تۋىندىنىڭ العاشقى كورسەتىلىمىنە مادەنيەت, ساياسات جانە قوعام قايراتكەرلەرى, زيالى قاۋىم وكىلدەرى مەن جۋرناليستەر قاتىستى. شارا الدىندا اقپارات جانە كوممۋنيكاتسيالار ءمينيسترى داۋرەن اباەۆ ءسوز سويلەپ, مەرەيتوي يەسىنە اقجارما تىلەگىن جەتكىزدى.
«حالقىمىز ەلباسىنىڭ سەنىمدى سەرىگى, بىرەگەي مەملەكەت جانە قوعام قايراتكەرى رەتىندە قادىرلەيتىن مىرزاتاي جولداسبەكوۆ ابىز جاستى ۇلكەن ابىرويمەن باعىندىرىپ وتىر. جالپى, ونىڭ ۇلاعاتتى ۇستاز, پاراساتتى عالىم, كورنەكتى جازۋشى رەتىندە اتقارعان قىزمەتتەرىن جاقسى بىلەمىز. اتاپ ايتساق, ۇلتتىق ادەبيەتتى, اسىرەسە, جىر الىبى – جامبىلدىڭ شىعارماشىلىعىن زەرتتەۋگە زور ۇلەس قوستى. كونە تۇركى جازبالارىن قازاق عالىمدارى اراسىندا العاشقىلاردىڭ ءبىرى بولىپ زەرتتەدى. ونى ۇلتتىق يدەياعا اينالدىرۋعا ۇلەس قوستى. دەسە دە, مىرزاتاي اعامىزدىڭ تاۋەلسىزدىگىمىزدىڭ نىعايۋىنا سىڭىرگەن ەڭبەگى وراسان. ەگەمەندىك جىلدارى ەلباسىنىڭ جانىنان تابىلعان مەرەيتوي يەسى ەلدىگىمىزدىڭ ىرگەتاسىن قالاۋعا كوپ تەر توكتى. حالىققا ءسوزىن وتكىزە الاتىن تۇلعا بولىپ, جۇرتتى بىرلىككە, تۇتاستىققا شاقىرىپ كەلەدى. ابىز اقساقال ءالى كۇنگە ۇلتتىق يدەولوگيالىق جۇمىستاردىڭ باسى-قاسىنان تابىلۋدا. قاي ۋاقىتتا دا كوزدەگەنى – ەل مۇددەسى, جۇرت تاعدىرى», دەدى مينيستر.
كورسەتىلىم بارىسىندا «حابار» اگەنتتىگى» اق باسقارما ءتورايىمى الماگۇل احمەتجانوۆا جىلى لەبىزىن ءبىلدىرىپ, گۇل شوقتارىن تابىس ەتتى. ول مىرزاتاي جولداسبەكوۆتىڭ دەربەستىك جولىنداعى ساياسي, رۋحاني دۇنيەلەرىنىڭ ەسەپسىز ەكەنىن ايتىپ, ءالى دە اتتان تۇسپەۋىن تىلەدى. باسقوسۋدا پارلامەنت ءماجىلىسىنىڭ دەپۋتاتى, مەرەيتوي يەسىنىڭ شاكىرتى ءارى قىزمەتتەس بولعان ساۋىتبەك ابدراحمانوۆ دەرەكتى فيلمگە وڭ باعاسىن بەرىپ, تارتىمدى ەستەلىكتەرىمەن ءبولىستى.
«مىرزەكەڭنىڭ وتىز جاسىندا قورعاعان كانديداتتىق ديسسەرتاتسياسىنىڭ ءار جاعىندا ۇلكەن-ۇلكەن ساياسي سەبەپتەر بولعان. سولاردىڭ بىرەۋى ورىس حالقىنىڭ ماڭدايىنا باسقان مۇراسى – «يگور جاساعى تۋرالى جىردىڭ» دۇنيەگە كەلگەن عاسىرىنا قاتىستى. ول زاماندا ءبىزدىڭ ادەبيەتىمىز ءسىزدىڭ ادەبيەتىڭىزدەن ەرتە شىققان, ءبىزدىڭ اتا-بابالارىمىز ءسىزدىڭ اكەلەرىڭىز جاساماعان ەپوستى جاساعان, سىزدەر ءارىپتى ويمالاعان كەزدە ءالىپبيى, جازۋى بولعان, سول جازۋدى تاسقا قاشاپ تۇسىرگەن دەگەن ويدى ايتۋ. مۇنى ايتۋعا عانا وڭاي. مىنە, قازاق ادەبيەتىن ون ەكى عاسىرعا ءارى جىلجىتىپ بەرگەن جان ارامىزدا وتىر. سول ارقىلى ءبىز تونىكوك, بىلتە قاعانداردىڭ زامانىنداعى ەرلىكپەن, ەلدىكپەن تاربيەلەندىك. سول مۇرانىڭ بىزگە ورتاق ەكەنىن سەزىندىك, ماقتاندىق. سول ارقىلى وتاندىق تۇركولوگياداعى جالىمىز كۇدىرەيىپ شىعا كەلدى. سول ارقىلى حالىقارالىق تۇركى اكادەمياسى سەكسەن ميلليون حالقى تۇركيادا ەمەس, ون سەگىز ميلليون حالقى بار قازاقستاندا ورىن تەپتى. ويتكەنى, ماعجان ايتقانداي, «كوپ تۇركى ەنشى الىپ تاراسقاندا, قازاققا قارا شاڭىراق قالعان جوق پا». سول قارا شاڭىراقتىڭ قاسيەتىن دالەلدەگەن ادام رەتىندە ءبىز مىرزەكەڭە باس يەمىز», دەدى دەپۋتات.
شارانى تۇيىندەگەن مەرەيتوي يەسى كوپشىلىككە العىسىن جەتكىزىپ, كينوتۋىندىعا ريزاشىلىعىن ءبىلدىردى.
ء«بىز باستاۋىش مەكتەپتى جەتىستىرمەسەك تە, دالانىڭ اكادەمياسىنان سۋسىندادىق. سونىڭ وزىندە ءابىش كەكىلباەۆقا, دۋلات يسابەكوۆكە, وزگە دە ەل الدىنداعى كوپتەگەن ازاماتتارعا ساباق بەردىم. سوندىقتان دا وتە باقىتتى اداممىن», دەگەن مەرەيتوي يەسى ونەگەلى ءومىر جولىنان سىر تارقاتتى.
اسحات رايقۇل,
«ەگەمەن قازاقستان»
