باۋىرجان يسلامحان – پرەمەر-ليگانىڭ ۇزدىك ويىنشىسى

«قايرات» فۋتبول كومانداسىنىڭ كاپيتانى باۋىرجان يسلامحان پرەمەر-ليگانىڭ ۇزدىك ويىنشىسى اتاندى, دەپ حابارلادى vesti.kz. كاسىپقوي فۋتبول ليگاسى قپل-2016 ماۋسىمىنىڭ ۇزدىك ويىنشىسىن انىقتاۋ بويىنشا ساۋالنامانىڭ قورىتىندىسىن شىعاردى. بۇعان ەلىمىزدە ونەر كورسەتەتىن كوماندالاردىڭ باسشىلارى, باس جاتتىقتىرۋشىلار جانە كاپيتاندار قاتىستى. داۋىس بەرۋ كەزىندە ءاربىر رەسپوندەنت قاتىسۋشىلار ىشىنەن ۇزدىك فۋتبولشىلاردىڭ ۇشەۋىن اتادى. ءبىرىنشى ورىن ءۇشىن ءۇش ۇپاي, ەكىنشى ورىنعا ەكى ۇپاي, ءۇشىنشى ورىنعا ءبىر ۇپاي بەرىلدى. قورىتىندىسىندا باۋىرجان يسلامحان بارلىعى 46 ۇپاي جيناپ, ۇزدىك ويىنشىسى اتاندى.  ەكىنشى ورىن وتكەن ماۋسىمدى «ورداباسى» ساپىندا باستاپ, «استانادا» التىن مەدالدارمەن اياقتاعان ازات نۇرعاليەۆكە بەرىلدى. ونىڭ ەنشىسىندە 27 ۇپاي. ال ءۇشىنشى ورىندا – «قايرات» شابۋىلشىسى جەرار گوۋ. يۆۋاريالىق تا 27 ۇپاي جينادى. ءتورتىنشى ورىنعا «ەرتىس» ويىنشىسى كارلوس فونسەكا (15 ۇپاي) جايعاسسا, ۇزدىك بەستىكتى «قايراتتىڭ» تاعى ءبىر جارتىلاي قورعاۋشىسى اندرەي ارشاۆين (13 ۇپاي) تۇيىندەدى.