مادەنيەت جانە سپورت مينيسترلىگىنىڭ حابارلاۋى بويىنشا, 70-ءشى كانن كينوفەستيۆالى 17 مامىردا جالاۋىن جەلبىرەتكەن بولاتىن. كينو ونەرىنىڭ ايتۋلى مەرەكەسى ءداستۇر بويىنشا 28 مامىرعا دەيىن جالعاسپاق. قازاقستاننىڭ العاشقى پاۆيلونى فەستيۆالدەر سارايىنىڭ جانىنداعى «Le Village International» اۋماعىنا جايعاستى.
قازاقستان رەسپۋبليكاسى مادەنيەت جانە سپورت مينيسترلىگى مەن حالىقارالىق «ەۋرازيا» كينوفەستيۆالى ۇيىمداستىرۋ كوميتەتىنىڭ تىكەلەي باسشىلىعىمەن اشىلعان قازاقستاننىڭ ۇلتتىق پاۆيلونى فيلمدەر مەن ءتۇرلى جوبالاردى تانىتۋ بويىنشا كاسىبي كەزدەسۋلەر مەن سۇحباتتار وتكىزۋگە مۇمكىندىك بەردى.
كانن قالاسىنىڭ مەرى داۆيد ليسنارد پەن قازاقستاندىق دەلەگاتسيانىڭ كەزدەسۋىنە قازاقستاننىڭ فرانتسياداعى توتەنشە جانە وكىلەتتى ەلشىسى نۇرلان دانەنوۆ, فرانتسيانىڭ قازاقستانداعى ەلشىسى فرانسيس ەتەن, مادەنيەت جانە سپورت ۆيتسە-ءمينيسترى اسقار باتالوۆ, قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا, كينەماتوگرافيالىق ونەر مەن عىلىمدار ۇلتتىق اكادەمياسىنىڭ پرەزيدەنتى راشيد نۇعمانوۆ, «ەۋرازيا» حكف قولداۋشىسى «Human Development Group» كومپانياسىنىڭ نەگىزىن قالاۋشى جانە ۇيىمداستىرۋ كوميتەتىنىڭ توراعاسى اسقار بەكباەۆ قاتىستى.
«كينوفەستيۆال اياسىندا ءبىزدى كانن قالاسىنىڭ مەرى ارنايى قابىلدادى. كەزدەسۋ بارىسىندا قازاقستاندىق مادەنيەتتى الەمدىك دەڭگەيدە ناسيحاتتاۋعا قاتىستى بىرقاتار ماسەلەلەر تالقىلاندى. مۇنداي قادامدار ەل پرەزيدەنتىنىڭ رۋحاني جاڭعىرۋ يدەيالارىمەن جاقىن ۇندەسەدى», دەپ اتاپ ءوتتى ءوز سوزىندە مادەنيەت جانە سپورت ۆيتسە-ءمينيسترى اسقار باتالوۆ.
كەزدەسۋ ساتىندە ءوزارا مادەني قارىم-قاتىناستى دامىتۋ بويىنشا پىكىرلەر قوزعالىپ, مادەنيەت پەن تۋريزم سالاسىنداعى ەكى ەلدىڭ ءتيىمدى ىنتىماقتاستىق بايلانىستارىن كەڭەيتۋ ماقساتىنداعى ۇسىنىستار ورتاعا سالىندى. شاراعا قاتىسۋشىلار ستراتەگيالىق سەرىكتەستىك ەكى ەلدىڭ مادەنيەت سالاسىنا وڭ اسەرىن تيگىزەتىندىگىن اتاپ ءوتتى.
حالىقارالىق دەڭگەيدەگى الەمنىڭ ەڭ بەدەلدى كينوفەستيۆالى اياسىندا وتكەن قازاقستان پاۆيلونىنىڭ تانىستىرىلىمى ەلىمىزدىڭ كينووندىرۋشى مەملەكەت رەتىندەگى بەدەلىن نىعايتىپ, كينويندۋستريا سالاسىنداعى ارىپتەستىك مۇمكىندىكتەرگە كەڭىنەن جول اشپاق.
قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆا مادەنيەت پەن تۋريزم سالاسىنداعى ىنتىماقتاستىق ەكى ەلدىڭ ەكونوميكالىق جاعىنان عانا ەمەس, كينو سالاسىنداعى قارىم-قاتىناسىنىڭ نىعايۋىنا دا وڭ ىقپال ەتەتىنىن جەتكىزدى.
– كانن كينوفەستيۆالىندە قازاقستان پاۆيلونىنىڭ اشىلۋى, – دەپ اتاپ ءوتتى قازاقستاندىق ونەر مايتالمانى, – حالىقارالىق كينەماتوگرافيالىق قاۋىمداستىقپەن مادەني بايلانىستاردىڭ نىعايۋىنا, مەملەكەتتىڭ جانە مەملەكەت باسشىسى نۇرسۇلتان نازارباەۆتىڭ قولداۋىمەن كينويندۋسترياسى دامىعان ەل رەتىندە ءيميدجىنىڭ قالىپتاسۋىنا اسەرىن تيگىزەتىندىگىنە سەنىمدىمىن. پاۆيلون جۇمىسى الداعى ۋاقىتتا ۇلتتىق فيلمدەردى بىرلەسىپ ءتۇسىرۋ مەن قارجىلاندىرۋعا ارىپتەستەردى تارتۋعا, تاجىريبە الماسۋ مەن قازاقستاندىق كينووندىرىستىڭ جاڭعىرۋىنا, ءتۋريزمنىڭ دامۋىنا سەپتىگىن تيگىزەتىن بولادى.
قارشىعا كۇلەن
