى پاكەتى اۋىستىرىلدى. سونىمەن بىرگە جەدەلساتى شاحتاسى باعاندارىنىڭ شىنى پاكەتتەرىن اۋىستىرۋدىڭ كەشەندى شارالارى جۇزەگە اسىرىلدى. جىلۋ شىعىنىن ازايتۋ ءۇشىن ەنەرگيا ۇنەمدەيتىن ەكى قاباتتى شىنىپاكەتتەر ورناتىلدى. وعان قوسا شىنىنى شىتىناۋدان ساقتاپ جوعارى تەمپەراتۋرادا جۇمىس ىستەيتىن ارنايى قۇرىلىمدى سيليكوندى قىمتاقتار پايدالانىلدى.
- شىنىلاردىڭ اراسى جىلۋدى ساقتاپ تۇراتىن ارنايى گازبەن تولتىرىلعان. عيماراتتىڭ ىشىنە كۇردەلى جوندەۋدەن گورى ارلەۋ جۇمىستارى كوپ جۇرگىزىلدى. ياعني, ەدەن توسەمىن ءمارماردان توسەدىك. توبەسى اۋىر كەسكىندەمەدەن تۇرادى, اعاش, مدف جانە كوپدەڭگەيلى توسەمدەر پايدالانىلدى, - دەدى ول.
