ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالى ماقالاسىنا ارنالعان فورۋمنىڭ اشىلۋ سالتاناتىنا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا مەن بۇۇ, يۋنەسكو, يسەسەسكو, ECO Sience foundation, تۇركى كەڭەسى, تۇركسوي, تۇركپا سىندى حالىقارالىق ۇيىم باسشىلارى مەن وكىلدەرى قاتىستى.
اشىلۋ سالتاناتىندا ءسوز العان حالىقارالىق تۇركى اكادەمياسىنىڭ باسشىسى دارحان قىدىرالى تۇركى حالىقتارى ءداستۇرلى مادەنيەتىن جاڭعىرتۋ ماقساتىندا ءوتىپ جاتقان فورۋمنىڭ ماڭىزدىلىعىنا توقتالىپ, فورۋم جۇمىسىنا ساتتىلىك تىلەدى.
«تۇركى اكادەمياسىنىڭ قۇرىلعانىنا تۋرا جەتى جىل تولىپ وتىر. قۇرمەتتى فورۋم قاتىسۋشىلارى, ەكىنشى رەت ۇيىمداستىرىلىپ وتىرعان القالى جيىنعا قوش كەلدىڭىزدەر. قازاقستان پرەزيدەنتىنىڭ تاياۋدا جارىق كورگەن ماقالاسىندا اتاپ كورسەتكەندەي, ءبىلىم, سانا بولۋى ءتيىس. ول ارقىلى ءبىز جادىمىزدى جاڭعىرتىپ, وتكەن بولاشاعىمىز بەن جاسامپاز بولاشاعىمىزدى جاراسىمدى ۇيلەستىرە الامىز. وسىعان بايلانىستى ءبىز بيىلعى فورۋمدى ەلباسىنىڭ «بولاشاققا باعدار: رۋحاني جاڭعىرۋ» ماقالاسىنا ارناپ وتىرمىز. جيىن بارىسىندا ءماندى باياندامالار مەن ۇتىمدى ۇسىنىستار ايتىلادى دەپ ويلايمىز. القالى جيىنعا ارنايى كەلگەن بارشاڭىزعا راحمەتىمىزدى ايتامىز», – دەدى اكادەميا باسشىسى.
جيىندى اشقان مەملەكەتتىك حاتشى گۇلشارا ابدىقالىقوۆا الەم وركەنيەتىندەگى تۇركى مادەني مۇراسىن ايشىقتاۋدا الەم عالىمدارى باس قوسقان فورۋمدا كوتەرىلەتىن مىندەتتەر مەن تاقىرىپتار اۋقىمدىلىعى تۋراسىندا ايتىپ ءوتتى.
«استانادا الەمنىڭ جيىرماعا جۋىق ەلىنەن كەلگەن عالىمدار باس قوسىپ, وسىمەن ەكىنشى رەت ۇيىمداستىرىلىپ وتىرعان « ۇلى دالا» ەكىنشى گۋمانيتارلىق عىلىمي فورۋمىنا قوش كەلدىڭىزدەر. باس قالامىزدىڭ عىلىمي جانە ينتەللەكتۋالدىق ورتالىق رەتىندە يگى ىقپالىن تيگىزىپ وتىرعان عىلىمي فورۋم قوردالانعان عىلىمي ماسەلەلەردى شەشۋدە تىڭ كونتسەپتۋالدى شەشىمدەر بەرەتىنىنە سەنىمدىمىن», – دەگەن ول مەملەكەت باسشىسى نۇرسۇلتان ءابىش ۇلىنىڭ فورۋم جۇمىسىنا ساتتىلىك تىلەگەن قۇتتىقتاۋ حاتىن وقىپ بەردى. «سىزدەردىڭ بارشاڭىزدى « ۇلى دالا» II گۋمانيتارلىق عىلىمدار فورۋمىنىڭ اشىلۋىمەن قۇتتىقتايمىن. ەۋرازيا كەڭىستىگىن كەرنەگەن حالىقتاردىڭ مىڭجىلدىق بايلانىستارىنىڭ شەجىرەسى, باتىس جانە شىعىس وركەنيەتتەرىن توعىستىرعان توعىز جولدىڭ تورابى. ونىڭ گەوگرافيالىق اۋقىمى الىس كوكجيەكتەردى قامتيدى, تاريحي دامۋلارى تەرەڭنەن قۇرالادى. باي مادەني مۇراسى بۇكىل ادامزاتتىڭ ورتاق يگىلىگى. مەنىڭ باستامام بويىنشا قۇرىلعان حالىقارالىق تۇركى اكادەمياسى ەكىنشى مارتە مۇنداي فورماتتاعى القالى جيىننىڭ وتۋىنە ۇيىتقى بولىپ, رۋحاني جاڭعىرۋ ماسەلەسىن قولعا الىپ وتىر. بۇل فورۋم قۇرلىقتاردى شەكاراسىز جالعاعان عىلىمي ينتەگراتسياعا ۇلكەن سەرپىن بەرەدى دەپ سەنەمىن», دەلىنگەن قۇتتىقتاۋ حاتتا.
اقش, ۆەنگريا, گەرمانيا, قىتاي, موڭعوليا, وڭتۇستىك كورەيا, ءۇندىستان, رەسەي مەن تۇركى مەملەكەتتەرىنەن كەلگەن 200-گە جۋىق عالىم-زەرتتەۋشى مەن ساراپشىلار التى پانەلدى وتىرىستا مازمۇندى باياندامالار جاساپ, ەلباسى ماقالاسىندا كوتەرىلگەن مىندەتتەر مەن تاقىرىپتار توڭىرەگىندە پايىمدى پىكىرلەرىن ورتاعا سالدى. سونىمەن بىرگە, فورۋم اياسىندا TWESCO تۇركى الەمى عىلىمىنا سىڭىرگەن ەرەن ەڭبەگى مەن باۋىرلاس حالىقتار اراسىنداعى ىنتىماقتاستىقتى دامىتۋعا قوسقان ۇلەسى ءۇشىن كورنەكتى مەملەكەت جانە قوعام قايراتكەرى, اكادەميك مىرزاتاي جولداسبەك ۇلى, تانىمال عالىم, تاتارستان رەسپۋبليكاسىنىڭ قوعام قايراتكەرى ميرفاتىح زاكيەۆتى التىن مەدالدارمەن ماراپاتتادى. بۇدان بولەك, شارا بارىسىندا TWESCO سوڭعى جىلدارى شىعارعان كىتاپتار كورمەسىن ۇيىمداستىردى.
ايا ءومىرتاي,
«ەگەمەن قازاقستان».
