راسىمدە جاس ساربازدار قىسقا مەرزىمدە العان ماشىق-داعدىلارىن, سونىڭ ىشىندە قارۋمەن جانە قارۋسىز يگەرگەن ساپتىق امالداردى كورسەتىپ, سالتاناتتى مارشپەن ءجۇرىپ ءوتتى. جينالعان قاۋىم قر مقق وبەكتىلەردى قورعاۋ قىزمەتىنىڭ اسكەري قىزمەتشىلەرىنىڭ شەبەرلىكتەرىن, كاسىپقويلىعىن جانە ۇيلەسىمدىكتەرىن پاش ەتەتىن ارنايى قويىلىمداردى تاماشالادى.
سونداي-اق, پرەزيدەنتتىك ۇرمەلى اسپاپتار وركەسترى مەن قۇرمەت قاراۋىل روتاسى پلاتس-كونتسەرتتىڭ (دەفيلە) جاڭا باعدارلاماسىن كورەرمەن نازارىنا ۇسىندى. «تەمىردەي ءتارتىپ پەن توزىمدىلىككە ۇيرەنۋ ەر ازامات ءۇشىن باعا جەتپەس قاسيەت. ءبارىمىز وتان انانىڭ تىنىشتىعىن كىرپىك قاقپاي كۇزەتۋگە ءتيىسپىز. سىزدەردىڭ قىزمەتتەرىڭىز ءاربىر قازاقستاندىق وتباسىنىڭ تىنىشتىعى مەن ەرتەڭگى كۇنگە دەگەن سەنىمدىلىگىنىڭ كەپىلى. الداعى ءبىر جىلدا جان اياماي قىزمەت ەتىپ, ۇلتتىق نامىسىمىزدىڭ تۋىن بيىكتەن جەلبىرەتىڭىزدەر» دەدى, ساربازداردى قۇتتىقتاۋ سوزىندە مەملەكەتتىك كۇزەت قىزمەتىنىڭ باستىعى گەنەرال-لەيتەنانت امانتاي كۇرەڭبەكوۆ.
سالتاناتتى شاراعا الماتى قالاسى اكىمىنىڭ ورىنباسارى ارمان قىرىقباەۆ, قوعام قايراتكەرلەرى, قر مەملەكەتتىك كۇزەت قىزمەتىنىڭ ارداگەرلەرى, ساربازداردىڭ اتا-انالارى مەن تۋىستارى قاتىستى.
انت قابىلداۋ راسىمىنەن كەيىن ساربازدار قر مەملەكەتتىك كۇزەت قىزمەتىنىڭ الماتى مەن استانا قالالارىنداعى اسكەري بولىمدەرىنە قىزمەت ەتۋگە تاراتىلدى. وندا ولار قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ, باسقا دا كۇزەتىلەتىن ادامدار مەن وبەكتىلەردىڭ قاۋىپسىزدىگىن قامتاماسىز ەتۋ بويىنشا ايرىقشا مىندەتتەردى اتقاراتىن ءداستۇرلى راسىمدەردى ورىنداۋعا, سونىمەن قاتار, مەملەكەتتىك تۋ مەن ەلتاڭبا ەتالوندارىن كۇزەتۋ, «ەكسپو-2017» حالىقارالىق كورمەسىن وتكىزۋگە, شەتەل مەملەكەتتەرىنىڭ باسشىلارىن كۇتىپ الۋ راسىمدەرىنە قاتىساتىن بولادى.
ارمان وكتيابر,
«ەگەمەن قازاقستان»
الماتى
