«قازاقستان – جالعىز ۇلى قازاقتىڭ!» دەگەن تاقىرىپپەن وتكەن ونەر سايىسىندا ونەرپازدار حالىقتىق اسپاپتاردا ورىنداۋ, ەسترادالىق مۋزىكا, كوركەمسوز وقۋ, حورەوگرافيا, كلاسسيكالىق جانر, بەينەلەۋ ونەرى, فوتوسۋرەتشىلەر, ەڭ ۇزدىك ادىسكەر, كلۋب مەكەمەلەرىنىڭ ماتەريالدىق-تەحنيكالىق بازاسى بويىنشا سايىسقا ءتۇسىپ, ايتىسكەر اقىندار ساحنادا ءسوز بەن وي سايىستىردى. سايىس بارىسىندا كوپتەگەن جاڭا ەسىمدەر مەن جاڭادان قۇرىلعان ونەر ۇجىمدارى بەلگىلى بولدى. فەستيۆال مادەنيەت قىزمەتكەرلەرى كۇنى گالا-كونتسەرتپەن قورىتىندىلانىپ, جەڭىمپازدار ەسىمى جاريا بولدى.
گالا-كونتسەرتتە فەستيۆال جەڭىمپازدارىمەن بىرگە, ءوڭىردىڭ مادەنيەتىنە ۇلەس قوسىپ جۇرگەن ونەرپازدار مەن مادەنيەت سالاسىنىڭ ەڭبەك ارداگەرلەرى ماراپاتتالدى. مادەنيەت قىزمەتكەرلەرىن ايماق باسشىسى ە.توعجانوۆ قۇتتىقتاپ, ەڭبەكتەرىنە جەمىس تىلەدى.
ماراپات العانداردىڭ اراسىندا 30 جىل وسى سالادا ەڭبەك ەتكەن ديريجەر, سازگەر ر.مادىرەەۆ, داۋلەسكەر كۇيشى, قۇرمانعازى اتىنداعى كونسەرۆاتوريانىڭ پروفەسسورى, قازاقستاننىڭ ەڭبەك سىڭىرگەن مادەنيەت قايراتكەرى س.شاكىرات, كۇيشى, ۇستاز, قازاقستاننىڭ ەڭبەك سىڭىرگەن قايراتكەرى و.قۇلساريەۆ, تاعى باسقالار بار.
«ماڭعىستاۋ جۇلدىزدارى» فەستيۆالىنىڭ قورىتىندىسىندا جاڭاوزەن قالاسىنىڭ مادەنيەت قىزمەتكەرلەرى باس جۇلدەنى جەڭىپ الىپ, اۆتوكولىككە يە بولدى. 1-ورىندى ماڭعىستاۋ جانە قاراقيا اۋداندارى, 2-ورىندى اقتاۋ قالاسى مەن بەينەۋ اۋدانى يەلەندى. ال 3-ورىن مۇنايلى مەن تۇپقاراعان اۋداندارىنا بۇيىردى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
سۋرەتتى تۇسىرگەن
سەرىك مايەمەروۆ
