450 شاقىرىمعا ۇشقان زىمىران جاپونيا جاعالاۋىنا بارىپ قۇلاعان. بۇل ءوز كەزەگىندە جاپونيا ۇكىمەتىنىڭ نارازىلىعىن تۋدىردى
ساراپشىلاردىڭ پىكىرىنشە, وسى سىناق ارقىلى پحەنيان زىمىران تاسىعىش كەمەلەرگە قارسى شابۋىل جاساي الاتىندىقتارىن كورسەتتى.
سولتۇستىك كورەيا وسىلايشا بۇۇ يادرولىق جانە زىمىران سىناقتارىن وتكىزۋگە تىيىم سالۋ تۋرالى رەزوليۋتسياسىن بۇزعانىمەن قويماي, كەرىسىنشە سوڭعى ايلاردا سىناقتاردىڭ سانىن ارتتىرىپ وتىر.
اقش تىنىق مۇحيتى اسكەري كۇشىنىڭ مالىمەتىنشە, زىمىران ەلدىڭ ۆونسان دەگەن ايماعىنان جىبەرىلگەننەن جاپونيا جاعالاۋىنا تۇسكەنگە دەيىن اۋەدە 6 مينۋت ۇشقان.
جاپونيا مينيسترلەر كابينەتىنىڭ باس حاتشىسى يوشيحيدە سۋگانىڭ ايتۋىنشا, زىمىران ەلدىڭ سادو جانە وكي ارالدارىنىڭ ورتاسىنا, ەلدىڭ ماڭىزدى ەكونوميكانىڭ ايماعىنا تۇسكەن.
ال وڭتۇستىك كورەيا اسكەري كۇشىنىڭ وكىلدەرى زىمىراننىڭ 120 مەتر بيىكتىكپەن ۇشقانىن ايتا كەلىپ, ناقتى قانشا زىمىراننىڭ جىبەرىلگەنىنىڭ انىقتالىپ جاتقانىن مالىمدەدى. بۇل ءوز كەزەگىندە بىرنەشە زىمىراننىڭ ۇشىرىلعان بولۋى مۇمكىن ەكەنىن كورسەتەدى.
زىمىران ۇشىرىلعاننان ءبىر كۇن وتكەننەن كەيىن عانا سولتۇستىك كورەيانىڭ مەملەكەتتىك باسىلىمدارى سىناقتىڭ وتكەنىن جاريالادى.
سولتۇستىك كورەيانىڭ «سكاد» اتتى بۇل زىمىرانى جاقىن راديۋستى سوققى بەرۋدە الەمدەگى ەڭ ۇزدىك قارۋلاردىڭ ءبىرى. كەڭەس ۇكىمەتىنىڭ جاساعان قارۋىنىڭ جەتىلدىرىلگەن ءتۇرى 1000 شاقىرىم قاشىقتىققا دەيىن الادى.
سوڭعى اپتادا وسىعان دەيىن جىبەرىلگەن ەكى زىمىران ورتا راديۋستى سوققى بەرۋ زىمىرانى ەدى. سولتۇستىك كورەيا ەكى زىمىران سىناعىنىڭ دا ءساتتى جۇزەگە اسىرىلعانىن مالىمدەدى.
ساراپشىلاردىڭ پىكىرىنشە, سولتۇستىك كورەيا ەندى سولتۇستىك امەريكا قۇرلىعىنا دەيىن جەتەتىن زىمىراندى دايىنداپ جاتقان كورىنەدى.
