مادەنيەت جانە سپورت مينيسترلىگىنىڭ تاپسىرىسى بويىنشا تۇسىرگەلى وتىرعان جاڭا فيلم بالۋان, ءانشى ءارى كومپوزيتور بالۋان شولاقتىڭ ءومىرى تۋرالى باياندايدى. قورعالىم بارىسىندا فيلم رەجيسسەرى نۇرگەلدى سادىعۇلوۆ «قازاقفيلمنىڭ» ساراپتامالىق كەڭەس مۇشەلەرىنە ءتۇسىرىلىم توبىن تانىستىرىپ, ءتۇسىرىلۋ جۇمىستارى جۇرەتىن ايماقتاردى اتاپ, شىعارماشىلىق جوسپارلارىن جاريا ەتتى.
بۇعان دەيىن بىرقاتار دەرەكتى تۋىندىلار مەن «ويىنشىقتار», ء «سۇت», «نەسيەگە ماحاببات», «زۇلمات», ء«بىزدىڭ اۋىل – ۆو!» سىندى كوركەم فيلمدەردى ءتۇسىرىپ, تاجىريبە جيناقتاعان جاڭا كارتينانىڭ رەجيسسەرى: «سوڭعى سەرىلەرىمىزدىڭ ءبىرى بالۋان شولاق – اتتىڭ قۇلاعىندا ويناعان جاۋجۇرەك ادام. بالۋاندىعىمەن قوسا كومپوزيتورلىعى بار دالا دارىنى. فيلمدە بالۋان شولاقتىڭ بويىندا بار ونەرىن, ەلىنىڭ قامى ءۇشىن ءتۇرلى ەرلىككە بارا الاتىندىعى مەن عالياعا دەگەن ماحابباتىن كورسەتكىمىز كەلەدى», دەيدى.
دەرەكتى كينو جانە تەلەۆيدەنيە رەجيسسەرى رەتىندە تانىلعان نۇرگەلدى سادىعۇلوۆ جازۋشى دۋلات يسابەكوۆتىڭ شىعارماشىلىعىنا قانىق دەۋگە بولادى. ول تۇسىرگەن دەرەكتى فيلمدەر قاتارىندا «يسابەكوۆ الەمى» دە بار.
سونىمەن, ءتۇسىرىلىم جۇمىستارى اقمولا جانە پاۆلودار وبلىستارىندا وتەدى. بىرقاتار كادرلار «قازاقفيلم» پاۆيلوندارىندا تۇسىرىلمەك. ءفيلمنىڭ قويۋشى سۋرەتشىسى ەركىن سۇلەيمەنوۆ ءفيلمنىڭ نەگىزگى كورىنىستەرى «جارمەڭكە» جانە «بالۋان شولاقتىڭ اۋىلى» دەكوراتسيالارى الماتى وبلىسى, جالاڭاش جانە كەگەن اۋىلدارىندا تۇرعىزىلاتىنىن ايتادى.
وسى ارادا بالۋان شولاقتىڭ رولىنە رەجيسسەر تاڭداۋى ەڭسەلى اكتەرلەرىمىزدىڭ ءبىرى ەركەبۇلان دايىروۆقا تۇسكەنىن ايتا كەتۋ كەرەك. فيلمگە ەلىمىزدىڭ باسقا دا تانىمال تەاتر اكتەرلەرىمەن قاتار جاس تالاپكەرلەر دە تۇسەتىن بولادى.
ايناش ەسالي,
«ەگەمەن قازاقستان»
الماتى
