«ەلباسىنىڭ الەۋمەتتىك باعىتتاعى ساياساتىنىڭ ارقاسىندا مادەنيەت سالاسىنا ۇلكەن قولداۋ كورسەتىلەدى, شىعارماشىلىق ادامدارىنا قولايلى جاعداي جاسالىپ وتىر. وتكەن جىلى مادەنيەت سالاسىنداعى عيماراتتاردىڭ جوندەلۋىنە بيۋدجەتتەن 800 ملن تەڭگە جۇمسالدى. مىنە, بۇگىن كوركەمونەرپازداردىڭ وبلىستىق فەستيۆالىندە ونىڭ ناتيجەسىن كورىپ وتىرمىز. وبلىستا بۇگىندە 700-دەن اسا مادەنيەت نىسانى جۇمىس ىستەيدى, ولاردىڭ ارقايسىسىندا حالىقتىڭ رۋحاني قاجەتىن وتەيتىن قىزىقتى جوبالار جۇزەگە اسىپ جاتادى. حالىق تالانتتارىن ىزدەپ تابۋدا. بۇگىنگى كوركەمونەرپازدار حالىق شىعارماشىلىعى فەستيۆالىنىڭ ماڭىزى ۇلكەن. وسى شارا اياسىندا ءوسىپ شىققان تالانتتار ءبىزدىڭ وبلىستىڭ داڭقىن اسىرىپ ءجۇر», – دەدى ايماق باسشىسى.
گالا كونتسەرتتىڭ الدىندا وبلىستىق فەستيۆال جۇلدەگەرلەرى ماراپاتتالدى. ءۇششىنشى ورىندى جىتىقارا مەن اۋليەكول اۋداندارىنىڭ كوركەمونەرپازدارى يەلەنىپ, 1 ملن تەڭگەنىڭ سەرتيفيكاتىنا يە بولدى. ەكىنشى ورىندى فەدوروۆ اۋدانىنىڭ ونەر ۇجىمدارى الىپ, 1 ملن 300 مىڭ تەڭگە السا, ءبىرىنشى ورىن امانگەلدى اۋدانىنا لايىق دەپ تابىلدى. ولارعا وبلىس اكىمى ارحيمەد مۇحامبەتوۆ 1 ملن 700 مىڭنىڭ سەرتيفيكاتىن تاپسىردى. ال فەستيۆالدىڭ باس جۇلدەسى رۋدنىي قالاسىنىڭ كوركەمونەرپازدارىنا بەرىلدى, ولارعا 2 ملن تەڭگە سىيعا تارتىلدى.
سونىمەن قاتار, وسى شارادا مادەنيەت سالاسىنا ەڭبەگى سىڭگەن قىزمەتكەرلەر, ونەر ادامدارى «مادەنيەت سالاسىنىڭ ۇزدىگى» ءتوس بەلگىسىمەن, قر مادەنيەت جانە سپورت مينيسترلىگىنىڭ, وبلىس اكىمىنىڭ ماقتاۋ قاعازدارىمەن ماراپاتتالدى.
ءنازيرا جارىمبەتوۆا,
«ەگەمەن قازاقستان»
قوستاناي
