وتىرىستى اشقان گۇلشارا ناۋشاقىزى بۇگىندە ەلىمىزدە مەملەكەت باسشىسى نۇرسۇلتان نازارباەۆتىڭ باستاماسى بويىنشا قازاقستاننىڭ ءۇشىنشى جاڭعىرۋى ىسكە اسىرىلىپ جاتقانىن اتاپ ءوتتى. ول – ساياسي رەفورما, ەكونوميكالىق جاڭعىرۋ جانە قوعامدىق سانانى جاڭعىرتۋ.
«ەلباسى بيىل ءۇش بىردەي تاريحي جاڭعىرۋلارعا جول اشتى. بىرىنشىدەن, پرەزيدەنت كونستيتۋتسيالىق رەفورما ارقىلى مەملەكەتتىڭ ساياسي جاڭعىرۋىن قولعا الدى. ەكىنشىدەن, مەملەكەت باسشىسى ەلىمىزدى تەحنولوگيالىق دامۋدىڭ جاڭا دەڭگەيىنە شىعاراتىن قازاقستاننىڭ ءۇشىنشى جاڭعىرۋىن ايقىندادى. ۇشىنشىدەن, ءبىلىم, عىلىم, مادەنيەت جانە تاريحتى تۇتاستاي قامتيتىن ۇلتتىق رۋحاني جاڭعىرۋ باعدارلاماسىن ۇسىندى. وسى باعىتتاردى ىسكە اسىرۋ ارقىلى ءبىز قازاقستاننىڭ الەمنىڭ ەڭ وزىق 30 ەلىنىڭ قاتارىنا ەنۋىنە مۇمكىندىك الامىز. بۇگىنگى كۇن ءتارتىبى اياسىندا ءبىز قوعامنىڭ ىرگەتاسى بولىپ سانالاتىن وتباسى, انا مەن بالانى مەملەكەت تاراپىنان قولداۋ جۇمىستارى قالاي جۇرگىزىلىپ جاتقانىن قاراستىرامىز», – دەدى
گ.ابدىقالىقوۆا.
مەملەكەتتىك حاتشىنىڭ پايىمىنشا, بۇل مىندەتتەردى جۇزەگە اسىرۋداعى باستى شارت – قوعامدىق ساناسى بيىك, سالاماتتى ءارى ءبىلىمدى ۇلت قالىپتاستىرۋ. ال ادامداردىڭ بويىنا رۋحاني قۇندىلىقتاردى قالىپتاستىرۋدا ايقىنداۋشى ءرول وتباسى ينستيتۋتىنا تيەسىلى بولعاندىقتان, وتباسى مەملەكەتتىڭ نەگىزى رەتىندە ايرىقشا نازاردى جانە قامقورلىقتى, ازاماتتاردىڭ ءومىر ءسۇرۋ ساپاسى مەن دەڭگەيىن جاقسارتۋدى تالاپ ەتەتىنى انىق. سوندىقتان, وتىرىستا وتباسىن, انا مەن بالانى, سونداي-اق, مۇمكىندىگى شەكتەۋلى بالالارى بار وتباسىلاردى قولداۋ جونىندەگى مەملەكەتتىك شارالار كەشەنى تۋرالى ماسەلە قارالدى. مىسالى, ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا سۇيەنسەك, قازاقستاندا تۋدى ىنتالاندىرۋ مەن وتبا-
سىندا بالالاردى تاربيەلەۋگە جاردەمدەسۋگە, كوپبالالى انالاردىڭ بەدەلىن ارتتىرۋعا, مۇگەدەك بالالار مەن ولاردىڭ وتباسىلارىنا, بۇعان قوسا, الەۋمەتتىك جاعدايى تومەن شاڭىراقتارعا قولۇشىن سوزىپ, كومەكتەسۋگە باعىتتالعان مەملەكەتتىك جاردەماقىلار مەن تولەمدەر جۇيەسى اياسىنداعى بالالى وتباسىن قولداۋدىڭ ۇلتتىق مودەلى ازىرلەنگەن.
ەلباسىنىڭ تاپسىرماسى بويىنشا, بيىلعى جىلدىڭ 1 شىلدەسىنەن باستاپ بالانىڭ تۋىنا بىرجولعى جاردەماقى مولشەرى 20%-عا كوبەيتىلەتىن بولادى. بۇعان قوسا, 2018 جىلدىڭ 1 قاڭتارىنان باستاپ, ەڭ تومەنگى كۇنكورىس مولشەرى قايتا قارالماق. بۇل 3 ملن ازامات ءۇشىن بازالىق زەينەتاقىلاردىڭ, مۇگەدەكتەرگە, اسىراۋشىلارىنان ايىرىلعان وتباسىلارىنا ارنالعان جاردەماقىلاردىڭ, مۇگەدەك بالالاردى تاربيەلەۋشىلەرگە ارنالعان اتاۋلى كومەك پەن جاردەماقىلاردىڭ مولشەرلەرىن ارتتىرۋعا مۇمكىندىك بەرمەك.
جيىندا سونداي-اق, حالىقتىڭ جالپى حاباردارلىعىن ارتتىرۋ جانە بالالاردى بارلىق زورلىق-زومبىلىقتان, باق-تار مەن الەۋمەتتىك جەلىلەر جانە الەۋمەتتىك جارناما ارقىلى زياندى اقپاراتتان قورعاۋ جونىندەگى مەملەكەتتىك شارالار تۋرالى ماسەلەگە دە نازار اۋدارىلدى. وسى ورايدا, ءبىلىم جانە عىلىم, اقپارات جانە كوممۋنيكاتسيالار مينيسترلىكتەرىنىڭ اقپاراتى بويىنشا, زاڭناماعا بالالاردىڭ دەنساۋلىعىنا, ولاردىڭ ادامگەرشىلىگى مەن رۋحاني دامۋىنا زيان كەلتىرەتىن اقپاراتتان قورعاۋعا باعىتتالعان جاڭا نورمالاردى «بالانىڭ جاسىنا سايكەس كەلەتىن اقپارات» ۇعىمىن, سونىمەن بىرگە, ءبىلىم ۇيىمدارى مەن بايلانىس وپەراتورلارىنا ينتەرنەت-ترافيكتى سۇزگىلەۋ قىزمەتىن كورسەتۋدى ۇسىنۋ جونىندەگى تالاپتاردى بەكىتۋ جولىمەن ەنگىزۋ جونىندە جۇمىس جۇرگىزىلىپ جاتىر ەكەن.
وتىرىس قورىتىندىسىنا سايكەس, گۇلشارا ابدىقالىقوۆا كوتەرىلگەن, تالقىعا سالىنعان ماسەلەلەر بويىنشا مەملەكەتتىك ورگاندارعا بىرقاتار تاپسىرما بەردى.
ءلايلا ەدىلقىزى,
«ەگەمەن قازاقستان»
