مادەني شارانى قورعان وبلىسى قازاقتارىنىڭ ۇلتتىق-مادەني اۆتونومياسى ۇيىمداستىردى.
«بۇل وڭىردە 15 مىڭعا جۋىق اعايىنىمىز تۇرادى. كوپشىلىگىنىڭ اتا-بابالارى ۇركىنشىلىك, اشارشىلىق جىلدارى تاعدىردىڭ تالكەگىنە ۇشىراپ, تۋعان توپىراقتان كوز جازىپ قالعان. ءبىز ءۇشىن قازاقستاننىڭ ورنى بولەك. اتاجۇرتىمىز بولعاندىقتان, تىلەگىمىز دە, جۇرەگىمىز دە ءبىر. بارلىق سالا بويىنشا قويان-قولتىق ارالاسىپ تۇرامىز», – دەيدى اۆتونوميا توراعاسى قايرات ورالوۆ.
اۆتونوميا دەمەۋشىلىك, قايىرىمدىلىق شارالارىنا ۇزبەي اتسالىسىپ تۇرادى. جوعارى ءبىلىمدى مامان رۋسلان ءجۇسىپوۆتىڭ ب. وكۋدجۆا اتىنداعى حالىقارالىق اندەر بايقاۋىنا قاتىسۋىنا قارجىلاي جاردەمدەسكەن. ول بولسا, ءۇمىتتى اقتاپ, گران-پري يەگەرى اتانعان. سول سياقتى قورعان قالاسىنداعى قازاق ستۋدەنتتەرىنىڭ فۋتبول كومانداسى, اۆتونوميا جانىنداعى جاستار قاناتى تۇراقتى قامقورلىققا الىنعان. سوڭعى ون جىلدا التىن مەدال العان وقۋشىلاردىڭ ۇشتەن ەكىسى–قازاق بالالارىنىڭ ۇلەسىندە. مەكتەپتەردە ماقتاۋ ماراپاتىن يەلەنەتىندەردىڭ جارتىسىنا جۋىعى ءوزىمىزدىڭ بۇلدىرشىندەر.
«تۋعان جەر!» اتتى مادەنيەت فەستيۆالى قالىڭ اعاش باۋرايىندا ورنالاسقان وبۋتكوۆسكوە ءىرى ەلدى مەكەنىندە ءوتتى. سولتۇستىك قازاقستان وبىلىسى دەلەگاتسياسىنىڭ جەتەكشىسى, دۇنيەجۇزى قازاقتارى قاۋىمداستىعى وبلىستىق بولىمشەسىنىڭ توراعاسى ساعىندىق سالمۇرزين جۇرتشىلىق الدىندا سويلەگەن سوزىندە «ەلباسىمىز نۇرسۇلتان نازارباەۆ «بولاشاققا باعدار: رۋحاني جاڭعىرۋ» ماقالاسىندا قازاقستاندىقتارعا «تۋعان جەر» باعدارلاماسىن ۇسىنعانىن, ونىڭ «تۋعان ەلگە» دەگەن اۋقىمدى جوباعا ۇلاساتىنىن جەتكىزدى.
فەستيۆالدە اق شاڭقان كيىز ۇيلەر تىگىلىپ, قولدانبالى ونەر كورمەلەرى مەن دامدىلىگى ءتىل ۇيىرەتىن ۇلتتىق تاعامدار جايماسى تاماشالاندى. «اشامايعا مىنگىزۋ» ءراسىمى كورسەتىلدى.
ماكۋشين اۋدانىنىڭ باسشىسى ۆيكتور ۆوروتىنتسەۆ ءوز سوزىنە تاريحي تامىرلاستىعى ارىدەن ءوربيتىن قازاقستان مەن رەسەي اراسىنداعى دوستىقتى, كورشىلىك تاتۋلىقتى ارقاۋ ەتتى. قازاقتاردىڭ اۋىزبىرلىگىن, ەڭبەكسۇيگىشتىگىن, باۋىرمالدىعىن, ۇلتتىق قۇندىلىقتاردى قاستەرلەيتىنىن سۇيسىنىسپەن اتاپ ءوتتى.
«شەكارالىق ايماقتا ورنالاسقاندىقتان, سولتۇستىك قازاقستان وبلىسىمەن ەكونوميكالىق, الەۋمەتتىك, مادەني بايلانىستارىمىز جان-جاقتى دامىپ كەلەدى», – دەدى ول.
ورال ءوڭىرى حالىقتار اسسامبلەياسىنىڭ توراعاسى ۆلاديمير ۋفيمتسەۆ ءبىر توپ قازاق ازاماتتارىن ماراپاتتادى. قورعان وبلىسىنىڭ قۇرمەتتى ازاماتى, فيلولوگيا عىلىمدارىنىڭ دوكتورى ۆالەنتينا فەدوروۆانىڭ قازاقستان, قازاقتار جايلى تولعانىستارى جينالعاندارعا ەرەكشە اسەر ەتتى.
شەتتە جۇرسە دە, «قازاقستان» ۇعىمىن جۇرەگىنىڭ تۇكپىرىندە ساقتاپ, پاراسات-بىلىكتىلىگىمەن, ەڭبەكقورلىعىمەن قازاقتىڭ ابىرويىن اسىرىپ, مەرەيىن تاسىتىپ جۇرگەن نامىسشىل, مىنەزدى, جىگەرلى قانداستارىمىزدىڭ كوپتىگى قۋانتادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
