مەرەيتويلى داتاعا وراي ادەبيەت جانە ونەر ينستيتۋتى, قازاقستان جازۋشىلار وداعى, ءمۇسىلىم بازارباەۆ اتىنداعى №38 گيمنازيانىڭ ۇيىمداستىرۋىمەن ء«مۇسىلىم بازارباەۆ مۇراسى جانە ۇلتتىق قۇندىلىقتار» اتتى رەسپۋبليكالىق عىلىمي-تەوريالىق كونفەرەنتسيا ءوتتى. قازاق زيالى قاۋىمىنىڭ باسىن قوسقان ءىرى جيىنعا قازاقستاننىڭ حالىق جازۋشىسى ءابدىجامىل نۇرپەيىسوۆ, ۇعا اكادەميگى سەرىك قيراباەۆ, سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى, قازاقستان جازۋشىلار وداعىنىڭ توراعاسى نۇرلان ورازالين, ا.بايتۇرسىنوۆ اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك, م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجان, ءال-فارابي اتىنداعى قازۇۋ رەكتورىنىڭ كەڭەسشىسى, اقىن, جۋرناليست باۋىرجان جاقىپ جانە ءمۇسىلىم بازارباەۆتىڭ جارى, فيلولوگيا عىلىمدارىنىڭ كانديداتى گۇلباراش بايتوعاەۆا قاتىستى. پروفەسسور ءمۇسىلىم بازارباەۆتىڭ قوعامدىق ەڭبەگى, ۇلتتىق عىلىمعا قوسقان ولشەۋسىز ۇلەسى جايىندا كەڭىنەن ءسوز قوزعالىپ, مولىنان ەستەلىك ايتىلعان كونفەرەنتسيا عالىمنىڭ ءومىرى مەن مۇراسىن زەرتتەۋدىڭ جاڭا ءبىر ءداۋىرىنىڭ شىمىلدىعىن ءتۇردى دەۋگە بولادى.
كونفەرەنتسيا بارىسىندا «قازاق ۋنيۆەرسيتەتى» باسپا ءۇيى شىعارىپ وتىرعان «ونەگەلى ءومىر» سەرياسى بويىنشا ءمۇسىلىم بازارباەۆقا ارنالعان كىتاپتىڭ تۇساۋكەسەرى بولدى. سونداي-اق, جينالعان قاۋىم عالىمنىڭ ءومىرى مەن شىعارماشىلىعىنا ارنالعان بەينەروليكتى تاماشالادى.
الماس ءنۇسىپ,
«ەگەمەن قازاقستان»
الماتى
