تسيفرلى حابار تاراتۋ ءۇشىن ەكى جىل قاجەت
«2019 جىلى قازاقستاندا تسيفرلى ەفيرلىك تەلەراديوحابارلارىن تاراتۋ ءىسى جوسپارلانىپ وتىر. ال ونى ىسكە قوسۋ ءۇشىن 827 راديوتەلەۆيزيا ستانساسىن سالۋ قاجەت. ول ءۇشىن ءبىز بۇل ءىستى ءبىر مەزگىلدە بۇكىل ەلىمىز بويىنشا قولعا الۋىمىز كەرەك. بارلىق 827 ستانسا سالىنىپ بىتپەيىنشە, تاراتۋ جۇزەگە اسىرىلمايدى. قازىرگى كەزدە 700-دەن استام وسىنداي ستانسا سالىنعان. ەكى جىل بەدەرىندە ءبىز بۇل جۇمىستى اياقتاۋدى جوسپارلاپ وتىرمىز», دەدى د.اباەۆ.
ءمينيستردىڭ سوزىنە قاراعاندا, بۇدان بولەك, 3240 دانا وسىنداي حابار تاراتۋ قۇرىلعىلارىن اجىراتىپ تاستاۋ قاجەت بولادى. «بەس-التى وبلىستا تسيفرلى حابار تاراتۋدى بۇگىننەن باستاۋعا دا بولادى. ال بالامالى قۇرىلعىلار اجىراتىلىپ تاستالعان كەزدە حالىقتىڭ بەلگىلى ءبىر توبى اتاۋلى الەۋمەتتىك كومەكتى قاجەتسىنۋى ىقتيمال. ويتكەنى, حابار تاراتۋ قۇرىلعىلارىن قوسۋ بەلگىلى ءبىر دەڭگەيدە اقشا بولۋىن تالاپ ەتەدى. سونداي-اق, ەل ازاماتتارىنىڭ الەۋمەتتىك جاعىنان قانشالىقتى قاۋقارلى ەكەنى دە تەكسەرىلىپ جاتىر», دەدى اتالعان ماسەلەگە قاتىستى سوزىندە د.اباەۆ.
قۋعىن-سۇرگىن قۇرباندارىنا ارنالعان جوبا
«بيىل مەملەكەت باسشىسىنىڭ ساياسي قۋعىن-سۇرگىن جانە اشارشىلىق قۇرباندارىن ەسكە الۋ تۋرالى جارلىققا قول قويعانىنا تۋرا 20 جىل تولادى. وسى جىلدار ىشىندە اتالعان جارلىق شەڭبەرىندە ەتنومادەني بىرلەستىكتەر مەن باسقا دا ءتۇرلى الاڭداردا شارالار وتكىزىلىپ كەلەدى. جالپى, مامىر ايىندا قازاقستاندىقتار تاريحي ەكى وتە قورقىنىشتى قاسىرەتتەردى ەسكە تۇسىرەدى: 9 مامىردا جانە 31 مامىردا. بۇل شارالاردىڭ باستى ماقساتى – سول قاسىرەتتى كەزەڭدەردى ۇمىتپاي, ەستە ساقتاۋ», دەدى «حابار» تەلەارناسىنداعى «وتكرىتىي ديالوگ» جوباسىنىڭ ەفيرىنەن ۆەدومستۆو باسشىسى.
ءبىر رەتتىك پارولگە كوشۋ ۇسىنىلدى
«وتكرىتىي ديالوگ» جوباسى اياسىندا مەملەكەتتىك قىزمەت كورسەتۋلەرگە قاتىستى دا اڭگىمە قوزعالدى. مۇندا ەلەكتروندى تسيفرلى قولتاڭبانى ءبىر رەتتىك پارولدەرگە اۋىستىرۋ تۋرالى يدەيا ەرەكشە نازار اۋدارۋعا تۇرارلىق.
«ەلەكتروندى تسيفرلى قولتاڭبانى ءبىز شامامەن وسىدان ون جىل بۇرىن ىسكە قوسساق, سول كەزدە ول ۋاقىت رۋحىنا جاۋاپ بەردى. قازىر ءبىز ءبىر رەتتىك پارولگە كوشۋدى ۇسىنىپ وتىرمىز. ادام ءبىر رەتتىك ءپارولدىڭ كومەگىمەن كىرگەن سوڭ, ءبىر ترانزاكتسيانى ورىنداپ, قايتا شىعىپ كەتە الادى. كەلەسى جولى ونىڭ تەلەفونىنا جاڭا پارول كەلەدى. جۇيە جەڭىلدەيدى», دەپ اتاپ كورسەتتى مينيستر.
ء«بىز حقو-لار بەرەتىن انىقتامالار سانىن الىپ, ساراپتاۋدان وتكىزدىك. 23 ملن انىقتامانىڭ شامامەن 18 ملن-ى بار-جوعى بەس انىقتاماعا تيەسىلى ەكەن. سودان سوڭ ءبىز بۇل انىقتامالاردى ادامداردىڭ قايدا اپاراتىنىن ساراپتادىق. سويتسەك, شامامەن 30 پايىزى (انىقتامالار – رەد.) مەملەكەتتىك ورگاندارعا اپارىلادى ەكەن. قازىر بىزگە مەملەكەتتىك كورپوراتسيانىڭ («ازاماتتارعا ارنالعان ۇكىمەت» – رەد.) اقپاراتتىق جۇيەلەرى قاجەت, ويتكەنى, ادامدار انىقتامانى الىپ, ونى قايتادان مەملەكەتكە اپارىپ بەرمەۋى كەرەك. ول ءۇشىن اقپاراتتىق جۇيەلەر ءوزارا ينتەگراتسيالانۋى ءتيىس», دەدى مينيستر.
