سالتاناتتى ءراسىم ماسكەۋدەگى قۇتقارۋشى حريستوس حرامىندا ءوتتى. «قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جارلىعىمەن ورىس پراۆوسلاۆ شىركەۋىنىڭ جەتەكشىسى «مەملەكەتتىك جانە قوعامدىق قىزمەتكە, ەلدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى, حالىقتار اراسىنداعى دوستىق پەن ىنتىماقتاستىقتى نىعايتۋداعى سىڭىرگەن ەڭبەگى ءۇشىن» جوعارى ناگراداعا يە بولدى» دەلىنگەن حابارلامادا.
يمانعالي تاسماعامبەتوۆ قازاقستان رەسپۋبليكاسى مەن ەل پرەزيدەنتى نۇرسۇلتان نازارباەۆتىڭ اتىنان ناگرادا تاپسىرۋ ۇلكەن مارتەبە ەكەنىن ايتتى. "بۇل ءسىزدىڭ بەيبىتشىلىك پەن كەلىسىمدى, ەكى ەل حالىقتارى اراسىنداعى دوستىق قارىم-قاتىناستاردى نىعايتۋداعى زور ەڭبەگىڭىزگە دەگەن ايرىقشا قۇرمەت"- دەپ اتاپ ءوتتى قازاقستاندىق ديپلومات.
تاسماعامبەتوۆ قازاقستاندا يسلاممەن قاتار, پراۆوسلاۆ ءدىنى دە قوعامدىق ومىردە ەرەكشە ورنى بار جەتەكشى كونفەسسيالاردىڭ ءبىرى ەكەنىن ايتتى.
پاتريارح كيريلل وزىنە كورسەتىلگەن جوعارى ماراپات ءۇشىن قازاقستان پرەزيدەنتى نۇرسۇلتان نازارباەۆقا الىعىسىن جەتكىزىپ, بارشا قازاق حالقىنا بەيبىت ءومىر مەن ءوسىپ-وركەندەۋىنە نيەتتەستىك ءبىلدىردى.
«دوستىق» وردەنى - قازاقستان رەسپۋبليكاسىنىڭ جوعارى ناگرادالارىنىڭ ءبىرى. بۇل وردەنمەن قوعامداعى ۇلتارالىق جانە ازاماتتىق تاتۋلىقتى ساقتاۋدا جەمىستى جۇمىس اتقارعان, حالىقتار اراسىنداعى بەيبىتشىلىكتى, دوستىق پەن ىنتىماقتاستىقتى نىعايتۋعا ەڭبەك سىڭىرگەن ازاماتتار ماراپاتتالادى. وردەن يەگەرلەرىنىڭ اراسىندا - بۇۇ باس حاتشىسى پان گي مۋن, ۇقكۇ باس حاتشىسى نيكولاي بورديۋجا, ماسكەۋ جانە بۇكىل رەسەي پاتريارحى الەكسي II, اقش پرەزيدەنتى (1989-1993) دجوردج بۋش (ۇلكەنى), اقش-تىڭ 67-ءشى مەملەكەتتىك حاتشىسى حيللاري كلينتون, ۇلىبريتانيانىڭ پرەمەر-ءمينيسترى (1979-1990) مارگارەت تەتچەر, كاردينال-ەپيسكوپ, كاردينالدار القاسىنىڭ دەكانى (2001) اندجەلو سودانو, ساۋد ارابياسىنىڭ پاتشاسى - ابدۋللا يبن ابدۋل ازيز اس-ساۋد, حورۆاتيا پرەزيدەنتى (2000- 2010) ستەپان مەسيچ, رۋمىنيا پرەزيدەنتى يون يليەسكۋ, تاتارستان رەسپۋبليكاسىنىڭ تۇڭعىش پرەزيدەنتى مينتيمەر شايميەۆ, سينگاپۋر 1-ءشى پرەمەر-ءمينيسترى لي كۋان يۋ, تۇركىمەنستان پرەزيدەنتى گۋربانگۋلى بەردىمۋحامەدوۆ, سلوۆاكيا پرەزيدەنتى (2007) يۆان گاشپاروۆيچ, ۆەنگريا پرەزيدەنتى (2007) - لاسلو شويوم, فيفا پرەزيدەنتى يوزەف بلاتتەر, رف پرەزيدەنتى اكىمشىلىگىنىڭ باسشىسى سەرگەي يۆانوۆ, قارۋ قۇراستىرۋشى ميحايل كالاشنيكوۆ, بالەتمەيستەر يۋري گريگوروۆيچ, كسرو حالىق ءارتىسى يوسيف كوبزون جانە باسقا تانىمال تۇلعالار بار.
