«قولدانىستاعى زاڭداعى قايشىلىقتارعا بايلانىستى ءبىز ولاردىڭ جۇمىسىن باقىلاي المايمىز. جەدەلساتى كومپانيالارىنا ىقپال ەتۋگە قۇزىرلى ەمەسپىز. وسىعان وراي باس پروكۋراتۋرا مەن ۇلتتىق ەكونوميكا مينيسترلىگىنە ءبىزدىڭ ۆەدومستۆوعا باقىلاۋ قىزمەتىن بەرۋىن سۇراپ ءوتىنىش جولدادىق. بۇگىندە وسى ماسەلەنى شەشۋ ءۇشىن جان-جاقتى ءجۇمىس جۇرگىزىلىپ جاتىر», – دەدى استانا قالاسى تۇرعىن ءۇي ينسپەكتسياسىنىڭ باسشىسى ءاليحان قۋاتبەكوۆ.
ونىڭ مالىمەتىنشە, تاياۋدا استانا اكىمدىگىندە جيىن وتكىزىلىپ, وندا تۇرعىن ءۇي-تەحنيكالىق ينسپەكتسياسىن قۇرۋ ماسەلەسى كوتەرىلگەن.
ء«بىزدىڭ باسقارمامىزدىڭ قىزمەتكەرلەرى مەملەكەتتىك ينسپەكتور مارتەبەسىنە يە بولۋى كەرەك. بۇل جەدەلساتى مەكەمەلەرىنىڭ جۇمىسىن باقىلاۋعا مۇمكىندىك بەرەدى. ەگەر بۇل قۇزىرعا يە بولساق تەحنيكالىق اقاۋ تۋىنداعان جاعدايدا ونى جويعانعا دەيىن جەدەلساتى جۇمىسىن توقتاتا الامىز», – دەدى ءا.قۋاتبەكوۆ.
سونىمەن بىرگە ول استانادا بارلىق جەدەلساتى قوندىرعىلارىنا مونيتورينگ جۇرگىزىلەتىنىن جەتكىزدى.
«جەدەلساتىلاردىڭ تەحنيكالىق جاعدايى مەن پيك-ءدىڭ پروتسەدۋرالىق مىندەتتەمەلەرىن قالاي ورىنداپ جاتقانىن ءارى جەدەلساتى كومپانيالارىنىڭ جۇمىس رەگلامەنتىن تەكسەرمەك نيەتتەمىز. اتالعان تالداما ەلورداداعى جەدەلساتىلاردىڭ جالپى جاعدايىن انىقتاۋعا جانە كومپانيا مەن پيك-ءدىڭ ماسەلەنى شەشۋدەگى جاۋاپكەرلىگىن انىقتاۋعا مۇمكىندىك بەرەدى. بۇل كەشەندى ۇلكەن جۇمىس, جاقىن ارادا ىسكە كىرىسەمىز», - دەدى ول.
بۇگىندە استانادا قالادا 6 577 جەدەلساتى مەن جەدەلساتى قوندىرعىسىنا قىزمەت كورسەتەتىن 69 كومپانيا بار. ونىڭ 4 879-ى تۇرعىن ۇيلەردە, 1 728-ءى اكىمشىلىك عيماراتتاردا ورنالاسقان.
