ءوز كەزەگىندە اتالمىش قۇبىلىستاردىڭ گەوساياساتقا دا, مەملەكەتارالىق قارىم-قاتىناستار مەن الەمدىك نارىقتارعا دا, سول سياقتى ازاماتتىق قوعامنىڭ جاڭاشا قالىپتاسىپ, ادامزات وي-ساناسىنىڭ جاڭاشا دامۋىنا دا تىكەلەي اسەر ەتە باستاعانى كۇمان تۋدىرمايدى. ويتكەنى, بۇكىلالەمدىك مەگاوزگەرىستەر تولقىنى قازىردىڭ وزىندە-اق ايقىن سىر بەرىپ, پلانەتا تىنىسىنىڭ بولاشاق بولمىسىن بولجايتىن ايگىلى فۋتۋريست-فيلوسوفتاردى دا, فيزيكتەردى دە, ەكولوگتار مەن بيولوگتاردى دا, ماكروەكونوميستەر مەن ميكروەكونوميستەردى دە, ءتىپتى, مەملەكەت تىزگىنىن ۇستاعان ساياساتكەرلەردى دە جاپپاي ويلاندىرا باستاعانى شىندىقتان الىس ەمەس جانە مۇنىڭ دالەلدەرى جەتكىلىكتى.
ماسەلەن, ەلباسىنىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى 2012 جىلى حالىققا جاريالاعان جولداۋى − ەلىمىزدىڭ ءححى عاسىردىڭ ءبىرىنشى جارتىسىنىڭ سوڭىنا دەيىنگى تۇراقتى دامۋىنا باعىتتالعان الىپ جوبالاردىڭ بىرەگەيى. ەندى مىنە, سول ستراتەگيالىق, ساياسي-ەكونوميكالىق جانە الەۋمەتتىك ءمانى زور ۇزاق مەرزىمدى جوسپاردىڭ اياسىندا قىرۋار شارالار تولاسسىز ىسكە اسىرىلىپ جاتىر. ولاردىڭ ىشىندەگى وزەكتىلەرى − ەلىمىزدى جاپپاي يندۋستريالاندىرۋعا باعىتتالعان مەملەكەتتىك ۇدەمەلى يننوۆاتسيالىق باعدارلامانىڭ ەكىنشى بەسجىلدىعى مەن سول بەسجىلدىقتىڭ وزەگىنە ورىلگەن استانادا وتەتىن الەمنىڭ بولاشاق ەنەرگەتيكالىق تەحنولوگيالارىنا باعىشتالعان ەكسپو-2017 كورمەسى.
جوعارىدا ايتىلعانداردىڭ بۇلتارتپاس دالەلدەرىنىڭ ەندى ءبىر ايقىن مىسالى − نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى بيىلعى جولداۋى مەن سول قۇجاتپەن وزەكتەس ءارى ساباقتاس, ءارى جۋىردا عانا اقپارات قۇرالدارىندا جارىق كورگەن «بولاشاققا باعدار: رۋحاني جاڭعىرۋ» اتتى زاماناۋي ماقالاسى.
بۇلاي دەۋگە تولىق نەگىز بار. ويتكەنى, وزگە مەملەكەتتەر سەكىلدى دامۋدىڭ تۇراقتى جولىن تاڭداعان ءبىزدىڭ ءتول مەملەكەتىمىز دە گەوساياسي, گەوەكونوميكالىق جانە گەوتەحنولوگيالىق مەگاوزگەرىستەر اعىنىنان تىس قالىپ وتىرعان جوق. كەزىندە قول جەتپەستەي بولىپ كورىنگەن قيال-عاجايىپ دۇنيەلەر بۇگىنگى تاڭدا ەلىمىزدىڭ كۇندەلىكتى بولمىسىنا قالاي تەز ەنىپ كەتكەنىن بايقاماي دا قالدىق. تاستان ساراي دا سالدىرىپ, ايشىلىق الىس جەرلەردەن جىلدام حابار دا الدىرىپ, سايگ ۇلىك تۇلپارلاردى زاماناۋي اۆتوكولىكتەر مەن ۇشاقتار, حات پەن حاباردى SMS, تەلەفون ستانسالارى مەن پوشتا قىزمەتتەرىن ۇيالى تەلەفوندار, سيا مەن قالامدى كومپيۋتەرلەر, كىتاپحانالاردى ينتەرنەت-پورتالدار, باسپاحانالاردى پرينتەرلەر, كينوتەاترلاردى تەلەۆيزور مەن ۆيدەوتەكالار الماستىرىپ وتىرعانىنا دا ەتىمىز الدەقاشان ۇيرەنىپ كەتتى. ونى بىلاي قويعاندا, بۇگىندە تۇتىنۋشىلاردىڭ قولىندا جۇرگەن الاقانداي عانا ايفوندار مەن پلانشەتتەر بۇكىل اقپاراتتىق-كوممۋنيكاتسيا تەحنولوگيالارىنىڭ كومەگىمەن ىسكە اسىرىلاتىن زاماناۋي قىزمەت تۇرلەرىن تۇگەل دەرلىك قامتاماسىز ەتەتىن امبەباپ قۇرالعا اينالىپ كەتكەنى دە ۇيرەنشىكتى جاي بولىپ قالدى.
دەمەك, بۇگىنگى تاڭدا قالىپتاسىپ وتىرعان تەحنولوگيالىق جاڭعىرۋ مەن الەمدىك گەوساياسات كارتاسىنان ءبىزدىڭ ەلىمىز شەت قالىپ وتىر دەۋگە ەشبىر نەگىز جوق, سەبەبى ينتەرنەت ارقىلى بۇكىلالەمدىك اقپارات مۇحيتىنان ەركىن سۋسىنداۋ ءوز ەلىمىزدىڭ دە شەكسىز يگىلىگىنە اينالىپ كەتكەنى كۇمانسىز.
تاۋەلسىزدىك تىزگىنىنە يە بولعان شيرەك عاسىر ىشىندە قازاقستان اۋەل باستا قولبايلاۋ بولعان ەكونوميكالىق قيىندىقتاردى ارتقا تاستاپ, دامۋدىڭ تۇراقتى جولىنا ءتۇسىپ قانا قويماي, بۇل كۇندە بۇكىل پلانەتاعا تانىلىپ, الەمدەگى ەكونوميكاسى تەز دامىپ كەلە جاتقان ساناۋلى مەملەكەتتەردىڭ ساناتىنا قوسىلىپ ۇلگەردى.
ءدال وسى تۇستا جانە ءبىر شىندىقتىڭ باسىن اشىپ ايتۋ پارىز. بۇگىنگى تاڭدا الەمدە وزگە مەملەكەتتەرمەن تەرەزەسى تەڭ بولۋدى ارماندامايتىن, سونداي-اق, گەوساياسي, ەكونوميكالىق, əلەۋمەتتىك, تەحنولوگيالىق, دەموگرافيالىق, مəدەني, əسكەري جəنە قاۋىپسىزدىك تۇرعىسىنان ءوز əلەۋەتىنىڭ زور بولۋىن اڭسامايتىن, سول سياقتى, ءوز حالقىنىڭ اۋقاتتى جانە تۇراقتى دامۋىن كوزدەمەيتىن نەمەسە ءوز قاتارىنىڭ اراسىنان سۋىرىلىپ شىعىپ, ارىنداپ العا كەتكەن مىقتىلاردىڭ ورتاسىنا قوسىلۋدى كوكسەمەيتىن بىردە-ءبىر ەل جوق دەسەك, ارتىق ايتقاندىق ەمەس.
سوسىن, مۇنىڭ دəلەلىن الىستان ىزدەۋدىڭ دە قاجەتى جوق, سەبەبى, الدىنا ستراتەگيالىق مەگاماقساتتار قويىپ, مəڭگىلىك ەل بولۋعا بەل بۋعان قازاق ەلىنىڭ ءوزى دە ءدال بۇگىن جوعارىدا ايتىلعانداردىڭ ناقتى دəلەلى. الايدا, اسقاق ارمانداردى ىسكە اسىرۋ كەز كەلگەن سۋبەكتىنىڭ قولىنان وپ-وڭاي كەلە بەرمەيتىنى دە شىندىق. سەبەبى, گەوساياسي مۇددەلەر نەعۇرلىم اۋقىمدى جəنە كوزدەگەن نىسانالار نەعۇرلىم بيىك بولعان سايىن, ولارعا قول جەتكىزۋدىڭ دە سوعۇرلىم كۇردەلى بولاتىنى حاق. سودان سوڭ, بيىك مۇراتقا قاجىرلى ەڭبەك ەتپەي, اششى تەر توكپەي قول جەتكىزۋ استە مۇمكىن ەمەس ەكەنى دە ايدان انىق. دەمەك, بۇرالاڭى مەن سوقپاقتارى كوپ بۇل جولدا تۇيىققا تىرەلىپ قالۋعا بولمايدى. كەرىسىنشە, كەز كەلگەن سۋبەكت, مەيلى ول مەملەكەت بولسىن, مەيلى ءىرىلى-ۇساقتى كومپانيا بولسىن, ءتىپتى, قاتارداعى كəسىپكەر نەمەسە جەكە تۇلعا بولسىن قايرات پەن جىگەرىن جانىپ, جاقسىدان ۇيرەنە, جاماننان جيرەنە ءجۇرىپ, كوزدەگەن ماقساتقا جەتكىزەتىن جول تابۋعا تولاسسىز تىرىسۋى شارت.
مىنە, دəل وسى تۇرعىدان كەلگەندە, ەلىمىز جاڭا تاريحي كەزەڭگە اياق باسقان ۇستىمىزدەگى – 2017 جىلى ەلباسى ءوز جولداۋىندا قازاقستاننىڭ ءۇشىنشى جاڭعىرۋى باستالعانىن جاريالاپ, قايتا تۇلەۋدىڭ ايرىقشا ماڭىزدى ەكى ءىرى باعىتىن, اتاپ ايتقاندا, ساياسي جاڭعىرۋ مەن ەكونوميكالىق جاڭعىرۋعا ەرەكشە باسىمدىق بەرگەن بولاتىن. اتالعان ساياسي جانە ەكونوميكالىق جاڭعىرۋ پروتسەستەرىن ىسكە اسىرۋدا ەلباسى, ەڭ الدىمەن, ءبىزدىڭ سانامىزدىڭ ىسىمىزدەن وزىپ ءجۇرۋى كەرەكتىگىن, ياعني رۋحاني جاڭعىرۋدىڭ قاجەت ەكەنىن جانە مۇنى اتالعان الدىڭعى ەكى رەفورمانىڭ وزەگىنە اينالدىرۋ كەرەكتىگىن مىندەتتەپ, ول مىندەتتى قالاي ىسكە اسىرۋدىڭ ناقتى العىشارتتارىن دا ايقىنداپ بەردى. سوندىقتان دا بولار, اتالمىش ماقالادا ەرەكشە ءمان بەرىلگەن باسەكەگە قابىلەتتىلىك, پراگماتيزم, ءبىلىمنىڭ سالتانات قۇرۋى, قازاقستاننىڭ رەۆوليۋتسيالىق ەمەس, ەۆوليۋتسيالىق جولمەن دامۋى, ۇلتتىق سانا, ۇلتتىق مادەنيگەنەتيكالىق كود, تۋعان جەر قاسيەتى, لاتىن الىپبيىنە كوشۋ ماسەلەلەرىنە قاتىستى ەلباسىنىڭ يننوۆاتسيالىق ويتولعامدارى مەن ۇسىنىس-پىكىرلەرى ەل ازاماتتارىنىڭ كوكەيىنە ۇيالاپ, ەرەكشە ۇندەستىك تابۋدا جانە ول قۇندىلىقتاردىڭ بۇگىنگى قوعامدا بەلسەندى تالقىلانىپ جاتقانى جايدان-جاي ەمەس.
تۇپتەپ كەلگەندە, ەلباسى جولداۋى مەن جوعارىدا سىلتەمە جاسالعان زاماناۋي ماقالاسىندا ەرەكشە ءمان بەرىلگەن قۇندىلىقتار تۇگەلدەي − قازاقستاننىڭ ماڭگى ەل بولۋى مەن وركەنيەتتىڭ بيىك ساتىلارىنا كوتەرىلۋ جولىنداعى رۋحاني مۇراتتارى جانە ولاردىڭ بارلىعى دا ءبىر-بىرىمەن وتە تىعىز بايلانىستى نىسانالار.
ايتسا, ايتقانداي-اق, باسەكەگە قابىلەتتى مەملەكەتتىڭ ەكونوميكاسى عانا ەمەس, ءبىلىم سالاسى دا, دەنساۋلىق سالاسى دا, عىلىمى دا, وزىق تەحنولوگياعا نەگىزدەلگەن وندىرگىش كۇشتەرى مەن ەڭبەك ونىمدىلىگى دە, جەكەلەگەن ازاماتتارى دا باسەكەگە وتە قابىلەتتى بولۋى شارت.
قازاقستاننىڭ ەۆوليۋتسيالىق جولمەن دامۋدى تاڭداۋىنىڭ دا ءوز سىرى بار. ويتكەنى, رەۆوليۋتسيالىق جول تاڭداعان الىس-جاقىن ەلدەردىڭ بىردە-ءبىرىنىڭ مۇراتقا جەتكەنى جوق, قايتا داعدارىستان-داعدارىسقا تاپ بولىپ, حالىقتارى ازىپ-توزىپ, بوسقىن بولىپ, بوداندىققا ۇشىراپ جاتقانىن ءوز كوزىمىزبەن كورىپ وتىرمىز. سول سياقتى, ۇلتتىق ساناسى مەن ۇلتتىق گەنەتيكالىق كودىنان, دالىرەك ايتقاندا, تاريحي ساناسى مەن سالت-داستۇرىنەن, ءتىلى مەن دىلىنەن, دىنىنەن ايىرىلعان حالىقتاردىڭ بولاشاعى قاراڭ بولاتىنى دا كۇمان تۋدىرمايدى. ويتكەنى, تاريح قويناۋىندا بۇعان دالەل بولاتىن مىسالدار جەتىپ-ارتىلادى. ماسەلەن, كەلمەسكە كەتكەن, شۋمەر, ۆاۆيلون, اككاد جانە اسسيريا وركەنيەتتەرى جوعارىدا ايتىلعانداردىڭ بۇلتارتپاس دالەلدەرى.
پرەزيدەنت كولدەنەڭ تارتىپ وتىرعان پراگماتيزمنىڭ دە استارى تەرەڭ قۇندىلىق. قولدا باردا التىننىڭ قادىرىن باعالاماي, ىسىراپقا جول بەرىپ, قولدان شىعارىپ العان كەزدە وكىنىپ جاتاتىنىمىز جالعان ەمەس. سوندىقتان ەلباسى كەز كەلگەن شەشىمدى جەتى رەت ولشەپ, ءبىر رەت قانا كەسۋ كەرەكتىگىن مەڭزەپ وتىر. بۇل تۇرعىدان كەلگەندە, ەگەمەن جىلدارى پرەزيدەنت ۇسىنعان مەگاجوبالار مەن ستراتەگيالىق جولداۋلاردىڭ قاي-قايسىسى دا سالماقتى پراگماتيزمگە نەگىزدەلگەن. سوسىن ەلباسى قوزعاپ وتىرعان ۇلتتىق سانا مەن ۇلتتىق مادەني-گەنەتيكالىق كود, تۋعان جەر قاسيەتى – ءبىر-بىرىنە ەتەنە جاقىن قۇندىلىقتار ءارى ولاردىڭ ىرگەتاسى ۇلتىمىزدىڭ ماقال-ماتەلدەرى مەن ناقىل سوزدەرىندە تۇنىپ تۇر. ەلباسىنىڭ الگى قۇندىلىقتارعا سىلتەمە جاساۋ ارقىلى قوعامىمىزدىڭ ساناسى تۇزەلمەي ءىسىمىز تۇزەلە قويمايتىنىن جانە ۇلتىمىزدىڭ گەنەتيكالىق كودىن قۇرايتىن سالت-داستۇرلەرىمىز بەن انا ءتىلىمىز, ءدىنىمىز جانە دىلىمىزدەن ايىرىلاتىن بولساق نەمەسە تۋعان جەر قاسيەتى مەن كيەسىن ۇمىتاتىن بولساق, ەل بولۋدان قالاتىنىمىزدى وتە نانىمدى ەسكەرتىپ وتىر.
پرەزيدەنت كوتەرىپ وتىرعان لاتىن الىپبيىنە كوشۋ ماسەلەسى ەلىمىزدى رۋحاني ەگەمەندىككە اپاراتىن تۋرا جول, ويتكەنى, بۇل – الەم وركەنيەتىنىڭ باسىم كوپشىلىگىنىڭ ءالىپبيى, ودان دا ناقتىراق ايتار بولساق, بۇل ءالىپبي – وزىق عىلىم مەن ءبىلىمنىڭ, زاماناۋي تەحنولوگيالار مەن اقپاراتتىق-كوممۋنيكاتسيا قۇرالدارىنىڭ, قارجى مەن بانك جۇيەلەرىنىڭ, ساۋدا-ساتتىق پەن ءتۋريزمنىڭ, بۇكىلالەمدىك عالامتور مەن ينتەرنەتتىڭ ء الىپبيى, دەمەك, ەڭ باستى دا ءتيىمدى قۇرالى.
جانە ءبىر ايقىن مىسالدى ەسكە سالۋدىڭ رەتى كەلىپ تۇر. جوعارىدا ايتىپ وتكەندەي, بۇگىنگى تاڭدا قارقىندى مەگاوزگەرىستەرگە تولى الەم ديناميكاسى فۋتۋريست-فيلوسوفتار مەن عالىمداردى دا بەي-جاي قالدىرىپ وتىرعان جوق. مۇنىڭ ايقىن دالەلى تومەندەگىدەي. الەم قاۋىمداستىعىنا ايگىلى ءارى جارتى عاسىردان استام تاريحى بار «ەكونوميست» دەگەن ايدارمان اعىلشىن تىلىندە ۇلىبريتانيادا اپتا سايىن شىعىپ تۇراتىن عىلىمي ىرگەتاسقا نەگىزدەلگەن حالىقارالىق باسىلىمنىڭ بىلىكتى ساراپشىلارىنىڭ «مەگاوزگەرىستەر: 2050 جىلعى الەم» دەگەن اتپەن 2012 جىلى جارىق كورگەن بىرتومدىق تۋىندى بۇكىل الەم نازارىن وزىنە بىردەن اۋدارىپ العان بولاتىن. سەبەبى, بىلىكتى دە كاسىبي ساراپشىلار توبىنىڭ قالامىنان شىققان الگى باسىلىمدا ۇستىمىزدەگى ءححى عاسىردىڭ الداعى 40 جىلىندا الەمدىك گەوساياسات پەن حالىقارالىق قاتىناستاردىڭ دا, قارجى جۇيەلەرى مەن ەكونوميكالىق بايلانىستاردىڭ دا, سول سياقتى, عىلىم مەن مادەنيەتتىڭ, قورشاعان ورتا مەن الەم قاۋىپسىزدىگىنىڭ بولاشاق بولمىسىنىڭ دا قالاي وزگەرەتىنى جايىندا سالماقتى دا ساليقالى پىكىرلەر تۇيىندەلگەن. تۋىندىدا, سونىمەن قاتار, قورشاعان ورتانىڭ كۇيرەۋى توقتالا ما, گەنوميكا مەن دەنساۋلىق ساقتاۋ سالاسىندا رەۆوليۋتسيا بولا ما, الەمنىڭ دامىعان ەلدەرىندەگى تەڭسىزدىكتىڭ ۇلعايۋى جالعاسا بەرە مە, وسىدان 40 جىلدان سوڭ الەمنىڭ قاي ەلىنىڭ ەكونوميكاسى باسىمدىققا يە بولادى؟ ت.س.س. وزەكتى ساۋالدارعا اتالمىش تۋىندىنى قۇراستىرعان 20 ساراپشى دايەكتى دە دالەلدى تالداۋ جاساي وتىرىپ, الەمنىڭ 2050 جىلدارعا دەيىنگى بولمىسىن وتە نانىمدى سۋرەتتەيدى.
كىتاپتىڭ ءون بويىنان قۇراستىرۋشىلاردىڭ بارىنە ورتاق ءبىر سيپات ايقىن بايقالادى. ءوز جازبالارىندا ولاردىڭ قاي-قايسىسى دا بولاشاققا ۇڭىلمەس بۇرىن, الدىمەن, وتكەن تاريحقا كوز جۇگىرتەدى. بۇل ءادىس ولارعا بۇگىنگى وركەنيەت بولمىسىندا ورىن الىپ وتىرعان سان-قيلى مەگاوزگەرىستەر مەن ۇدەرىستەردىڭ ءمانى مەن اۋقىمىن ءدال باعامداپ, ولاردىڭ ديناميكاسىن تەرەڭ تۇيسىنۋگە مۇمكىندىك بەرگەن.
كاسىبي ساراپشىلاردىڭ پىكىرىنشە, الەم ەكونوميكاسىنىڭ تاياۋ
بولاشاقتاعى قوزعاۋشى كۇشى, بىرىنشىدەن, الەمدىك جاھاندانۋ ۇدەرىستەرى بولسا, ەكىنشىدەن, ازيا ەكونوميكاسىنىڭ اۋەل باستاعى تاريحي باسىمدىقتارىنا قايتا يە بولا باستاۋى بولىپ تابىلادى. بۇل تۇرعىدان كەلگەندە, «جاھاندانۋ» دەگەن ۇعىم الەمدىك نارىقتارداعى ينتەگراتسيالىق ۇدەرىستەردىڭ ەكىنشى اتاۋى دەۋگە لايىق. ول ۇدەرىستەردىڭ نەگىزگى باسىمدىقتارى, بىرىنشىدەن, ترانسپورت پەن كوممۋنيكاتسيا جۇيەلەرىن دامىتا تۇسۋگە مۇمكىندىك بەرەتىن تەحنولوگيالىق يننوۆاتسيالار بولسا, ەكىنشىدەن, ەركىن ساۋدا مەن ينۆەستيتسيالىق كليماتتى جانە ميگراتسيالىق پروتسەستەردى جەڭىلدەتەتىن ساياسي شەشىمدەر.
ءبىر سوزبەن ايتقاندا, بۇگىنگى تاڭداعى «جاھاندانۋ» دەگەنىمىز – الەمدىك نارىقتاردىڭ مەملەكەتتىك شەكارالاردى اتتاپ ءوتىپ, سىرتقا قاراي كەڭ قانات جايۋى. بۇل ۇدەرىس, سونىمەن قاتار, تەك ەكونوميكالىق قاتىناستارمەن عانا شەكتەلمەيدى. بۇدان بىلايعى جەردە «ۇلتتىق شەكارالار» مەن «گەوگرافيالىق كەڭىستىكتەر» دەگەن ۇعىمدار السىرەپ, كەرىسىنشە, حالىقارالىق قاتىناستار دەگەن ۇعىمنىڭ اياسىنا جۇمىس قولى مەن تاۋارلاردىڭ دا, كاپيتال مەن تەحنولوگيالاردىڭ دا, ءتىپتى, يدەيالار مەن مادەني-رۋحاني قۇندىلىقتاردىڭ دا سىيىپ كەتەتىنى جانە ولاردىڭ ەمىن-ەركىن اينالۋىنا ەشنارسە بوگەت بولا المايتىنى كوزگە ۇرىپ تۇر.
مۇنىڭ ايقىن دالەلى رەتىندە كەشە عانا قىتاي استاناسى بەيجىڭدە الەمنىڭ 29 ەلىنىڭ باسشىلارى مەن جۇزدەن اسا مەملەكەتتەردىڭ وكىلدەرى مەن ەڭ ءىرى حالىقارالىق ساياسي جانە قارجى ۇيىمدارىنىڭ جەتەكشىلەرى باس قوسقان «بەلدەۋ جانە جول» ىنتىماقتاستىق فورۋمى. بۇل فورۋم – جاھاندانعان ءححى عاسىرداعى مۇددەلەر توعىسىنىڭ ەڭ ايقىن كورىنىسى. ءدال وسى حالىقارالىق مەگافورۋم مەن ونىڭ ارنايى سەسسيالارىندا ءسوز سويلەگەن قازاقستان پرەزيدەنتىنىڭ پىكىرى مەن ۇسىنىستارى قىتاي حالىق رەسپۋبليكاسىنىڭ توراعاسى سين تسزينپين تاراپىنان وتە جوعارى باعالانىپ, ءبىزدىڭ ەلىمىز ترانسقۇرىلىقتىق ترانزيتتىك تاسىمالداۋدىڭ «چەمپيونى» دەگەن شىنايى ماداققا يە بولدى.
بۇل ايتىلعانداردان شىعاتىن قورىتىندى تومەندەگىدەي بولماق. ەلىمىز وسىلايشا, ەۆوليۋتسيالىق جولمەن دامي بەرسە, حالقىمىز كوزدەگەن ماقسات-مۇراتتارىنا مىندەتتى تۇردە قول جەتكىزەدى.
ءادىل احمەتوۆ,
قازاقستاننىڭ ەڭبەك سىڭىرگەن قايراتكەرى
