قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ جارلىعىمەن ورىس پراۆوسلاۆيە شىركەۋىنىڭ كوشباسشىسى «مەملەكەتتىك جانە قوعامدىق قىزمەتكە, ەلدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى, حالىقتار اراسىنداعى دوستىق پەن ىنتىماقتاستىقتى نىعايتۋعا سىڭىرگەن ەڭبەگى ءۇشىن» جوعارى ناگراداعا يە بولدى.
ي.تاسماعامبەتوۆ قازاقستان رەسپۋبليكاسى مەن ەل پرەزيدەنتى نۇرسۇلتان نازارباەۆتىڭ اتىنان ناگرادا تاپسىرۋ ۇلكەن مارتەبە ەكەنىن ايتتى. «بۇل – ءسىزدىڭ بەيبىتشىلىك پەن كەلىسىمدى, ەكى ەلدىڭ حالىقتارى اراسىنداعى دوستىق قارىم-قاتىناستاردى نىعايتۋداعى تىنىمسىز ءارى ولشەۋسىز ەڭبەگىڭىزگە دەگەن ايرىقشا قۇرمەت, – دەپ اتاپ ءوتتى قازاقستاندىق ديپلومات. – قازاقستاندا يسلاممەن قاتار, پراۆوسلاۆيە ءدىنى دە قوعامدىق ومىردە ەرەكشە ورنى بار جەتەكشى كونفەسسيالاردىڭ ءبىرى. ءبىزدىڭ ەلىمىزدە ورىس پراۆوسلاۆيە شىركەۋى وتە ماڭىزدى قىزمەت اتقارادى».
ءوز كەزەگىندە پاتريارح كيريلل كورسەتىلگەن جوعارى ماراپات ءۇشىن قازاقستان پرەزيدەنتى نۇرسۇلتان نازارباەۆقا العىسىن جەتكىزىپ, بارشا قازاقستان حالقىنا بەيبىت ءومىر مەن ءوسىپ-وركەندەۋ تىلەدى.
«دوستىق» وردەنى – قازاقستان رەسپۋبليكاسىنىڭ جوعارى ناگرادالارىنىڭ ءبىرى. بۇل وردەنمەن قوعامداعى ۇلتارالىق جانە ازاماتتىق تاتۋلىقتى ساقتاۋدا جەمىستى جۇمىس اتقارعان, حالىقتار اراسىنداعى بەيبىتشىلىكتى, دوستىق پەن ىنتىماقتاستىقتى نىعايتۋعا ەڭبەك سىڭىرگەن ازاماتتار ماراپاتتالادى. وردەن يەگەرلەرىنىڭ اراسىندا بۇۇ باس حاتشىسى پان گي مۋن, ۇقشۇ باس حاتشىسى نيكولاي بورديۋجا, ماسكەۋ جانە بۇكىل رەسەي پاتريارحى الەكسي II, اقش پرەزيدەنتى (1989-1993) دجوردج بۋش (ۇلكەنى), اقش-تىڭ 67-ءشى مەملەكەتتىك حاتشىسى حيللاري كلينتون, ۇلىبريتانيانىڭ پرەمەر-ءمينيسترى (1979-1990) مارگارەت تەتچەر, كاردينال-ەپيسكوپ, كاردينالدار القاسىنىڭ دەكانى (2001) اندجەلو سودانو, ساۋد ارابياسىنىڭ كورولى – ابدۋللا يبن ابدەل ءازيز اس-ساۋد, حورۆاتيا پرەزيدەنتى (2000- 2010) ستەپان مەسيچ, رۋمىنيا پرەزيدەنتى يون يليەسكۋ, تاتارستان رەسپۋبليكاسىنىڭ تۇڭعىش پرەزيدەنتى مينتيمەر شايميەۆ, ت.ب. بار.
